ఇడ్లీ పిండి చాలు - అమ్మమ్మల నాటి అద్దిరిపోయే "దిబ్బరొట్టె"

హెల్దీ బ్రేక్​ఫాస్ట్​ కోసం చూస్తున్నారా? - దిబ్బరొట్టె బెస్ట్​ ఆప్షన్​!

Andhra Style Dibba Rotti Recipe : సాధారణంగా చాలా మంది వారానికి సరిపడా ఇడ్లీ పిండి రుబ్బుకుని ఫ్రిడ్జ్​లో స్టోర్​ చేసుకుంటుంటారు. ఇలా ఇడ్లీ పిండి రెడీగా ఉంటే ఎప్పటికప్పుడూ చకచకా వేడివేడి ఇడ్లీ తయారు చేసుకోవచ్చు. అయితే, ఇడ్లీ పిండితో ఇడ్లీలు చేసుకోవడం కామన్​. అలా కాకుండా ఓ సారి ఈ స్టోరీలో చెప్పిన విధంగా దిబ్బరొట్టె ట్రై చేయండి. ఈ దిబ్బరొట్టె క్రిస్పీగా ఎర్రగా చూస్తేనే నోరూరిపోతుంది. పైగా దీన్ని ప్రిపేర్​ చేయడం కూడా చాలా సులభం. మరి ఇక ఆలస్యం చేయకుండా సింపుల్​గా దిబ్బరొట్టె ఎలా చేయాలో ఇప్పుడు చూద్దాం.

కావాల్సిన పదార్థాలు :

• ఇడ్లీ పిండి - నాలుగు కప్పులు (సుమారు 350 గ్రాములు)
• ఉప్పు - రుచికి సరిపడా
• జీలకర్ర - టీస్పూన్
• కొద్దిగా నీరు
• నూనె

తయారీ విధానం :

• దిబ్బరొట్టె చేయడానికి అడుగు మందంగా ఉండే కాస్ట్​ ఐరన్ మూకుడు పర్ఫెక్ట్​ సరిపోతుంది. దీనిలో దిబ్బరొట్టె చేస్తే క్రిస్పీగా ఎంతో రుచికరంగా ఉంటుంది. ఒకవేళ మీ దగ్గర కాస్ట్​ ఐరన్​ ముకుడు లేకపోతే మందంగా ఉండే ప్రెషర్​ కుక్కర్ ఉపయోగించవచ్చు.
• ముందుగా 2 టేబుల్​స్పూన్ల ఆయిల్​ మూకుడులో వేసి మొత్తం స్ప్రెడ్​ చేయండి.
• ఆపై ఒక మిక్సింగ్​ బౌల్లో ఇడ్లీ పిండి తీసుకోండి. ఇందులో ఉప్పు, జీలకర్ర, కొద్దిగా వాటర్​ యాడ్​ చేసి గరిటెతో 2 నిమిషాలు బాగా కలపండి.
• ఇప్పుడు స్టవ్​పై ముకుడు పెట్టి 4 టేబుల్​స్పూన్ల ఆయిల్​ వేయండి.
• తర్వాత రెడీ చేసుకున్న ఇడ్లీ పిండి మొత్తం ఒకేసారి పోసేయండి.
• ఇప్పుడు చిన్న టీ గ్లాసులో నీళ్లు పోసి పిండి మధ్యలో ఉంచండి. ఆపై మూకుడుపై మూతపెట్టి లో ఫ్లేమ్​లో 20-25 నిమిషాలు ఉడికించుకోండి. (మధ్యలో టీగ్లాసులో నీళ్లు పెట్టడం వల్ల చక్కగా ఉడుకుతుంది. అలాగే మాడిపోవడానికి ఛాన్స్​ ఉండదు!)
• చక్కగా ఉడికిన దిబ్బరొట్టెను అట్లకాడతో ఒక ప్లేట్లోకి తీసుకోండి. తర్వాత అదే స్టవ్​పై దోశ పాన్​ పెట్టంది. దీనిపై కొద్దిగా ఆయిల్​ వేసి దిబ్బరొట్టె పైభాగం ఉంచండి.
• ఇలా దిబ్బ రొట్టె రెండు వైపులా కాల్చుకోవడం వల్ల చాలా రుచికరంగా ఉంటుంది.
• ఒక 5 నిమిషాల తర్వాత స్టవ్​ ఆఫ్​ చేసి దిబ్బరొట్టె ప్లేట్లోకి తీసుకోండి.
• అంతే ఇలా సింపుల్​గా చేసుకుంటే వేడివేడి టేస్టీ దిబ్బరొట్టె మీ ముందుంటుంది.
• ఈ దిబ్బరొట్టెను బెల్లం పానకం, కొబ్బరి చట్నీతో తింటే టేస్ట్​ అద్దిరిపోతుంది.
• ఇడ్లీ పిండితో చేసే ఈ దిబ్బరొట్టె నచ్చితే మీరు ఓ సారి ఇంట్లో ట్రై చేయండి.