ఘర్షణల మధ్య సాగునీటి సంఘాల ఎన్నికలు - వాగ్వాదంతో కొన్నిచోట్ల వాయిదా

రాష్ట్రంలో చెదురుమదురు ఘటనల మధ్య సాగునీటి సంఘాల ఎన్నికలు - పలుచోట్ల ఎన్డీఏ అభ్యర్థుల ఏకగ్రీవాలు

Irrigation Union Elections in AP: రాష్ట్రంలో సుదీర్ఘ విరామం తర్వాత నిర్వహించిన సాగునీటి సంఘాల ఎన్నికలు పలుచోట్ల వాగ్వాదాలకు దారి తీశాయి. కొన్నిచోట్ల ఎన్నికలు ఏకగ్రీవం కాగా మరికొన్నిచోట్ల చెదురుమదురు ఘటనలతో వాయిదా పడ్డాయి. ఎన్టీఆర్ జిల్లా నందిగామలో 4 సాగునీటి సంఘాలకు ఎన్నికలు నిర్వహించారు. మైలవరం మండలం గణపవరంలో ఎన్నికల సమాచారం లేదంటూ టీడీపీలోని ఓ వర్గం ఓటింగ్‌ ప్రక్రియను అడ్డుకుంది. ఎన్నికను వాయిదా వేసిన అధికారులు తదుపరి ప్రక్రియను త్వరలో ప్రకటిస్తామన్నారు.

కృష్ణా జిల్లా పెందూరులో జనసేనలో ఇరు వర్గాలు నామినేషన్లు వేయటం వివాదాస్పదమైంది. పోలీసులు జోక్యం చేసుకుని ఇరువర్గాల్ని సముదాయించారు. కృష్ణా జిల్లా పెదముత్తేవి సాగునీటి సంఘం అధ్యక్షుడిగా టీడీపీ బలపర్చిన చంద్రశేఖరరావు ఏకగ్రీవంగా ఎన్నికయ్యారు. వైఎస్సార్ జిల్లా గుండ్లకుంట సాగునీటి సంఘం ఎన్నికల్లో వైఎస్సార్సీపీ, టీడీపీ వర్గాల మధ్య వాగ్వాదం జరిగింది. వీడియో తీస్తున్న మీడియా సిబ్బందిపైనా వైఎస్సార్సీపీ నాయకుడు దుర్భాషలకు దిగారు. పోలీసులు వచ్చి పరిస్థితిని అదుపు చేశారు.

వైఎస్సార్సీపీ మాజీ ఎమ్మెల్యే హంగామా: కర్నూలు జిల్లా పార్లపల్లెలో సాగునీటి సంఘం ఎన్నికలకు వైఎస్సార్సీపీ మాజీ ఎమ్మెల్యే చెన్నకేశవరెడ్డి గడువు ముగిసిన తర్వాత నామినేషన్‌ వేస్తానంటూ హడావుడి చేశారు. పోలీసులు అడ్డుకోగా చెన్నకేశవరెడ్డి కాసేపు అక్కడేకూర్చుని హంగామా సృష్టించారు. అన్నమయ్య జిల్లా రాజంపేట పరిధిలోని సాగునీటి నీటిసంఘం ఎన్నికల్లో ఎక్కువ చోట్ల కూటమి అభ్యర్థులు ఏకగ్రీవమయ్యారు. శ్రీ సత్యసాయి జిల్లా మడకశిర నియోజకవర్గంలో ఆరుగురు ఏకగ్రీవమయ్యారు. నెల్లూరు జిల్లా పెద్దఅబ్బిపురంలో అధికారులు నామినేషన్‌ తిరస్కరించారంటూ జనసేన నాయకులు ఆందోళనకు దిగడం స్వల్ప ఉద్రిక్తతకు దారి తీసింది.

కోనసీమ జిల్లా ముమ్మిడివరం నియోజకవర్గంలో 21 సంఘాలకుగాను 18 చోట్ల టీడీపీ, 3 చోట్ల జనసేన నాయకులు ఏకగ్రీవమయ్యారు. విజేతలను ఎమ్మెల్యే దాట్ల సుబ్బరాజు అభినందించారు. అనకాపల్లి జిల్లా ఏ.కొత్తపల్లిలో ఉద్రిక్తత తలెత్తింది. రెడ్డివాని చెరువు సాగునీటి సంఘం ఎన్నికలో కూటమి నేతలు, వైఎస్సార్సీపీ నాయకులకు మధ్య ఘర్షణ జరిగింది. పోలీసులు ఇరువర్గాలను చెదరగొట్టి ఎన్నికను వాయిదా వేశారు. శ్రీకాకుళం జిల్లా పోలయ్యవలసలో టీడీపీ, వైఎస్సార్సీపీ వర్గాల ఘర్షణకు దిగగా పోలీసులు వారిని అదుపులోకి తీసుకున్నారు.

పార్వతీపురం మన్యం జిల్లా నవగం నీటి సంఘం ఎన్నికలు ఘర్షణతో వాయిదా పడ్డాయి. పనుకువలస సంఘం పరిధిలో ఎన్నికల సామాగ్రిని దుండగులు ఎత్తుకెళ్లడంతో 5 స్థానాల ఎన్నికలు వాయిదా వేస్తున్నట్లు సబ్‌ కలెక్టర్‌ యశ్వంత్‌రెడ్డి తెలిపారు. విజయనగరం జిల్లా బి.రాజేరులో రెండు నీటి సంఘాలు, దత్తిరాజేరు మండలం పెదకాద చిట్టిగెడ్డ సాగునీటి సంఘం ఎన్నికను ఘర్షణల కారణంగా అధికారులు వాయిదా వేశారు.