How to Make Tasty Potato Rice at Home: ఉద్యోగులకైనా, స్కూల్కి వెళ్లే పిల్లలకైనా లంచ్ బాక్స్ పెట్టాలంటే అమ్మలకు కొద్దిగా కష్టమైన వ్యవహారమే. ఎందుకంటే రోజూ ఒకటే రకమైనా అన్నం, కూరలు తినాలంటే బోర్ కొడుతుంది. పెద్దలు ఏదో ఒక విధంగా తిన్నా.. పిల్లల మాత్రం తిననని మొండికేస్తారు. కొన్ని సందర్భాల్లో పెట్టిన బాక్స్ను అలానే తిరిగి తీసుకొస్తారు కూడా. అలాగని ఏదైనా వెరైటీ చేద్దామని అనుకున్నా అది చేయడం రాకనో.. లేదంటే ఎక్కువ పదార్థాలు అవసరం అనే కారణంతో ఆ ప్రయత్నాలను విరమించుకుంటారు. మరి మీరు కూడా అలానే చేస్తున్నారా? అయితే ఇప్పుడూ ఆ అవసరం లేదు. కేవలం ఇంట్లో లభించే అతి తక్కువ పదార్థాలతో ఎంతో రుచికరంగా ఉండే ఆలూ రైస్ ప్రిపేర్ చేసుకోవచ్చు. దీని కోసం పెద్దగా కష్టపడనవసరం లేదు. మరి ఆ పొటాటో రైస్ను ఎలా ప్రిపేర్ చేసుకోవాలో ఈ స్టోరీలో చూద్దాం..
కావాల్సిన పదార్థాలు:
- బంగాళదుంపలు - 2
- నూనె - 4 టేబుల్ స్పూన్లు
- దాల్చిన చెక్క - చిన్న ముక్క
- లవంగాలు - 3
- దంచిన యాలకులు - 2
- మిరియాలు - అర టీ స్పూన్
- ఆవాలు - అర టీ స్పూన్
- జీలకర్ర - అర టీస్పూన్
- సోంపు - అర టీ స్పూన్
- జీడిపప్పు లేదా పల్లీలు - పావు కప్పు
- కరివేపాకు - 2 రెమ్మలు
- పచ్చిమిర్చి - 2
- అల్లం తరుగు - 1 టేబుల్ స్పూన్
- ఉల్లిపాయ - 1
- ఉప్పు - రుచికి సరిపడా
- ఉడికించిన అన్నం - 1 కప్పు
- పచ్చికొబ్బరి తురుము - పావు కప్పు
- కొత్తిమీర తరుగు - కొద్దిగా
- మిరియాల పొడి - అర టీ స్పూన్(ఆప్షనల్)
తయారీ విధానం:
- ముందుగా బంగాళదుంపలను చెక్కు తీసి ముక్కలుగా కట్ చేసి పక్కన ఉంచాలి. అలాగే ఉల్లిపాయ, పచ్చిమిర్చిని కూడా ముక్కలుగా చేసుకోవాలి.
- ఇప్పుడు స్టవ్ ఆన్ చేసి పాన్ పెట్టి నూనె వేసి వేడి చేసుకోవాలి. ఆయిల్ హీట్ అయిన తర్వాత ఆలు ముక్కలు వేసి మీడియం ఫ్లేమ్ మీద క్రిస్పీగా లైట్ గోల్డెన్ బ్రౌన్ కలర్ వచ్చే వరకు వేయించుకోవాలి. అలా కలర్ మారిన తర్వాత ఓ ప్లేట్లోకి తీసుకోవాలి.
- ఇప్పుడు అదే నూనెలో దాల్చిన చెక్క, లవంగాలు, దంచిన యాలకులు, మిరియాలు వేసి ఫ్రై చేసుకోవాలి.
- అవి వేగిన తర్వాత ఆవాలు, జీలకర్ర, సోంపు వేసి మంచి వాసన వచ్చే వరకు ఫ్రై చేసుకోవాలి.
- అనంతరం జీడిపప్పు లేదా పల్లీలు, కరివేపాకు, పచ్చిమిర్చి చీలికలు, అల్లం తరుగు వేసి ఫ్రై చేసుకోవాలి.
- జీడిపప్పు లేదా పల్లీలు ఫ్రై అయిన తర్వాత తరిగిన ఉల్లిపాయ, రుచికి సరిపడా ఉప్పు వేసి ఉల్లిపాయ ముక్కలు రంగు మారే వరకు వేయించుకోవాలి.
- ఉల్లిపాయలు రంగు మారిన తర్వాత ఉడికించిన అన్నం, పచ్చికొబ్బరి తురుము, కొత్తిమీర తరుగు, వేయించిన ఆలూ వేసి హై ఫ్లేమ్ మీద బాగా కలుపుకోవాలి. చివరకు మిరియాల పొడి, మరికొంచెం కొత్తిమీర తరుగు వేసి టాస్ చేసి సర్వ్ చేసుకోవాలి.
- అంతే ఎంతో టేస్టీగా టమ్మీకి హ్యాపీగా అనిపించే ఆలూ రైస్ రెడీ.
- దీన్ని వేడిగా లేదా చల్లగా ఎలా తిన్నా టేస్ట్ అద్దిరిపోతుంది. ఆనియన్ రైతాతో తింటే రుచి మరో లెవల్. నచ్చితే మీరూ ట్రై చేయండి.
మీ పిల్లలు కరివేపాకు తినడం లేదా? - ఇలా రైస్ చేసి పెడితే మెతుకు మిగల్చరు - పైగా ఆరోగ్యం కూడా!
పర్ఫెక్ట్ లంచ్ బాక్స్ రెసిపీ "ఆమ్లా రైస్" - ఇలా చేశారంటే మెతుకు మిగలదు!
మీ పిల్లలకు అద్దిరిపోయే లంచ్ బాక్స్ - పది నిమిషాల్లోనే "గోంగూర రైస్"!
