Sunrisers Hyderabad Sixes: 2024 ఐపీఎల్లో సన్రైజర్స్ హైదరాబాద్ మరో అరుదైన ఘనత సాధించింది. ఐపీఎల్ చరిత్రలో సింగిల్ ఎడిషన్లో అత్యధిక సిక్స్లు బాదిన జట్టుగా రికార్డు సృష్టించింది. గురువారం రాయల్ ఛాలెంజర్స్ బెంగళూరుతో జరిగిన మ్యాచ్లో సన్రైజర్స్ బ్యాటర్లంతా కలిసి 9 సిక్స్లు బాదారు. ఈ క్రమంలో ప్రస్తుత సీజన్లో 100 సిక్స్ల మార్క్ టచ్ చేశారు. దీంతో ఐపీఎల్లో ఓ సీజన్లో 100+ సిక్స్లు బాదిన తొలి జట్టుగా రికార్డు కొట్టింది. ప్రస్తుత సీజన్లో సన్రైజర్స్ ఇప్పటివరకు 108 సిక్స్లు బాదింది.
వాళ్లూ టాప్లో: ఈ సీజన్లో అత్యధిక సిక్స్లు బాదిన లిస్ట్లోనూ సన్రైజర్స్ ప్లేయర్లే టాప్- 2లో ఉన్నారు. ఇప్పటివరకు 8 మ్యాచ్లు ఆడిన హెన్రీచ్ క్లాసెన్ 27 సిక్స్లు బాదగా, అన్నే మ్యాచ్లు ఆడిన ఓపెనర్ అభిషేక్ శర్మ 26 సిక్స్లు కొట్టాడు. మరో ఓపెనర్ ట్రావిస్ హెడ్ 18 సిక్స్లతో టాప్- 10లో కొనసాగుతున్నాడు.
ఇక ఈ ఏడాది సన్రైజర్స్ అద్భుతంగా ఆడుతోంది. భీకరమైన బ్యాటింగ్తో ప్రత్యర్థి జట్టు బౌలర్లకు చెమటలు పట్టిస్తోంది. ప్రస్తుత సీజన్లో ఒకటి రెండు కాదు మూడుసార్లు 260+ స్కోర్ నమోదు చేసి ఔరా అనిపించింది. ఈ క్రమంలోనే ఐపీఎల్ చరిత్రలో అత్యధిక పరుగులు (287-3) బాదిన రికార్డూ కొట్టింది. అది కూడారాయల్ ఛాలెంజర్స్ బెంగళూరుపై బాదడం విశేషం.
ఇక మ్యాచ్ విషయానికొస్తే, తొలుత బ్యాటింగ్ చేసిన ఆర్సీబీ నిర్ణీత 20 ఓవర్లలో 7 వికెట్ల నష్టానికి 206 పరుగులు చేసింది. విరాట్ కోహ్లీ (51 పరుగులు), రజత్ పాటిదార్ (50 పరుగులు) హాఫ్ సెంచరీలతో సత్తాచాటారు. కామెరూన్ గ్రీన్ చివర్లో (37 పరుగులు) రాణించడం వల్ల ఆర్సీబీ స్కోర్ 200 దాటింది. అనంతరం ఛేదనలో సన్రైజర్స్ తడబడింది. ట్రావిస్ హెడ్ (1), అభిషేక్ శర్మ (31), ఎయిడెన్ మార్క్రమ్ (7), హెన్రీచ్ క్లాసెన్ (7), నితీశ్ రెడ్డి (13) విఫలమయ్యారు. చివర్లో కెప్టెన్ ప్యాట్ కమిన్స్ (31 పరుగులు) మెరుపులు మెరిపించినా అది సన్రైజర్స్ విజయానికి సరిపోలేవు. దీంతో 20 ఓవర్లలో 8 వికెట్లు కోల్పోయి 171 పరుగులకే పరిమితమైంది.
దీంతో ప్రస్తుత సీజన్లో సన్రైజర్స్ మూడో పరాజయాన్ని చవిచూడగా, ఆర్సీబీ రెండో విజయం ఖాతాలో వేసుకుంది. ప్రస్తుత సీజన్లో 8 మ్యాచ్ల్లో 5 విజయాలతో సన్రైజర్స్ పట్టికలో మూడో స్థానంలో ఉండగా, 9 మ్యాచ్ల్లో 2 గెలుపులతో 10వ ప్లేస్లో కొనసాగుతోంది.
సన్రైజర్స్ ఓటమి - కోహ్లీ, పాటిదర్ మెరుపులతో ఎట్టకేలకు ఆర్సీబీ రెండో విజయం - IPL 2024 SRH VS RCB
కోహ్లీ అరుదైన రికార్డ్ - ఐపీఎల్ చరిత్రలోనే ఏకైక క్రికెటర్గా - IPL 2024 SRH VS RCB
