BRS Leader KTR Sent Legal Notice to Union Minister Bandi Sanjay : కేంద్ర మంత్రి బండి సంజయ్కు తెలంగాణ బీఆర్ఎస్ కార్యనిర్వాహక అధ్యక్షుడు కేటీఆర్ లీగల్ నోటీసులు పంపారు. తనపై నిరాధారమైన ఆరోపణలు చేశారని, తనకు పరువుకు నష్టం కలిగేంచేలా వ్యాఖ్యలు చేశారంటూ నోటీసులు ఇచ్చారు. చేసిన నిరాధార వ్యాఖ్యలకు వారం రోజుల్లోగా బేషరతుగా క్షమాపణలు చెప్పకపోతే పరువు నష్టం దావా వేస్తానని కేటీఆర్ హెచ్చరించారు.
బండి సంజయ్ చేసిన వ్యాఖ్యలను నిరూపించాలి : ఈ నెల 19న బండి సంజయ్ మీడియాతో మాట్లాడుతూ తనపై తప్పుడు ఆరోపణలు చేశారని డ్రగ్స్ తీసుకుంటానని, బీఆర్ఎస్ అధికారంలో ఉన్నప్పుడు ఫోన్ ట్యాపింగ్‌కు పాల్పడ్డానని అన్నారని కేటీఆర్ పేర్కొన్నారు. ఫోన్ ట్యాపింగ్ కేసుల నుంచి తప్పించుకోవటానికి ముఖ్యమంత్రి రేవంత్ రెడ్డితో రహస్యంగా కలిసిపోయానంటూ బండి సంజయ్ చేసిన వ్యాఖ్యలను నిరూపించాలని డిమాండ్‌ చేశారు. కేవలం తనను అప్రతిష్ట పాలు చేయాలన్న దురుద్దేశతంతోనే ఇలాంటి వ్యాఖ్యలు చేశారని ఆక్షేపించారు. రాజకీయంగా ఎదుర్కోలేకే ఇలాంటి ఆరోపణలు చేస్తున్నారని ఆయన ఆగ్రహం వ్యక్తం చేశారు. బహిరంగ క్షమాపణ చెప్పకుంటే క్రిమినల్ ప్రొసీడింగ్స్‌ను ఎదుర్కోవాల్సి వస్తుందని కేటీఆర్ లీగల్ నోటీసులో హెచ్చరించారు.
తాటాకు చప్పళ్లకు భయపడేది లేదు : కేటీఆర్ లీగల్ నోటీసుపై బండి సంజయ్ తీవ్రంగా స్పందించారు. లీగల్ నోటీసుతో భయపెట్టాలని చూస్తే ఇక్కడ భయపడే వారెవరూ లేరని అన్నారు. తనను రాజకీయంగా ఎదుర్కొనే దమ్ములేకే లీగల్ నోటీస్ ఇచ్చారన్న బండి సంజయ్ తాటాకు చప్పళ్లకు భయపడేది లేదని అన్నారు. తనపై తొలుత వ్యక్తిగత ఆరోపణలు చేసి అవమానించింది కేటీఆరేనన్న బండి అందుకు బదులుగానే తాను మాట్లాడానని స్పష్టం చేశారు. తాను చట్టాన్ని, న్యాయాన్ని గౌరవించే వ్యక్తినని, లీగల్ నోటీసులకు నోటీసులతోనే బదులిస్తానని పేర్కొన్నారు.
