బుమ్రా @ 400 వికెట్లు - అరుదైన ఫీట్ అందుకున్న స్టార్ బౌలర్ - Ind vs Ban Test Series 2024

Bumrah 400 Wickets : బంగ్లాదేశ్​తో జరుగుతున్న తొలి టెస్టులో టీమ్ఇండియా పేసర్ బుమ్రా అరుదైన మైలురాయి అందుకున్నాడు. అంతర్జాతీయ క్రికెట్​లో మూడు ఫార్మాట్​లలో కలిపి 400 వికెట్లు పూర్తి చేశాడు.

Bumrah 400 Wickets : బంగ్లాదేశ్​తో జరుగుతున్న తొలి టెస్టులో టీమ్ఇండియా పేసర్ జస్ప్రీత్ బుమ్రా అదరగొట్టాడు. తొలి ఇన్నింగ్స్​లో నాలుగు వికెట్లతో బంగ్లా పతనాన్ని శాసించాడు. ఈ క్రమంలోనే బుమ్రా అరుదైన మైలురాయి అందుకున్నాడు. బుమ్రా అన్ని అంతర్జాతీయ ఫార్మాట్లలో కలిపి 400 వికెట్లు పూర్తి చేసుకున్నాడు. ఈ మ్యాచ్​లో 36.5వ ఓవర్ వద్ద హసన్ అహ్మద్ వికెట్​తో బుమ్రా ఈ ఫీట్ అందుకున్నాడు. కాగా , ఈ ఫీట్ సాధించిన 6వ టీమ్ఇండియా పేసర్​గా నిలిచాడు. ఈ లిస్ట్​లో దిగ్గజ క్రికెటర్ కపిల్ దేవ్ 687 వికెట్లతో టాప్​లో ఉన్నాడు. ఇక ఓవరాల్​గా భారత్​ నుంచి 400+ వికెట్లు తీసిన 10వ బౌలర్​గానూ బుమ్రా నిలిచాడు.

బుమ్రా కంటే ముందు 400 అంతర్జాతీయ వికెట్లు తీసిన భారత పేసర్లు :

• కపిల్ దేవ్- 687 వికెట్లు
• జహీర్ ఖాన్- 597 వికెట్లు
• జవగల్ శ్రీనాథ్- 551 వికెట్లు
• మహ్మద్ షమీ- 448 వికెట్లు
• ఇషాంత్ శర్మ- 434 వికెట్లు
• జస్ప్రీత్ బుమ్రా-401 వికెట్లు

సూపర్ సక్సెస్ బౌలర్
2016లో అంతర్జాతీయ క్రికెట్​లో అరంగేట్రం చేసిన బుమ్రా అప్పట్నుంచి టీమ్ఇండియాకు కీలకంగా మారాడు. మూడు ఫార్మాట్లలోనూ టీమ్ఇండియా విజయాల్లో కీలక పాత్ర పోషించాడు. టీమ్ఇండియా చరిత్రలో నాణ్యమైన బౌలర్లలో ఒకడిగా ఎదిగాడు. బుల్లెట్​లాంటి యార్కర్లు, టెక్నిక్​తో ప్రత్యర్థులకు చుక్కలు చూపిస్తున్నాడు. ముఖ్యంగా డెత్ ఓవర్లలో అయితే పరుగుల కట్టడి చేస్తూ వికెట్ల తీయడంలో దిట్ట అని చెప్పొచ్చు. ఇక ఇప్పటివరకు అన్ని ఫార్మాట్లలో కలిపి 196 మ్యాచ్​ల్లో 401* వికెట్లు పడగొట్టాడు. అందులో టెస్టు (163), వన్డే (149), టీ20 (89) ఉన్నాయి. కాగా, వన్డేల్లో అత్యంత వేగంగా 100 వికెట్లు, టీ20ల్లో అత్యంత వేగంగా 50 వికెట్లు తీసిన రికార్డు బుమ్రా పేరిటే ఉంది.

𝟒𝟎𝟎 𝐰𝐢𝐜𝐤𝐞𝐭𝐬 𝐟𝐨𝐫 𝐈𝐧𝐝𝐢𝐚 💥💥

A milestone to savour! @Jaspritbumrah93 has picked up his 400th wicket for #TeamIndia.

Hasan Mahmud is caught in the slips and Bangladesh are now 112-8.#INDvBAN @IDFCFIRSTBank pic.twitter.com/HwzUaAMOBt

— BCCI (@BCCI) September 20, 2024

ఇక మ్యాచ్ విషయానికొస్తే, ఫస్ట్ ఇన్నింగ్స్​లో టీమ్ఇండియా 376 పరుగులకు ఆలౌట్ కాగా, బంగ్లాదేశ్ 149 పరుగులకే కుప్పకూలింది. దీంతో తొలి ఇన్నింగ్స్​ ముగిసేసరికి భారత్​కు 227 పరుగుల ఆధిక్యం లభించింది.