జాబ్​ ఒత్తిడితో ఉద్యోగిని మృతి - వర్క్​ప్లేస్​లో​ ఇలా చేస్తే.. స్ట్రెస్​ను గెటౌట్ అనొచ్చట! - How To Be Happy at Workplace

Tips for Happy Workplace: తీవ్ర పని ఒత్తిడి కారణంగా కోచికి చెందిన 26 ఏళ్ల ఛార్టర్డ్‌ అకౌంటెంట్‌ మృతిచెందిన ఘటన దేశవ్యాప్తంగా చర్చనీయాంశంగా మారింది. ఈ ఘటనపై విచారణ జరుపుతామని కేంద్రం కూడా ప్రకటించింది. ఈ నేపథ్యంలో.. వర్క్​ ప్లేస్​ను హ్యాపీగా ఎలా మార్చుకోవాలి? అనే విషయమై నిపుణులు పలు సూచనలు చేస్తున్నారు.

How To Be Happy at Workplace: ఆఫీసుల్లో చాలా మంది ఒత్తిడికి లోనవుతుంటారు. ఈ ఆఫీసు ఒత్తిడి ఇంట్లోనూ కొనసాగిస్తుంటారు. ఫలితంగా.. దీర్ఘకాలంలో తమకు తెలియకుండానే ఆందోళన, యాంగ్తైటీ వంటి సమస్యల బారిన పడుతుంటారు. తీవ్ర అనారోగ్యాలకు సైతం గురవుతుంటారు. మరి.. దీన్ని అధిగమించేందుకు ఏం చేయాలి అంటే.. వర్క్​ప్లేస్​ను హ్యాపీగా మలుచుకోవడమే అంటున్నారు నిపుణులు. అది కూడా మన చేతుల్లోనే ఉందంటున్నారు! అందుకోసం కొన్ని టిప్స్​ సూచిస్తున్నారు. అవేంటంటే..

ఇలా చేస్తే.. హ్యాపీ వర్క్​ ప్లేస్​:

• వర్క్​ స్ట్రెస్​ నుంచి విముక్తి పొందాలంటే.. మీరు ఏ పని విషయంలో ఒత్తిడికి గురవుతున్నారో ముందుగా గుర్తించగలగాలి. ఈ క్రమంలో అది మీకు భారంగా, మీ ఆలోచన స్థాయికి మించినట్లుగా అనిపిస్తే నిర్మొహమాటంగా "నో" చెప్పడం మంచిది. లేదంటే ఒత్తిడి తప్పదంటున్నారు నిపుణులు.
• ఇచ్చిన పని పూర్తవ్వాలని గంటల తరబడి కూర్చోకుండా.. ఇంపార్టెంట్​ అనిపించిన పనులను ముందు పూర్తి చేసుకోవాలి. తద్వారా సమయానికి పనులు పూర్తయ్యేలా చూసుకోవచ్చు.
• దీనివల్ల మన కోసం మనం కేటాయించుకోవడానికి కాస్త సమయం దొరుకుతుంది. ఒత్తిడిని దూరం చేసుకోవడానికి ఇదీ ఓ మార్గమే అంటున్నారు నిపుణులు.
• నిరంతరాయంగా పనులు చేయడం కాకుండా గంట/రెండు గంటలకోసారి ఓ ఐదు-పది నిమిషాలు విరామం తీసుకోవడం మంచిది.
• తద్వారా మనసుకు కాస్త విశ్రాంతి దొరుకుతుంది. అలాగే ఈ సమయంలో చిన్న చిన్న వ్యాయామాలు చేస్తే శారీరకంగానూ అలసిపోకుండా జాగ్రత్తపడవచ్చని సలహా ఇస్తున్నారు.
• ఎంత పని ఉన్నా.. నిద్ర, ఆహారం విషయాల్లో అస్సలు రాజీ పడకూడదు. ఎందుకంటే ఈ రెండూ కూడా ఒత్తిడిని దూరం చేసి ఆరోగ్యాన్ని చేరువ చేసేందుకు దోహదం చేస్తాయంటున్నారు.
• పని ప్రదేశంలో అటు కొలీగ్స్‌తో, ఇటు పైఅధికారులతో ఎంత ట్రాన్స్పరెంట్​గా ఉంటే అంత మంచిదంటున్నారు నిపుణులు.
• ఈ క్రమంలో మీకు భారంగా అనిపించిన పనులు, ఇతర విషయాల గురించి నిర్మొహమాటంగా మాట్లాడచ్చని.. దీనివల్లా చాలావరకు ఒత్తిడి తగ్గుతుందని చెబుతున్నారు.
• యోగా, ధ్యానం, శ్వాస సంబంధిత వ్యాయామాలు.. వంటివి కూడా ఒత్తిడిని చిత్తు చేసే సాధనాలే! కాబట్టి వీటిని రోజూ సాధన చేయడం మంచిదని సూచిస్తున్నారు.

సంస్థలూ ఇలా చేయాలి: ఇలా ఉద్యోగులే కాదు.. సంస్థలూ తమ ఉద్యోగుల ఆరోగ్యం విషయంలో జాగ్రత్త వహించాల్సి ఉంటుందంటున్నారు. ఈ క్రమంలో ఉద్యోగులపై అదనపు పని భారాన్ని తగ్గించడంతోపాటు వేళకు పని పూర్తి చేసేలా వాళ్లను ప్రోత్సహించాలి. వారిలోని ఒత్తిడిని దూరం చేసేందుకు సంబంధిత నిపుణులతో ప్రత్యేక సెషన్స్‌ నిర్వహించడం, అప్పుడప్పుడూ వినోద కార్యక్రమాల్ని ఏర్పాటుచేయడం.. వంటివీ వారికి మేలు చేస్తాయంటున్నారు.