AP ASSEMBLY SESSIONS 2024 : ఆంధ్రప్రదేశ్ 16వ శాసనసభ ఉదయం 9:46 నిముషాలకు ప్రారంభమైంది. ముందుగా ప్రొటెం స్పీకర్గా గోరంట్ల బుచ్చయ్యచౌదరిని నియమిస్తూ గవర్నర్‌ ఇచ్చిన ఉత్తర్వులను అసెంబ్లీ కార్యదర్శి చదివి వినిపించారు. అనంతరం సభ్యులకు ప్రమాణ స్వీకార సమయంలో అనుసరించాల్సిన నియమాలను, పద్ధతులను సూచించిన బుచ్చయ్య ఆ తర్వాత వారితో ప్రమాణస్వీకారం చేయించారు. ముందుగా సభానాయకుడు, సీఎం చంద్రబాబు ఎమ్మెల్యేగా ప్రమాణం తీసుకున్నారు. తర్వాత ప్రొటెం స్పీకర్ గోరంట్ల బుచ్చయ్యచౌదరితో కరచాలనం చేసిన ఆయన అనంతరం సభ్యులందరికీ నమస్కరిస్తూ తన స్థానంలో ఆశీనులయ్యారు.
Pawan Kalyan Take Oath As MLA : చంద్రబాబు తర్వాత డిప్యూటీ సీఎం పవన్‌కల్యాణ్‌ ప్రమాణ స్వీకారం చేశారు. అనంతరం ప్రొటెం స్పీకర్ బుచ్చయ్యతో కరచాలనం చేసి సభ్యులందరికీ నమస్కరించి తన స్థానంలో కూర్చున్నారు. పవన్ తర్వాత అక్షర క్రమంలో మిగిలిన అమాత్యులు వరుసగా శాసనసభ్యులుగా ప్రమాణ స్వీకారం చేశారు.
మత్స్యకార వేషధారణలో అసెంబ్లీకి : నర్సాపురం జనసేన పార్టీ ఎమ్మెల్యే బొమ్మిడి నాయకర్ మత్స్యకార వేషధారణలో అసెంబ్లీకి వచ్చారు. ఉమ్మడి పశ్చిమగోదావరి జిల్లా నర్సాపురం నియోజకవర్గం నుంచి జనసేన పార్టీ తరపున ఎమ్మెల్యేగా గెలుపొందారు. చేప, వలతో సాంప్రదాయ మత్స్యకారునిగా వినూత్న రీతిలో ఎమ్మెల్యే బొమ్మిడి నాయకర్ అసెంబ్లీలోకి అడుగు పెట్టారు.
కూటమి నేతలు నామినేషన్ దాఖలు : 172 మంది ఎమ్మెల్యేల ప్రమాణస్వీకారం అనంతరం శాసనసభ రేపటికి వాయిదా పడింది. ముగ్గురు ఎమ్మెల్యేలు అందుబాటులో లేకపోవడం, ఇతరత్రా కారణాల వల్ల ప్రమాణం చేయలేదు. రేపు ఉదయం పదిన్నర గంటలకు శాసనసభ తిరిగి ప్రారంభం కానుంది. జీవీ ఆంజనేయులు, పితాని సత్యనారాయణ, వనమాడి వెంకటేశ్వరరావులు తొలి సెషన్లో ప్రమాణం చేయనున్నారు. సభ్యుల ప్రమాణం తర్వాత స్పీకర్ ఎన్నిక ప్రక్రియ జరగనుంది.
రేపు ఉదయం 11 గంటలకు శాసనసభ స్పీకర్గా అయ్యన్నపాత్రుడుని ఎన్నుకోనున్నారు. శాసనసభ స్పీకర్గా అయ్యన్నపాత్రుడు తరపున కూటమి నేతలు నామినేషన్ దాఖలు చేశారు. కూటమి నేతలు ఉపముఖ్యమంత్రి పవన్ కల్యాణ్, మంత్రులు నారా లోకేశ్ పలువురు మంత్రులు కలిసి అసెంబ్లీ కార్యదర్శికి నామినేషన్ పత్రాలు అందజేశారు. ఎమ్మెల్యేలకు శాసనసభ వ్యవహారాల కార్యాలయం బ్యాగు కిట్ అందచేశారు. బ్యాగులో అసెంబ్లీ రూల్స్ బుక్, రాజ్యాంగ పుస్తకాలు ఉన్నాయి.
