Bihar Style Spicy Chicken Masala Curry: నాన్వెజ్ ప్రియులు ఎక్కువగా ఇష్టపడే వాటిలో చికెన్ ఫస్ట్ ప్లేస్లో ఉంటుంది. అయితే చికెన్ అంటే ఎంత ఇష్టమైనా సరే.. ఎప్పుడూ ఒకటే తరహాలో తినాలంటే బోర్ కొడుతుంది. అందుకే.. కొందరు వెరైటీ రెసిపీస్ ప్లాన్ చేస్తుంటారు. అలాంటి వారి కోసం ఒక సూపర్ చికెన్ రెసిపీ తీసుకొచ్చాం. అదే.. "బిహార్ స్టైల్ స్పైసీ చికెన్ మసాలా కర్రీ". చాలా తక్కువ పదార్థాలతో ప్రిపేర్ చేసుకునే ఈ రెసిపీ చాలా టేస్టీగా ఉంటుంది. పిల్లల నుంచి పెద్దల వరకు అందరూ ఎంతో ఇష్టంగా తింటారు. మరి ఇంకెందుకు ఆలస్యం.. వెంటనే ఒకసారి ఈ రెసీపీని ట్రై చేయండి. ఇంటిల్లిపాదీ ఆస్వాదించండి. మరి, ఇంతకీ దీని తయారీకి కావాల్సిన పదార్థాలేంటి? ఎలా ప్రిపేర్ చేసుకోవాలి? అన్న వివరాలు ఇప్పుడు చూద్దాం.
కావాల్సిన పదార్థాలు:
మారినేట్ కోసం:
- చికెన్ - అర కిలో
- కారం - అర టేబుల్ స్పూన్
- పసుపు - అర టీ స్పూన్
- ఉప్పు - కొద్దిగా
- ఆవాల నూనె - 2 టేబుల్ స్పూన్లు
- అల్లం వెల్లుల్లి పేస్ట్ - 1 టేబుల్ స్పూన్
మసాలా పొడి కోసం:
- లవంగాలు - 6
- జాపత్రి - కొద్దిగా
- నల్ల యాలక -1
- ధనియాలు - టేబుల్ స్పూన్
- దాల్చిన చెక్క - కొద్దిగా
- మిరియాలు - అర టీస్పూన్
- జీలకర్ర - 1 టీ స్పూన్
- యాలకులు -4
- ఆవాలు- అర టీ స్పూన్
కర్రీ కోసం:
- ఆవ నూనె - 7 టేబుల్ స్పూన్లు
- ఎండు మిర్చి - 2
- బిర్యానీ ఆకు - 1
- యాలకులు - 2
- నల్ల యాలకులు - 2
- దాల్చిన చెక్క - కొద్దిగా
- లవంగాలు -4
- ఉల్లిపాయ తరుగు - అర కప్పు
- పచ్చిమిర్చి - 3
- వెల్లుల్లి రెబ్బలు -8
- అల్లం- కొద్దిగా
- వెల్లుల్లి - 2
- వేయించిన జీలకర్ర పొడి - 1 టీస్పూన్
- ధనియాల పొడి - 1 టీ స్పూన్
- కారం- టేబుల్ స్పూన్
- పసుపు - పావు టీ స్పూన్
- రుచికి సరిపడా - ఉప్పు
- నీరు - సరిపడా
- వేడినీరు - ఒకటిన్నర కప్పు
- కొత్తిమీర తరుగు - కొద్దిగా
తయారీ విధానం:
- ముందుగా ఓ బౌల్లోకి చికెన్ తీసుకుని ఉప్పు, కారం, పసుపు, అల్లం వెల్లుల్లి పేస్ట్, నూనె పోసి ముక్కలకు మసాలా బాగా పట్టేలా కలిపి ఓ గంట పాటు ఫ్రిజ్లో పెట్టాలి.
- ఇప్పుడు స్టవ్ ఆన్ చేసి పాన్ పెట్టి లవంగాలు, నల్ల యాలక, ధనియాలు, జాపత్రి, దాల్చిన చెక్క, మిరియాలు, జీలకర్ర, యాలకులు, ఆవాలు వేసి సన్నని సెగ మీద మసాలాలు దోరగా అయ్యి మంచి వాసన వచ్చే వరకు వేయించుకుని స్టవ్ ఆఫ్ చేసుకోవాలి. ఆ మసాలాలు చల్లారిన తర్వాత మిక్సీ జార్లోకి వేసుకుని మెత్తని పొడి చేసి పక్కకు పెట్టుకోవాలి.
- ఇప్పుడు స్టవ్ మీద మరో గిన్నె పెట్టి 3 టేబుల్ స్పూన్ల నూనె వేసి వేడి చేసుకోవాలి. ఆయిల్ హీట్ ఎక్కిన తర్వాత మారినేట్ చేసుకున్న చికెన్ వేసుకుని బాగా కలుపుకోవాలి. స్టవ్ను హై ఫ్లేమ్లో పెట్టి చికెన్లోని నీరు ఇంకిపోయి నూనె పైకి తేలి ముక్క రంగు మారే వరకు ఫ్రై చేసుకోవాలి. ముక్క కలర్ మారిన తర్వాత తీసి ప్లేట్లో పెట్టుకోవాలి.
- ఇప్పుడు అదే గిన్నెలో మిగిలిన నూనె వేసుకుని ఎండుమిర్చి, బిర్యానీ ఆకు, యాలకులు, నల్ల యాలకులు, దాల్చిన చెక్క, లవంగాలు వేసుకుని ఫ్రై చేసుకోవాలి. ఆ తర్వాత అందులోకి ఉల్లిపాయ ముక్కలు వేసి కలిపి మూత పెట్టి మగ్గనివ్వాలి.
- ఈలోపు రోట్లో పచ్చిమిర్చి, వెల్లుల్లి రెబ్బలు, అల్లం ముక్క వేసుకుని కచ్చాపచ్చగా దంచుకోవాలి.
- ఇప్పుడు ఈ పచ్చిమిర్చి మిశ్రమాన్ని వేగుతున్న ఉల్లిపాయ ముక్కల్లో వేసుకోవాలి. అలాగే అందులోకి 2 వెల్లుల్లిపాయలు వేసుకుని బాగా కలిపి ఉల్లిపాయ ముక్కలు మెత్తబడి రంగు మారే వరకు ఫ్రై చేసుకోవాలి.
- ఉల్లిపాయలు బాగా ఫ్రై అయిన తర్వాత అందులోకి వేయించిన జీలకర్ర పొడి, ధనియాల పొడి, కారం, పసుపు, రుచికి సరిపడా ఉప్పు వేసి వేయించుకోవాలి. ఆ తర్వాత పావు కప్పు నీరు పోసి మసాలాలు మాడిపోకుండా ఫ్రై చేసుకోవాలి.
- మసాలాల నుంచి నూనె పైకి తేలినప్పుడు ఫ్రై చేసుకున్న చికెన్ వేసుకుని కలుపుకోవాలి. ఇప్పుడు గ్రైండ్ చేసుకున్న మసాలా పొడిని ఒకటింపావు వేసుకుని ఓ నిమిషం పాటు వేయించుకోవాలి.
- ఆ తర్వాత కప్పున్నర వేడి నీళ్లు పోసి బాగా కలిపి స్టవ్ను మీడియం ఫ్లేమ్లో పెట్టి మూత పెట్టి నూనె పైకి తేలి కూర దగ్గరపడేంతవరకు ఉడికించాలి. అంటే సుమారు 20 నుంచి 25 నిమిషాల టైమ్ పడుతుంది.
- అంతే అందులోకి కొద్దిగా కొత్తిమీర తరుగు చల్లి దింపుకుని సర్వ్ చేసుకుంటే ఎంతో టేస్టీగా ఉండే బిహారీ స్టైల్ స్పైసీ చికెన్ కర్రీ రెడీ. నచ్చితే మీరూ ట్రై చేయండి.
అసలు సిసలైన ఆంధ్రా స్టైల్ "నాటుకోడి వేపుడు" - ఈ పద్ధతిలో చేశారంటే తినేకొద్దీ తినాలనిపిస్తుంది!
దసరా పార్టీకి సూపర్ పార్ట్నర్ - పంజాబీ స్టైల్ "పటియాలా చికెన్ కర్రీ" - అద్దిరిపోవాల్సిందే!
