Health Benefits Of Eating Fish : ప్రతిఒక్కరూ తమ ఫేస్ అందంగా కనిపించాలని కోరుకుంటారు. కానీ.. చాలా మందిని మొటిమలు వేధిస్తుంటాయి. వాటిని తగ్గించుకోవడం కోసం ఏవేవో ప్రయత్నాలు చేస్తుంటారు. అయితే.. మొటిమలు రాకుండా చేపలు చక్కగా ఉపయోగపడతాయని నిపుణులు చెబుతున్నారు. ఇటీవల జరిపిన ఓ పరిశోధనలో కూడా ఈ విషయం వెల్లడైంది.
ఇంతకీ పరిశోధన చెప్పే ఆ చేప మందు ఏంటో తెలుసా? ప్రత్యేకంగా ఏమీలేదు.. చేపలు తినడమే! అవును.. చేపలు తినడం ద్వారా.. మొటిమలు తగ్గించుకోవచ్చని ఇటీవల జరిపిన ఓ రీసెర్చ్లో తేలింది. చేపల్లో ఒమేగా 3 కొవ్వు ఆమ్లాలు పుష్కలంగా ఉంటాయి. ఇది చక్కటి మెడిసిన్లా పనిచేస్తుందని పరిశోధకులు చెబుతున్నారు. "Journal of Cosmetic Dermatology" అనే జర్నల్లో ఈ పరిశోధన ప్రచురితమైంది. జర్మనీలోని లుడ్విగ్ మాక్సిమిలియన్ విశ్వవిద్యాలయానికి చెందిన పరిశోధకులు ఈ రీసెర్చ్ చేపట్టారు.
ఈ రీసెర్చ్లో.. స్వల్పంగా, ఒక మాదిరిగా మొటిమలు(Pimples) గలవారిని విశ్లేషించగా.. వారిలో 98% మందిలో ఒమేగా 3 కొవ్వు ఆమ్లాల మోతాదులు తక్కువగా ఉంటున్నట్టు కనుగొన్నారు. వీరికి ఒమేగా 3 కొవ్వు ఆమ్లాలు ఎక్కువగా ఉండే మధ్యధరా ప్రాంత ఆహారం, మాత్రలను ఇవ్వగా మంచి ఫలితం కనిపించిందని పరిశోధకులు తెలిపారు. ముఖ్యంగా చేపలలో పుష్కలంగా ఉండే ఒమేగా 3 కొవ్వు ఆమ్లాలు ఒంట్లో వాపు ప్రక్రియను (ఇన్‌ఫ్లమేషన్‌) తగ్గిస్తాయి, చర్మంలో నూనె ఉత్పత్తిని నియంత్రిస్తాయి. అంతేకాకుండా.. ఓమెగా 3 ఫ్యాటీ యాసిడ్స్ వాపు ప్రక్రియను ప్రేరేపించే రసాయనాలను నిరోధించటం ద్వారా మొటిమలు తగ్గేలా చేస్తాయని ఈ పరిశోధనలో పాల్గొన్న డాక్టర్ బెంజమిన్ క్లానర్ పేర్కొన్నారు.
పెళ్లి తర్వాత మొటిమలు వస్తున్నాయా? - ఇలా ఈజీగా తగ్గించుకోండి!
అందుకే.. ఒమేగా-3 ఆమ్లాలు ఎక్కువగా ఉండే ఫుడ్స్ మీ డైట్లో ఉండేలా చూసుకోవడం మంచిదంటున్నారు. సాల్మన్, సార్‌డైన్స్‌ వంటి చేప(Fish)ల్లో ఈ యాసిడ్స్ ఎక్కువగా ఉంటాయి. అయితే.. చేపలలో మాత్రమే కాకుండా, ఆకుకూరలు, వాల్‌నట్స్, చియా విత్తనాలు, ఆలివ్‌నూనె, బీన్స్, గుడ్లు, అవిసె గింజల్లో కూడా ఒమేగా-3 ఆమ్లాలు పుష్కలంగా లభిస్తాయని చెబుతున్నారు. అలాగే రక్తంలో త్వరగా గ్లూకోజు కలవకుండా చూసే పదార్థాలు సైతం చర్మానికి మేలు చేస్తాయని చెబుతున్నారు నిపుణులు.
వీటికి దూరంగా ఉండాలి : మొటిమల బారినపడకుండా ఉండాలంటే పైన చెప్పినవి తీసుకోవడంతో పాటు కొన్ని ఆహారాలకు దూరంగా ఉండడం మంచిదంటున్నారు నిపుణులు. ఎందుకంటే ఆ ఆహారాలు కొంతమందిలో మొటిమలను మరింత తీవ్రతరం చేస్తాయంటున్నారు. అందులో ముఖ్యంగా.. స్పైసీ ఫుడ్స్, కెఫిన్, చాక్లెట్, జంక్ ఫుడ్, ఫాస్ట్ ఫుడ్, ప్రాసెస్ చేసిన ఆహారాలు వంటివి మొటిమల సమస్యను తీవ్రతరం చేస్తాయని సూచిస్తున్నారు. కాబట్టి, ఇలాంటి ఫుడ్స్కు వీలైనంత దూరంగా ఉండడం మంచిదంటున్నారు నిపుణులు.
NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
ఆశ్చర్యం : ఇలా నిద్రపోయినా కూడా మొటిమలు వస్తాయట! - మీరు ఎలా పడుకుంటున్నారో చెక్ చేసుకోండి!
