రోజూ రూ.417 పెట్టుబడితో - కోటి రూపాయల రాబడి! ఈ స్కీమ్​ గురించి మీకు తెలుసా? - Post Office PPF Scheme Benefits

Post Office PPF Scheme: భవిష్యత్తులో ఆర్థికంగా నిలకడగా ఉండాలంటే చిన్న వయసు నుంచే పొదుపు పాటించడం ముఖ్యం. అయితే చాలా మందికి ఉండే డౌట్​ ఎక్కడ పొదుపు చేయాలి? అలాంటి వారి కోసం పోస్టాఫీసు ఓ స్కీమ్​ను తీసుకొచ్చింది. ఈ పథకంలో పెట్టుబడి పెడితే ఎటువంటి రిస్క్​ లేకుండా మంచి రాబడి పొందవచ్చు. ఆ వివరాలు ఇప్పుడు చూద్దాం..

Post Office PPF Scheme Benefits: ప్రస్తుత కాలంలో పెరిగిన ఖర్చుల దృష్ట్యా ప్రతి ఒక్కరు పొదుపు మంత్రాన్ని పాటిస్తున్నారు. తమ భవిష్యత్తు అవసరాల కోసం డబ్బును పొదుపు చేయాలనుకుంటున్నారు. ఇందుకోసం ఏ స్కీమ్స్​ మంచిది, ఎక్కడ పెడితే రిస్క్​ ఉండదు అనే వివరాలను తెలుసుకుంటున్నారు. అయితే ఇలాంటి వారి కోసం భారతీయ తపాలా శాఖ ఓ స్కీమ్​ను తీసుకొచ్చింది. నిజానికి ఇది ఎప్పటి నుంచో ఉన్న పథకమే. కాకపోతే దీని గురించి ఎక్కువ మందికి అవగాహన లేదు. ఇంతకీ ఆ పథకం ఏంటి అనుకుంటున్నారా..? అదే పబ్లిక్​ ప్రావిడెంట్​ ఫండ్​(PPF)​ పథకం. మరి దీనికి సంబంధించిన పూర్తి వివరాలు ఈ స్టోరీలో చూద్దాం..

కాంపౌండ్​ ఎఫెక్ట్​: ఈ పీపీఎఫ్​ స్కీమ్​ కాల వ్యవధి 15 సంవత్సరాలు. ఒక సంవత్సరంలో కనిష్ఠంగా రూ.500 నుంచి రూ.1లక్షా 50వేల వరకు జమ చేయవచ్చు. ఆ తరువాత కూడా ఈ స్కీమ్​ను మరో 5 సంవత్సరాలకు పొడిగించుకోవచ్చు.ఈ విధంగా 5 సంవత్సరాల బ్లాక్​ పీరియడ్​తో ఎన్నిసార్లు అయినా ఈ స్కీమ్​ను పొడిగించుకోవడానికి అవకాశం ఉంటుంది.

ఉదాహరణకు.. మీరు రోజుకు రూ.417 పొదుపు చేసి ఈ పథకంలో పెట్టుబడి పెట్టారనుకుందాం. అంటే నెలకు 12వేల 500 మీరు కట్టాలి. ఇలా 15 సంవత్సరాల పాటు కడితే మీ పెట్టుబడి మొత్తం రూ.22లక్షల 50వేలు అవుతుంది. ప్రస్తుత వడ్డీ రేటు ప్రకారం మీకు దాదాపు రూ.40లక్షల 68వేలు అందుతుంది. ఒకవేళ మీరు ఈ డబ్బులు తీసుకోకుండా మరో 5 సంవత్సరాల పాటు ఆ స్కీమ్​లోనే కొనసాగితే.. అప్పుడు మీరు పెట్టుబడి పెట్టిన మొత్తం నెలకు 12వేల 500 చొప్పున 20 సంవత్సరాలకు రూ.30 లక్షలు అవుతుంది. వడ్డీతో కలిపి మీకు వచ్చే రిటర్న్​ రూ.66లక్షల 58వేల వరకు ఉంటుంది. ఇప్పుడు కూడా మీరు డబ్బులు తీసుకోకుండా మరో 5 ఏళ్లు పొడిగిస్తే నెలకు 12వేల 500 చొప్పున 25 సంవత్సరాలకు రూ.37లక్షల 50వేలు పెట్టుబడి పెట్టాలి. మీకు వడ్డీతో కలిపి వచ్చే రాబడి సుమారు కోటి రూపాయల వరకు ఉంటుంది. అంటే ఇక్కడ కాంపౌండింగ్ ఎఫెక్ట్ పని చేసింది. ఈ విధంగా మీరు చిన్న మొత్తాల్లో పొదుపు చేసి, అధిక స్థాయిలో రాబడులను సంపాదించవచ్చు.

ఈ పథకానికి ఎవరు అర్హులు, ఎలా అప్లై చేయాలి:

• ఈ స్కీమ్​లో భారతీయ పౌరులు ఎవరైనా చేరవచ్చు.
• నేరుగా పోస్టాఫీసులకు వెళ్లి ఈ పీపీఎఫ్ అకౌంట్ ఓపెన్ చేయాలి..
• ప్రస్తుతం ఈ పోస్ట్ ఆఫీస్​ పీపీఎఫ్ పథకంలో చేరిన వారికి 7.1 శాతం వడ్డీ అందిస్తున్నారు.
• 15 సంవత్సరాల కాలవ్యవధి తర్వాత మీరు కావాలనుకుంటే డబ్బులు విత్​డ్రా చేసుకోవచ్చు. లేదా 5 ఏళ్ల బ్లాక్ పీరియడ్​ చొప్పున ఎన్నిసార్లు అయినా దానిని పొడిగించుకోవచ్చు.
• అయితే భారతదేశంలో నివసిస్తున్న వారు మాత్రమే పీపీఎఫ్ పొడిగింపునకు అర్హులు. ఇతర దేశాల పౌరసత్వం పొందిన వ్యక్తులు పీపీఎఫ్ ఖాతాలను తెరవడానికి లేదా పొడిగించుకోవడానికి వీలుపడదు.
• ఒకవేళ పీపీఎఫ్ ఖాతాను మరో 5 ఏళ్లపాటు పొడిగించాలని అనుకుంటే, ఖాతా మెచ్యూరిటీ తేదీ కంటే ముందే, సంబంధిత పోస్ట్​ ఆఫీస్​కు​ వెళ్లి దరఖాస్తు సమర్పించాలి.

ట్యాక్స్​ మినహాయింపు: ఈ స్కీమ్​ ఆదాయపు పన్ను చట్టంలోని సెక్షన్ 80C కింద పన్ను మినహాయింపు పొందింది. దీని ప్రకారం మీరు రూ. 1.5 లక్షల పెట్టుబడిపై రాయితీ పొందవచ్చు. పీపీఎఫ్​ వడ్డీపై కూడా పన్ను ఉండదు.

Note: పైన తెలిపిన సమాచారం, సూచనలు అన్నీ మీ అవగాహన కోసం మాత్రమే. వాణిజ్య రంగ నిపుణులు సూచనల ప్రకారమే మేము ఈ సమాచారాన్ని అందిస్తున్నాం. కాబట్టి ఈ ప్లాన్​లో పెట్టుబడి పెట్టేముందు ఇందుకు సంబంధించిన పూర్తి వివరాలు తెలుసుకుని ఇన్వెస్ట్​ చేయడం మంచిది.