How to Make Bommidayila Pulusu : చాలా మంది ఫిష్ ఫ్రై, పులుసు లొట్టలేసుకుంటూ తింటారు. కొర్రమీను, బంగారు తీగ, బొచ్చె ఇలా చేపల్లో చాలా రకాలే ఉంటాయి. వీటిలో బొమ్మిడాయిలు అంటే ఎక్కువ మందికి ఇష్టం. ఇవి ఎంతో రుచికరంగా ఉంటాయి. బొమ్మిడాయిలతో ఫ్రై, ఇగురు, పులుసు ఏది చేసినా టేస్ట్ అద్భుతంగా ఉంటుంది. అయితే, ఎక్కువ మందికి బొమ్మిడాయిలను సరిగా క్లీన్ చేయడం రాదు. దీంతో బొమ్మిడాయిల పులుసు చేయడానికి సాహసం చేయరు. వీటిని బాగా శుభ్రం చేయకపోతే కూర నీచు వాసన వచ్చి తినాలని అనిపించదు. అందుకే క్లీన్ చేసే విషయంలో జాగ్రత్తగా ఉండాలి. అయితే, ఈ స్టోరీలో చెప్పిన విధంగా బొమ్మిడాయిలను క్లీన్ చేసి పులుసు చేస్తే ఎలాంటి స్మెల్ లేకుండా కర్రీ టేస్ట్ సూపర్గా ఉంటుంది. మరి ఇక ఆలస్యం చేయకుండా బొమ్మిడాయిల పులుసు ఎలా చేయాలో ఇప్పుడు చూద్దాం.
కావాల్సిన పదార్థాలు :
- బొమ్మిడాయిలు - కేజీ
- ఉల్లిపాయలు - 6
- పచ్చిమిర్చి - 8
- కొత్తిమీర తరుగు - కొద్దిగా
- చింతపండు - 100 గ్రాములు
- నూనె - 4 టేబుల్స్పూన్లు
- ధనియాలు - 2 టేబుల్స్పూన్లు
- మెంతులు - టేబుల్స్పూన్
- జీలకర్ర - టేబుల్స్పూన్
- వెల్లుల్లి - 2
- పసుపు - అరటీస్పూన్
- కారం - రుచికి సరిపడా
- ఉప్పు - రుచికి సరిపడా
- అల్లం పేస్ట్ - 2 టేబుల్స్పూన్లు
తయారీ విధానం :
- ముందుగా బొమ్మిడాయిల చేపలను శుభ్రంగా కడిగి, పొలుసులు లేకుండా కత్తితో కాస్త గీరుకోవాలి.
- ఆపై కొద్దిగా ఉప్పు వేసి శుభ్రంగా కడుక్కోవాలి. చివరిగా కొద్దిగా పసుపు, నిమ్మకాయ రసం పిండి మరోసారి వాష్ చేసుకుని పక్కన పెట్టుకోవాలి. ఇలా రెండుమూడు సార్లు క్లీన్ చేసుకుంటే ఎలాంటి నీచు వాసన ఉండదు.
- ఇప్పుడు ఉల్లిపాయలు సన్నగా కట్ చేసుకోవాలి. అలాగే పచ్చిమిర్చి మధ్యలోకి కట్ చేసి పక్కన పెట్టుకోవాలి.
- చింతపండు ఓ 15 నిమిషాలు నీటిలో నానబెట్టుకోండి.
- తర్వాత ఒక మిక్సీ గిన్నెలో ధనియాలు, మెంతులు, జీలకర్ర, పొట్టు తీసిన వెల్లుల్లి వేసి కచ్చపచ్చాగా గ్రైండ్ చేసుకోండి. అవసరమైతే నీళ్లు పోసుకోవచ్చు.
- ఇప్పుడు స్టవ్పై బొమ్మిడాయిల పులుసు చేయడం కోసం గిన్నె పెట్టండి. ఇందులో నూనె పోసి వేడి చేయండి. ఆపై ఉల్లిపాయ, పచ్చిమిర్చి ముక్కలు వేసి ఆనియన్స్ గోల్డెన్ బ్రౌన్ కలర్ వచ్చేంత వరకు ఫ్రై చేసుకోండి.
- ఆపై గ్రైండ్ చేసిన ధనియాలు-వెల్లుల్లి పేస్ట్ వేసి కలపండి. అనంతరం పసుపు, ఉప్పు, కారం, అల్లం పేస్ట్ వేసి ఫ్రై చేయండి.
- ఇప్పుడు చిక్కటి చింతపండు పులుసు పోసుకుని కలపండి.
- పులుసులో నూనె పైకి తేలిన తర్వాత సరిపడా నీళ్లు యాడ్ చేసి, రుచికి సరిపడా ఉప్పు వేయండి.
- ఇప్పుడు గిన్నెపై మూత పెట్టి చింతపండు పులుసు బాగా మరిగించుకోండి.
- వేడివేడి పులుసులో శుభ్రంగా కడిగిన బొమ్మిడాయిలు వేసుకోండి.
- ఇప్పుడు గిన్నెపై మూత పెట్టి 10 నిమిషాలు ఉడికించుకోండి. ఈ బొమ్మిడాయిలు ఉడికిన తర్వాత గరిటెతో కలపకూడదు. ఎందుకంటే ముక్కలు విరిగిపోయే అవకాశం ఉంటుంది.
- ఇప్పుడు పులుసులో కాస్త కొత్తిమీర తరుగు చల్లి స్టౌ ఆఫ్ చేయండి.
- అంతే ఇలా సింపుల్గా చేసుకుంటే రుచికరమైన బొమ్మిడాయిల పులుసు మీ ముందుంటుంది!
- వేడివేడి అన్నంతో ఈ పులుసు అద్దిరిపోతుంది.
- ఈ బొమ్మిడాయిల పులుసు నచ్చితే మీరు ఓసారి ఇంట్లో ట్రై చేయండి.
గుంటూరు ఘాటుతో గోంగూర మటన్ - చూస్తేనే నోరూరిపోయేలా!
కేరళ స్టైల్లో కోడిగుడ్డు కర్రీ - కొబ్బరి పాల గ్రేవీతో సూపర్ టేస్ట్
