Shubman Gill T20 World Cup: 2024 టీ20 వరల్డ్కప్ టీమ్ఇండియా సెలక్షన్ క్రీడా వర్గాల్లో ప్రస్తుతం హాట్ టాపిక్గా మారింది. కొన్ని రోజుల నుంచి ప్రపంచకప్ జట్టు ఎంపికపై మాజీ క్రికెటర్లు, విశ్లేషకులు వ్యక్తిగత అభిప్రాయాలు తెలుపుతున్నారు. ఈ క్రమంలో వరల్డ్కప్ జట్టు విషయంలో టీమ్ఇండియా యంగ్ బ్యాటర్ శుభ్మన్ గిల్ ఆసక్తికర వ్యాఖ్యలు చేశాడు. తనకు జట్టులో స్థానం దక్కకపోతే, టీమ్కు మద్దతిస్తూ ప్లేయర్లను ప్రోత్సహిస్తానని అన్నాడు.
ప్రముఖ స్పోర్ట్స్ పాడ్కాస్ట్ స్పోర్ట్స్ టాక్లో రీసెంట్గా పాల్గొన్న గిల్ ఈ కామెంట్స్ చేశాడు. 'ఇదివరకు టీమ్ఇండియా ఏ ప్రత్యర్థితో సిరీస్ ఆడినా ఆ జట్టులో గిల్ పేరు కచ్చితంగా ఉండేది. అలాంటిది, టీ20 వరల్డ్కప్ జట్టులో గిల్కు స్థానం ఉంటుందా? గిల్కు ఇతర యంగ్ ప్లేయర్ల నుంచి పోటీ ఎదురుకానుందా? అన్న చర్చలు ప్రస్తుతం నడుస్తున్నాయి. ఇలాంటివి విన్నప్పుడు నీకు ఏమనిపిస్తుంది?' అని పాడ్కాస్ట్ యాంకర్ అడిగాడు. దానికి గిల్ ఇంట్రెస్టింగ్గా సమాధానం ఇచ్చాడు. 'ప్రతీ ప్లేయర్కు సొంత దేశానికి ఆడడం అనేది ఓ కల. గతేడాది జరిగిన వన్డే వరల్డ్కప్ ప్రారంభంలో నేను డెంగీ బారిన పడ్డాను. ఆ తర్వాత కోలుకొని టోర్నీలో అద్భుతంగా ఆడాను. ఆ సమయంలో నేను చాలా నేర్చుకున్నా. టీ20 వరల్డ్కప్లోనూ టీమ్ఇండియాకు ఆడాలనేది నా కోరిక. ఇక సెలెక్షన్ మాటకొస్తే, నేను గత సీజన్ ఐపీఎల్లో సుమారు 900 పరుగులు చేశాను. అయినప్పటికీ వరల్డ్కప్ టీమ్లో చోటు దక్కకపోతే నేను చేసేది ఒకటే. ఈ టోర్నీకి ఎంపికైన ప్లేయర్లను ఎంకరేజ్ చేస్తూ టీమ్ఇండియాకు మద్దతిస్తా' అని అన్నాడు.
ఇక ప్రస్తుతం తన దృష్టంతా ఐపీఎల్పైనే ఉందన్నాడు గిల్. గుజరాత్ టైటాన్స్ ఫ్రాంచైజీ గురించే ఆలోచిస్తున్నానని తెలిపిన గిల్, జట్టుకు తన అవసరం ఉందని పేర్కొన్నాడు. ఇక ప్రస్తుత సీజన్లో గుజరాత్ జట్టుకు గిల్ కెప్టెన్సీ వహిస్తున్నాడు. ఈ సీజన్లో గుజరాత్ 9 మ్యాచ్ల్లో 4 మ్యాచ్లు గెలిచింది. దీంతో 8 పాయింట్లతో పట్టికలో 7వ స్థానంలో కొనసాగుతోంది.
'మంజ్రేకర్ T20 వరల్డ్కప్ టీమ్'- మాజీ క్రికెటర్ జట్టులో విరాట్కు నో ప్లేస్ - 2024 T20 World Cup
'అలా చేయకు అని రాబిన్ను వేడుకున్నా- ఆ తప్పిదం వల్ల ఓడిపోయాం' - Anil Kumble IPL
