Mutton Bucket Biryani at Home: "దసరా వచ్చిందయ్యా.. సరదా తెచ్చిందయ్యా" అంటూ పిల్లలు, పెద్దలు అనే తేడా లేకుండా అందరూ సరదగా గడుపుతుంటారు. ఇక నవరాత్రుల వేళ అమ్మవారిని దర్శించుకోవడం, పిండి వంటలు చేసుకోవడం కామన్. అయితే కేవలం పండగ నాడు పిండి వంటలు మాత్రమే కాదు.. ఘాటెక్కించే మసాలాల ఘుమఘములు నషాళానికి ఎక్కాల్సిందే. ఇక పండక్కి నాన్వెజ్లో మటన్, చికెన్ కామన్. అయితే ఎప్పుడూ ఒకేలా కాకుండా.. ఈసారి వెరైటీగా మద్రాస్ స్టైల్లో మటన్ బకెట్ బిర్యానీ చేయండి. రుచి అద్దిరిపోవాల్సిందే. మరి ఈ బిర్యానీకి కావాల్సిన పదార్థాలు, తయారీ విధానం ఈ స్టోరీలో తెలుసుకుందాం..
మటన్ మారినేట్ కోసం :
- బిర్యానీ కట్ మటన్ - అర కిలో
- కారం - అర టీ స్పూన్
- పసుపు - అర టీ స్పూన్
- ఉప్పు - సరిపడా
- అల్లం వెల్లుల్లి పేస్ట్ - 1 టేబుల్ స్పూన్
- జాజికాయ పొడి - 2 చిటికెళ్లు
- కొత్తిమీర, పుదీనా తరుగు - పిడికెడు
- పెరుగు - అర కప్పు
- నిమ్మకాయ - 1
- ధనియాల పొడి - 1 టీస్పూన్
- గరం మసాలా - 1 టీ స్పూన్
- నూనె - పావు కప్పు
మటన్ కర్రీకి:
- నెయ్యి - 4 టేబుల్ స్పూన్లు
- నూనె - 3 టేబుల్ స్పూన్లు
- అనాస పువ్వులు - 2
- మిరియాలు -10
- దాల్చిన చెక్క - 1 ఇంచ్
- బిర్యానీ ఆకులు - 2
- బూజు పువ్వు - కొద్దిగా
- లవంగాలు - 8
- యాలకులు - 5
- షాజీరా - అర టేబుల్ స్పూన్
- ఉల్లిపాయలు - 2
- పచ్చిమిర్చి - 4
- టమాటలు - 2
- వేడి వేడి నీరు - 750 ml
- పుదీనా, కొత్తిమీర తరుగు - కొద్దిగా
బిర్యానీ కోసం:
- బాస్మతీ రైస్ - 2 కప్పులు
- నీరు - 2 లీటర్లు
- లవంగాలు - 5
- దాల్చిన చెక్క - 2
- మిరియాలు - 10
- అనాస పువ్వులు - 2
- యాలకలు - 3
- బిర్యానీ ఆకులు- 2
- షాజీరా - 1 టీ స్పూన్
- ఉప్పు - 3 టేబుల్ స్పూన్లు
- అల్లం వెల్లుల్లి పేస్ట్ - 1 టేబుల్ స్పూన్
- కొత్తిమీర, పుదీనా తరుగు - కొద్దిగా
- పచ్చిమిర్చి - 2
- ఫుడ్ కలర్, రోజ్ వాటర్ - 1 టేబుల్ స్పూన్
- నెయ్యి - 4 టేబుల్ స్పూన్లు
తయారీ విధానం:
- ముందుగా ఓ గిన్నెలోకి మటన్ తీసుకోవాలి. అందులోకి కారం, ఉప్పు, పసుపు, అల్లం వెల్లుల్లి పేస్ట్, జాజికాయ పొడి, కొత్తిమీర, పుదీనా తరుగు, పెరుగు, ధనియాల పొడి, గరం మసాలా, నూనె, నిమ్మరసం.. వేసి ముక్కలకు బాగా పట్టేలా కలిపి ఫ్రిడ్జ్లో ఓ మూడు గంటల పాటు పెట్టాలి. వీలైతే రాత్రంతా పెట్టుకుంటే కూర రుచి ఇంకా పెరుగుతుంది.
- మూడు గంటల తర్వాత మందపాటి గిన్నెను స్టవ్ మీద పెట్టుకోవాలి. ఆ తర్వాత అందులోకి నెయ్యి, నూనె వేసి వేడి చేసుకోవాలి. నూనె వేడెక్కిన తర్వాత అనాస పువ్వులు, మిరియాలు, దాల్చినచెక్క, లవంగాలు, యాలకులు, బిర్యానీ ఆకులు, షాజీరా, బూజు పువ్వు వేసి ఓ 5 సెకన్లు వేయించుకోవాలి.
- ఆ తర్వాత సన్నగా తరిగిన ఉల్లిపాయ ముక్కలు వేసి గోల్డెన్ బ్రౌన్ కలర్ వచ్చేవరకు వేయించుకోవాలి. ఆ తర్వాత కట్ చేసుకున్న మిర్చి, మారినేట్ చేసుకున్న మటన్ వేసి కలిపి హై ఫ్లేమ్ మీదు మటన్లోని నీరు ఇంకిపోయి.. నూనె పైకి తేలేంతవరకు ఫ్రై చేసుకోవాలి. ఇక్కడ తీసుకున్న మటన్కు సుమారు 15 నిమిషాల సమయం పట్టిద్ది.
- ఆ తర్వాత మంటను మీడియం ఫ్లేమ్లో పెట్టి మటన్ ముక్కలు లేత బంగారు రంగు వచ్చేవరకు వేయించుకోవాలి.
- ఆ తర్వాత టమాట పేస్ట్ లేదా సన్నగా కట్ చేసుకున్న ముక్కలు వేసి నూనె పైకి తేలేంతవరకు ఫ్రై చేసుకోవాలి.
- ఆ తర్వాత వేడి వేడి నీరు పోసి కలిపి మూత పెట్టి మటన్ ముక్కను 80 శాతం ఉడికించుకోవాలి. ఇలా ముక్క ఉడకటానికి సుమారుగా 20 నుంచి 25 నిమిషాల సమయం పడుతుంది.
- ముక్క 80 శాతం ఉడికింది అనుకున్న తర్వాత కొత్తిమీర, పుదీనా తరుగు వేసి కలిపి దింపేసుకోవాలి.
- ఇప్పుడు మరో స్టవ్ మీద గిన్నె పెట్టి అందులో రెండు లీటర్ల నీరు పోసి మరిగించుకోవాలి.
- నీరు మరుగుతున్నప్పుడు లవంగాలు, యాలకులు, మిరియాలు, దాల్చిన చెక్క, అనాస పువ్వు, బిర్యానీ ఆకులు, షాజీరా వేసుకోవాలి.
- ఇప్పుడు మసాలా దినుసులు మరుగుతున్నప్పుడు ఉప్పు వేసి మరిగించుకోవాలి. ఈ స్టేజ్లో ఉప్పు సరిపోయిందో లేదో చూసుకోవాలి.
- ఉప్పు కరిగి నీరు మసులుతున్నప్పుడు అల్లం వెల్లుల్లి పేస్ట్ వేసి మరిగించుకోవాలి.
- ఆ తర్వాత గంట సేపు నానబెట్టిన బాస్మతీ బియ్యం, కొత్తిమీర, పుదీనా తరుగు వేసి మంటను హై ఫ్లేమ్లో పెట్టి 80 శాతం ఉడికించుకోవాలి.
- అన్నం ఉడికిన తర్వాత జల్లెడ సాయంతో కొద్దికొద్దిగా తీసుకుంటూ ఉడికించి పెట్టుకున్న మటన్ మిశ్రమంపై లేయర్లా పరచుకోవాలి. ఇలా అన్నం మొత్తాన్ని లేయర్లా వేసుకోవాలి.
- ఆ తర్వాత గిన్నె అంచులకు అంటిన మసాలా మిశ్రమాన్ని తుడిచి.. బియ్యంపై ఫుడ్ కలర్, రోజ్వాటర్, నెయ్యి, కొత్తిమీర, పుదీనా తరుగు వేసి మూత పెట్టుకోవాలి.
- ఇప్పుడు ధమ్ బయటికి పోకుండా మూత పెట్టి హై-ఫ్లేమ్ మీద 5 నిమిషాలు, లో-ఫ్లేమ్ మీద మరో 5 నిమిషాలు ఉడికించుకోవాలి. స్టవ్ ఆఫ్ చేసి ఓ 20 నిమిషాలు తర్వాత చూస్తే.. ఘుమఘములాడే మద్రాస్ స్టైల్ మటన్ బకెట్ బిర్యానీ రెడీ.
దసరా విందులో స్పెషల్ డిష్ గురూ! - నోరూరించే "గార్లిక్ చికెన్ ఫ్రై" - తిని తీరాలంతే!
దసరా స్పెషల్ స్వీట్స్ : నోరూరించే "రవ్వ జిలేజీ, మూంగ్దాల్ లడ్డు, పాల బూరెలు"- ఈజీగా చేసుకోండిలా!
