LIC సరికొత్త స్కీమ్​ - రోజుకు రూ.200 పొదుపు చేస్తే చాలు - ఒకేసారి చేతికి రూ.1.22 కోట్లు! - LIC New Jeevan Anand

LIC New Jeevan Anand Policy Details : చిన్న మొత్తాల్లో పెట్టుబడి పెట్టి, భవిష్యత్​లో మంచి రాబడి సంపాదించాలని అనుకునేవారి కోసం ఎల్​ఐసీ ఎప్పటికప్పుడు సరికొత్త స్కీమ్స్ తీసుకువస్తుంటుంది. తాజాగా 'న్యూ జీవన్ ఆనంద్' పాలసీని తీసుకువచ్చింది. మరి ఈ పాలసీ బెనిఫిట్స్ ఏమిటో తెలుసుకుందామా?

LIC New Jeevan Anand Policy Details :ప్రస్తుతం లైఫ్‌ ఇన్సూరెన్స్‌ పాలసీని తీసుకోవడం ప్రతి ఒక్కరి జీవితంలో ముఖ్యమైన విషయం. ఎందుకంటే మనల్ని నమ్ముకున్న వారికి, మన తర్వాత కూడా ఎలాంటి ఆర్థిక లోటు ఉండకూడదంటే లైఫ్‌ ఇన్సూరెన్స్ పాలసీని తీసుకోవడం తప్పనిసరి. ఇప్పటికే ఎల్ఐసీ అనేక రకాల పాలసీలను అందిస్తోంది. ఈ క్రమంలోనే అధిక భద్రత, గణనీయమైన లాభాలకు హామీ ఇచ్చే మరొక పాలసీని తీసుకొచ్చింది. అదే 'ఎల్ఐసీ న్యూ జీవన్ ఆనంద్ పాలసీ' (915). ఈ పాలసీ రోజువారీ పొదుపుతో గణనీయమైన ఫండ్‌ను నిర్మించడంలో పాలసీదారులకు సాయపడుతుంది. రోజుకు కనీసం రూ.200 పొదుపు చేస్తే మెచ్యూరిటీ సమయంలో ఏకంగా రూ.1.22 కోట్లు వస్తాయి. మరెందుకు ఆలస్యం ఎల్ఐసీ న్యూ జీవన్ ఆనంద్ పాలసీ గురించి పూర్తి వివరాలు తెలుసుకుందాం రండి.

ఎల్ఐసీ న్యూ జీవన్ ఆనంద్
గణనీయమైన రాబడిని అందించే తక్కువ ప్రీమియం ఉన్న ఎల్ఐసీ పాలసీల్లో న్యూ జీవన్ అనంద్ ఒకటి. ఈ ప్లాన్ ఆర్థిక భద్రతకు భరోసాను ఇస్తుంది. అంతేగాక అనేక మెచ్యూరిటీ ప్రయోజనాలను అందిస్తుంది. ప్రతి నెలా రూ.6,075 రూపాయలు పెట్టుబడి పెట్టి, 35 ఏళ్ల మెచ్యూరిటీ టర్మ్ తర్వాత దాదాపు రూ.1.22 కోట్లు మొత్తాన్ని పొందొచ్చు.

ప్రీమియం చెల్లింపు :
మొదటి ఏడాది ప్రీమియం (జీఎస్టీ 4.5 శాతం)

• ఏడాదికి : రూ.71,274
• ఆరు నెలలకు : రూ.36,041
• మూడు నెలలకు : రూ.18,223
• నెలకు : రూ.6,075

రెండో ఏడాది నుంచి ప్రీమియం (జీఎస్టీ 2.25 శాతం)

• ఏడాదికి : రూ.69,740
• ఆరు నెలలకు : రూ.35,265
• మూడు నెలలకు : రూ.17,830
• నెలకు : రూ.5,944

మెచ్యూరిటీ వివరాలు:

• మొత్తం చెల్లించిన ప్రీమియం : రూ.24,42,421
• ప్రాథమిక హామీ మొత్తం : రూ.25,00,000
• బోనస్ (సుమారు) : రూ.39,37,500
• ఎఫ్ఐబీ (సుమారు) : రూ.57,50,000
• మొత్తం మెచ్యూరిటీ విలువ : రూ.1,21,87,500

ఎల్ఐసీ జీవన్ ఆనంద్ పాలసీ వల్ల కలిగే అదనపు ప్రయోజనాలు
మెచ్యూరిటీ ప్రయోజనాలతో పాటు, పాలసీ మొత్తం విలువను పెంచే అనేక అదనపు రైడర్‌లను ఎల్ఐసీ న్యూ జీవన్ ఆనంద్ పాలసీకి యాడ్ చేసుకోవచ్చు.

• యాక్సిడెంటల్ డెత్, యాక్సిడెంటల్‌ డిజేబిలిటీ రైడర్ : ప్రమాదవశాత్తు మరణం లేదా వైకల్యం సంభవించినప్పుడు ఇన్సూరెన్స్ కవరేజీని అందిస్తుంది.
• యాక్సిడెంట్ బెనిఫిట్ రైడర్ : ప్రమాదం కారణంగా పాలసీదారుడు మరణిస్తే అదనపు హామీ మొత్తాన్ని అందిస్తుంది.
• న్యూ టర్మ్ ఇన్సూరెన్స్ రైడర్ : టర్మ్ ఇన్సూరెన్స్ ప్రయోజనాలను పొడిగిస్తుంది.
• న్యూ క్రిటికల్ బెనిఫిట్ రైడర్ : క్లిష్టమైన అనారోగ్యాలను ఈ పాలసీ కవర్ చేస్తుంది.

ఈ పథకం గురించి మరిన్ని వివరాలు తెలుసుకునేందుకు ఎల్ఐసీ బ్రాంచ్ లేదా అధికారిక వెబ్​సైట్​ను సందర్శించండి.