How to Make Sponge Dosa Recipe : చాలా మందికి మృదువుగా, కమ్మగా ఉండే దోశలంటే ఎంతో ఇష్టం. కొంతమంది మెత్తటి దోశలు తినడానికే హోటల్స్కి వెళుతుంటారు. అయితే, కొన్ని టిప్స్ పాటిస్తూ చేస్తే ఇంట్లోనే స్పాంజ్ దోశలను ప్రిపేర్ చేసుకోవచ్చు. పైగా ఈ స్టోరీలో చెప్పిన విధంగా చేస్తే.. నూనె, పప్పులు, సోడా, పెరుగు వంటివి ఏవీ అవసరం ఉండవు. బ్రేక్ఫాస్ట్లో పిల్లలు మెత్తటి దోశలను ఎంతో ఇష్టంగా తింటారు. మరి ఇక ఆలస్యం చేయకుండా సింపుల్గా స్పాంజ్ దోశలను ఎలా చేయాలో ఇప్పుడు చూద్దాం..
స్పాంజ్ దోశకి కావాల్సిన పదార్థాలు :
- బియ్యం-ఒకటిన్నర కప్పు
- ఒక స్పూను - మెంతులు
- మరమరాలు-3 కప్పులు
- ఉప్పు రుచికి సరిపడా
తయారీ విధానం :
- ముందుగా బియ్యం, మెంతులను ఒక గిన్నెలోకి తీసుకుని శుభ్రంగా కడగాలి. ఆపై వాటర్ పోసి 5 గంటలపాటు నానబెట్టుకోవాలి.
- ఇప్పుడు ఒక మిక్సీ గిన్నెలో నానబెట్టిన బియ్యం వేసుకుని.. కొద్దికొద్దిగా నీళ్లు యాడ్ చేసుకుంటూ మెత్తగా పేస్ట్ చేసుకోవాలి. పిండి మిశ్రమాన్ని పెద్ద గిన్నెలో పోసుకోవాలి.
- ఇప్పుడు మరో బౌల్లో మరమరాలను నీటిలో వేసుకుని కాసేపు నానబెట్టుకోండి. ఆపై వాటిలోని నీటిని పిండేసి ఒక మిక్సీ గిన్నెలోకి తీసుకోండి. ఇందులో కొన్ని నీళ్లు యాడ్ చేసి మెత్తగా గ్రైండ్ చేసుకోండి.
- మరమరాల పేస్ట్ని బియ్యం పిండిలో వేసుకుని చేతితో బాగా కలపండి. తర్వాత గిన్నెపై మూత పెట్టి 8 గంటల పాటు పులియబెట్టాలి.
- దోశలు వేసుకునే ముందు పిండిలో రుచికి సరిపడా ఉప్పు వేసుకుని కలుపుకోవాలి. (పిండి మరీ చిక్కగా ఉంటే కొన్ని నీళ్లు పోసి కలుపుకోవచ్చు)
- తర్వాత స్టౌపై దోశ పెనం పెట్టుకొని వేడి చేసుకోవాలి. అది కాస్త హీట్ అయ్యాక కొద్దిగా పిండిని తీసుకొని మందపాటి దోశలా వేసుకోవాలి.
- సెట్ దోశ టైప్ మాదిరిగా వేసుకున్నాక దానిపై మూతపెట్టి కొద్దిసేపు ఉడకనివ్వాలి. తర్వాత దోశను గరిటెతో మరోవైపు తిప్పి కాసేపు కాల్చుకుని ప్లేట్లోకి తీసుకోవాలి.
- అంతే ఇలా సింపుల్గా మిగిలిన పిండితో దోశలు చేసుకుంటే సరిపోతుంది. ఎంతో మృదువైన దోశలు మీ ముందుంటాయి.
- ఈ దోశల్ని కొబ్బరి చట్నీ/పల్లీల చట్నీ, టమాటా చట్నీతో కలిపి తీసుకుంటే ఎంతో రుచిగా ఉంటాయి.
- నచ్చితే ఇలా దోశలను ఇంట్లో ట్రై చేయండి.
టేస్టీ టమాటా చట్నీకి కావాల్సి పదార్థాలు :
- ఆయిల్
- వెల్లుల్లి రెబ్బలు - 5
- ఉప్పు - రుచికి సరిపడా
- టమాటాలు - 3 సన్నగా కట్ చేసి వేయాలి
- చింతపండు - చిన్న సైజు నిమ్మకాయంత
- ఎండు మిరపకాయలు - ఆరు నుంచి ఏడు
- ఆవాలు-టీస్పూన్
- మినప్పప్పు-ఆఫ్ స్పూన్
- కరివేపాకు
- ఒక ఎండు మిర్చి
తయారీ విధానం..
- ముందుగా స్టౌ మీద పాన్ పెట్టి అందులో ఆయిల్ వేసి వేడి చేయండి.
- ఆపై కచ్చాపచ్చాగా చేసిన వెల్లుల్లి వేసి రంగు మారే వరకు ఫ్రై చేయండి. ఇప్పుడు ఎండుమిర్చిలు వేసి ఫ్రై చేయండి.
- తర్వాత టమాటా ముక్కలు వేసి మెత్తబడే వరకు మగ్గించండి.
- టమాటాలు మెత్తగా ఉడికిన తర్వాత చింతపండు వేసి కాసేపు ఫ్రై చేయండి
- ఆపై స్టౌ ఆఫ్ చేసి ఈ మిశ్రమాన్ని పూర్తిగా చల్లారనివ్వాలి.
- ఇప్పుడు మిక్సీ జార్లో టమాటా మిశ్రమం వేసుకోవాలి. అందులోని కొద్దిగా ఉప్పు వేసి మిక్సీ పట్టుకోవాలి.
- తర్వాత స్టౌమీద పాన్ పెట్టి రెండు మూడు టేబుల్ స్పూన్ల నూనె వేయండి
- ఆయిల్ వేడెక్కిన తర్వాత ఆఫ్ టీస్పూన్ ఆవాలు, ఆఫ్ స్పూన్ మినప్పప్పు వేయాలి.
- తర్వాత కరివేపాకు, ఒక ఎండు మిర్చి వేసి వేపాలి.
- పోపు రెడీ అయిన తర్వాత ఇందులో.. మిక్సీ పట్టుకున్న టమాటా మిశ్రమం వేయాలి.
- నిమిషం పాటు అటూ ఇటూ కలిపిన తర్వాత చక్కని, చిక్కని టమాటా చట్నీ తయారవుతుంది.
- ఈ టమాటా చట్నీతో వేడివేడి స్పాంజ్ దోశలు తింటే టేస్ట్ అద్బుతంగా ఉంటుంది.
ఇవి కూడా చదవండి :
చలికాలం ఇడ్లీ/దోశ పిండి చక్కగా పులియాలంటే - పప్పు నానబెట్టేటప్పుడు వీటిని ఒక స్పూన్ కలిపితే చాలట!
సూపర్ టేస్టీ "సగ్గుబియ్యం దోశలు" - నిమిషాల్లో చేసుకోండిలా! - అందరికీ చాలా చాలా నచ్చేస్తుంది!
