High Bp and Sleepless Side Effects: అధిక రక్తపోటు (హైపర్టెన్షన్) ఇప్పుడు అన్ని వయసుల వారికి సర్వసాధారణంగా మారింది. మారిన జీవనశైలి, ఆహార అలవాట్లు.. ఇవన్నీ అధిక రక్తపోటుకు కారణాలు. ఇక హైబీపీ వల్ల గుండె జబ్బులు, కిడ్నీ సంబంధిత వ్యాధులు సహా ఇతర ఆరోగ్య సమస్యలు ఎదురవుతాయి. అయితే హైబీపీకి నిద్రలేమి తోడైతే మెదడుపై తీవ్రమైన ప్రభావం చూపుతాయని ఓ పరిశోధన హెచ్చరిస్తోంది. ఈ పరిశోధన సారాంశం ఏంటి? దీనికి వైద్యులు సూచిస్తున్న పరిష్కారాలేంటో ఈ స్టోరీలో తెలుసుకుందాం..
పరిశోధన వివరాలు: అధిక రక్తపోటు, నిద్రలేమి.. ఈ రెండు సమస్యలూ మెదడుపై తీవ్రమైన ప్రభావం చూపుతాయని ఆస్ట్రేలియాలోని మొనాష్‌ విశ్వవిద్యాలయం పరిశోధకులు వివరిస్తున్నారు. ఈ పరిశోధన ఫలితాలు అమెరికన్‌ హార్ట్‌ అసోసియేషన్‌ జర్నల్‌లో ప్రచురితమయ్యాయి. మోనాష్‌ వర్సిటీ చేసిన అధ్యయనం కోసం 682 మంది నుంచి డేటాను సేకరించారు.
ఇందులో ప్రఖ్యాత ‘ఫ్రామింగామ్‌ హార్ట్‌ స్టడీ’లో పాల్గొన్న వ్యక్తులతోపాటు, హైపర్టెన్షన్ కలిగి ఉండి, నిద్రలేమితో బాధపడుతున్న వారిపై అధ్యయనం చేశారు. వీరిలో 637 మందికి మాగ్నటిక్‌ రిసోనెన్స్‌ ఇమేజింగ్‌(MRI) పరీక్ష నిర్వహించి పరిశీలించారు. వీరిలో హైపర్ టెన్షన్ కలిగి ఉండి, నిద్రలేమి సమస్య కూడా ఉన్నవారి ఎంఆర్‌ఐలు పరిశీలిస్తే.. బ్రెయిన్‌ మార్కర్స్‌లో మెదడు పనితీరు దెబ్బతిన్నట్టు స్పష్టమైందని అంటున్నారు.
మెదడులో వచ్చే మార్పులు.. వయసు పైబడిన వారితో పోలిస్తే.. హైపర్టెన్షన్, నిద్రలేమితో బాధపడుతున్న వారిలో చిన్నవయసులోనే కనిపించాయని పరిశోధకులు విశ్లేషించారు. అధిక రక్తపోటు ఉన్నా.. నిద్రలేమి సమస్యలు లేని వారిలో మెదడు పనితీరు బాగానే ఉన్నట్టు కనుగొన్నారు. హైపర్టెన్షన్, నిద్రలేమి రెండూ ఉన్నవారి మెదడు పనితీరు ఎలా ఉండేదనే అంశంపై ఇంతకుముందు స్పష్టత లేదని, ఈ పరిశోధనతో దానిపై స్పష్టమైన ఫలితాలు వచ్చాయని మొనాష్‌ విశ్వవిద్యాలయానికి చెందిన అసోసియేట్ ప్రొఫెసర్ మాథ్యూ పేస్‌ అభిప్రాయపడ్డారు.
ఇవీ అవసరం: మంచి నిద్ర కావాలంటే అందుకు తగిన సంసిద్ధత కూడా ఉండాలని వైద్యులు సూచిస్తున్నారు. అందుకోసం నిద్రకు మూడు గంటల ముందు మద్యం తాగవద్దని.. నిద్ర పోయే రెండు గంటల ముందే పనిచేయడం, టీవీ, కంప్యూటర్లు, ఫోన్ చూడడం మానేయాలని అంటున్నారు. అలాగే పాలు తాగడాన్ని అలవాటు చేసకుకోవాలని చెబుతున్నారు. ఎందుకంటే.. పాలల్లో ట్రిప్టోఫాన్‌ ఉంటుంది. అలాగే సెరటోనిన్, మెలటోనిన్‌ ఉంటాయి. వీటి వల్ల మంచి నిద్ర సాధ్యమవుతుందని అంటున్నారు.
అంతేకాకుండా.. క్రమం తప్పని వ్యాయామాలు, సమతులాహారం, తక్కువ ఉప్పు, బరువు నియంత్రణ లాంటివి పాటిస్తే రక్తపోటు అదుపులో ఉంటుందని అంటున్నారు. రోజూ ఏడు నుంచి 9 గంటలు తప్పనిసరిగా నిద్రపోవాలని.. కుదిరితే మధ్యాహ్నం వేళ ఒక పది నిముషాలపాటు కునుకు తీసినా మంచి ఫలితం ఉంటుందని చెబుతున్నారు.
NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
అలర్ట్ : మీరు హై బీపీతో బాధపడుతున్నారా? - అయితే, ఇవి అస్సలు తినొద్దు - అవి తప్పక తినాలి!
హైబీపీతో బాధపడుతున్నారా? - రోజూ ఈ ఫుడ్ తీసుకుంటే రక్తపోటు కంట్రోల్ అవుతుందట!
