జాన్వీ కపూర్ ఇంట్లో ఉంటారా? ఈ బంపర్ ఆఫర్ మీ కోసమే! - Janhvikapoor HOUSE

Janhvikapoor House : తన ఇంట్లో ఉండే అవకాశాన్ని కల్పిస్తోంది బాలీవుడ్ స్టార్ హీరోయిన్ జాన్వీ కపూర్. మరి మీకు ఈ అవకాశం దక్కాలంటే ఇలా చేసేయండి.

Janhvikapoor House : సినిమా హీరోలకే కాదు హీరోయిన్స్​కు కూడా చాలా మందే అభిమానులు ఉంటారన్న సంగతి తెలిసిందే. వారితో కలిసి ఒక్క సెల్ఫీ దిగితే చాలని భావిస్తుంటారు. అలాంటిది వారితో కలిసి కాసేపు మాట్లాడే అవకాశం, గడిపే ఛాన్స్​ వస్తే ఎవరు మాత్రం వదులుకుంటారు. ఇప్పుడు అలాంటి ఆఫర్​నే జాన్వీ కపూర్​ ఇస్తోంది! అవును మీరు చదివేది నిజమే. మీరు జాన్వీ కపూర్ అభిమాని అయితే? ఈ ముద్దుగుమ్మ తన ఇంట్లో మీరు ఉండే అవకాశం కల్పిస్తోంది.

వివరాల్లోకి వెళితే - సెలబ్రిటీలు చాలా మంది షూటింగ్​లు నిమిత్తం చాలా ప్రదేశాలు తిరుగుతుంటారు. అదే సమయంలో తాము నివాసం ఉండేందుకు చాలా ప్రదేశాల్లో ఇళ్లను కొనుగోలు కూడా చేస్తుంటారు. అలా ప్రస్తుతం చెన్నైలో జాన్వీకి ఓ ఇల్లు ఉంది. దీనిని గతంలో శ్రీదేవి కొనుగోలు చేసిందే. అయితే ఇప్పుడీ ఇంటిని ఎయిర్ బీఎన్బీ అనే పాపులర్ రెంటల్ కంపెనీ లిస్ట్ అవుట్ చేసింది.

ఇద్దరికి ఛాన్స్​ - ఫ్యాన్స్​ లేదా ఇతర ట్రావెలర్స్ సినీ తారలతో కలిసి ముచ్చటించేలా, అలానే వారి నివాసంలోని కొంత ప్రదేశాన్ని రెంట్​కు తీసుకునేందుకు వీలుగా ఎయిర్ బీఎన్బీ సంస్థ అవకాశాన్ని కల్పిస్తోంది. అలా గ్లోబల్ వైడ్​గా ఈ బీఎన్బీ సంస్థ 11 మంది సెలబ్రిటీల లగ్జరీ ఇళ్లను లిస్ట్ చేసింది. ఇందులో చెన్నైలోని జాన్వీ కపూర్​కు చెందిన విలాసవంతమైన ఇల్లు కూడా ఉంది. ఎయిర్ బీఎన్బీ సంస్థ వారు జాన్వీ ఇంటికి సంబంధించిన కొన్ని ఫోటోలను షేర్ చేసి - బాలీవుడ్ స్టార్ జాన్వీ కపూర్​లా జీవించండి అంటూ పెద్ద హెడ్డింగ్ పెట్టి ఈ విషయాన్ని తెలియజేసింది.

జాన్వీ కపూర్ ఇంట్లో ఇద్దరు గెస్ట్​లకు అవకాశం కల్పించేందుకు సిద్ధంగా ఉన్నట్టు సదరు సంస్థ తమ వెబ్ సైట్​లో పేర్కొంది. ఆ గెస్ట్​లకు జాన్వీకపూర్ ఇంటిలోని ఒక బెడ్ రూమ్, ఒక బాత్రూంను మాత్రమే వాడుకునే అవకాశాన్ని కల్పించింది. దీని కోసం బుకింగ్ చేసుకున్న వారిలో ఆ ఇద్దరిని జాన్వీనే సెలెక్ట్ చేస్తుంది.

జాన్వీ ఎంపిక చేసిన అతిథులకు సౌత్ ఇండియన్ స్టైల్​లో లంచ్ ఉంటుందని సదరు సంస్థ పేర్కొంది. అందులో జాన్వీకి ఇష్టమైన నెయ్యి పొడి రైస్, పాలకోవా, ఆంధ్రా బిర్యానీ, పెసరట్టు దోస వంటివి ఉంటాయని చెప్పుకొచ్చింది. ఇంకా జాన్వీ తన బ్యూటీ సీక్రెట్స్​, తన తల్లికి సంబంధించిన మధురమైన జ్ఞాపకాలను గెస్ట్​లతో షేర్ చేసుకుంటుందని వెబ్ సైట్ పేర్కొంది. మరి మీరు ఈ అవకాశాన్ని దక్కించుకోవాలంటే మే 12న సాయంత్రం 6.30కు బుకింగ్స్ ఓపెన్ అవుతాయట.