Donald Trump Warning : అమెరికా అధ్యక్షుడిగా తనను ఎన్నుకోకపోతే దేశంలో రక్తపాతం తప్పదని డొనాల్డ్ ట్రంప్ హెచ్చరించారు. బైడెన్ విధానాలను విమర్శిస్తూ ఒహైయోలోని డేటన్ సమీపంలో జరిగిన ఎన్నికల ర్యాలీలో ట్రంప్ ఈ వ్యాఖ్యలు చేశారు. దీంతో ఆయన వ్యాఖ్యలపై తీవ్ర విమర్శలు వచ్చాయి. దీనిపై స్పందించిన ట్రంప్ బృందం, బైడెన్ విధానాల వల్ల అమెరికా వాహన పరిశ్రమలో ఆర్థిక రక్తపాతం మొదలవుతుందనే కోణంలో ఈ వ్యాఖ్యలు చేసినట్లు వివరణ ఇచ్చింది.
100శాతం దిగుమతి సుంకం
శనివారం ఒహైయోలో ఏర్పాటు చేసిన ఎన్నికల ర్యాలీలో మాట్లాడిన ట్రంప్, నవంబర్ 5న జరగనున్న ఎన్నికలు అమెరికా చరిత్రలో నిలిచిపోనున్నాయని అన్నారు. అలాగే మెక్సికోలో కార్ల తయారీ కేంద్రాన్ని ఏర్పాటు చేయాలనుకుంటున్న చైనా నిర్ణయాన్ని ట్రంప్ తీవ్రంగా విమర్శించారు. తాను అధికారంలోకి వస్తే అక్కడ ఉత్పత్తయ్యే కార్లను అమెరికాలో విక్రయించడానికి అనుమతి ఇవ్వనని తెలిపారు. 100 శాతం దిగుమతి సుంకాలు విధిస్తామని పేర్కొన్నారు. పరోక్షంగా బైడెన్ వాహనాల పరిశ్రమ విధానాలను లక్ష్యంగా చేసుకొని ఈ వ్యాఖ్యాలు చేశారు. ఈ సారి ఎన్నికలల్లో తాను గెలవకపోతే బహుశా అమెరికాలో మరోసారి ఎన్నికలు ఉండవు అని అన్నారు.
ట్రంప్ వ్యాఖ్యలపై స్పందించిన బైడెన్
ట్రంప్ చేసిన వ్యాఖ్యలపై అమెరికా అధ్యక్షుడు జో బైడెన్ స్పందించారు. 'మరో జనవరి 6 కావాలని డొనాల్డ్ ట్రంప్ కోరుకుంటున్నారు. మరోసారి రాజకీయ హింసకు ప్రేరేపిస్తున్నారు. ఆయన ప్రతీకారాన్ని, అతివాదాన్ని ఓటర్లు మరోసారి ఓడిస్తారు.' అని జో బైడెన్ ఆరోపించారు. అమెరికా అధ్యక్ష అభ్యర్థులల్లో ఉన్న ఒకరు మానసికంగా ఈ పదవికి అనర్హులు అని వాషింగ్టన్ ఓ సమావేశంలో జో బైడెన్ విమర్శించారు.
ట్రంప్కు మద్దతు ఇవ్వడం లేదు
మరోవైపు ట్రంప్ అభ్యర్థిత్వానికి తాను మద్దతివ్వడం లేదని ఆయన సొంత పార్టీ కీలక నేత మైక్ పెన్స్‌ తెలిపారు. అధ్యక్షుడిగా ఉన్న సమయంలో ట్రంప్ అనేక విషయాల్లో పార్టీ విధానాలకు కట్టుబడలేదని వ్యాఖ్యానించారు. తనకు, ట్రంప్‌నకు మధ్య చాలా వ్యత్యాసముందన్నారు. తాను ఉపాధ్యక్షుడిగా ఉన్న సమయంలో రాజ్యాంగానికి లోబడే పనిచేశానన్నారు. ఎక్కడా ఒత్తిళ్లకు తలొగ్గి దారి తప్పలేదని అందుకు తాను గర్విస్తున్నానని చెప్పారు. ఈసారి అధ్యక్ష అభ్యర్థిత్వం కోసం పోటీ పడ్డవారిలో మైక్ కూడా ఉన్నారు. కానీ, ప్రైమరీ ఎన్నికలు ప్రారంభం కావడానికే ముందే రేసు నుంచి వైదొలిగారు.
వరుసగా రెండోసారీ ఢీ!
ఇక ఇప్పటికే అమెరికా అధ్యక్ష ఎన్నికల్లో పోటీ చేసే అభ్యర్థులు దాదాపు ఖరారయ్యారు. రిపబ్లికన్ల తరఫున డొనాల్డ్ ట్రంప్, డెమోక్రాట్ పార్టీ నుంచి జో బైడెన్ బరిలోకి దిగనున్నారు. కేవలం అధికారికంగా ప్రకటించటమే మిలిగింది. అయితే ఇప్పటి వరకు అమెరికా అధ్యక్ష ఎన్నికల చరిత్రలో ఇలా ఒకే అభ్యర్థులు వరుసగా రెండు సార్లు బరిలో దిగడం రెండో సారి.
'ఆయన పగ, ప్రతీకారంతో ఉన్నారు- అమెరికాకు చాలా డేంజర్!'- ట్రంప్పై విరుచుకుపడ్డ బైడెన్
బైడెన్ VS ట్రంప్ రీమ్యాచ్ ఫిక్స్- అమెరికా అధ్యక్ష ఎన్నికల చరిత్రలో రెండోసారి
