How To Apply For Tatkal Passport Online : మీరు తత్కాల్ టికెట్ గురించి వినే ఉంటారు. మ‌న తెలుగు రాష్ట్రాల ప్ర‌జ‌లైతే ద‌స‌రా, సంక్రాంతి లాంటి పండ‌గ‌ల స‌మ‌యంలో ఈ మాట ఎక్కువ‌గా వింటారు. కానీ మీరెప్పుడైనా తత్కాల్ పాస్పోర్ట్ గురించి విన్నారా? అస‌లు అలాంటి పాస్పోర్ట్ ఉంటుంద‌నే విష‌యం మీకు తెలుసా? ఇంత‌కీ ఈ తత్కాల్ పాస్పోర్ట్ అంటే ఏమిటి? దాని కోసం ఎలా ఆన్లైన్లో అప్లై చేసుకోవాలి? అనే విషయాలు ఇప్పుడు తెలుసుకుందాం.
తత్కాల్ టికెట్ లాగే, అత్య‌వ‌స‌రంగా ప్ర‌యాణం చేయాల‌ని అనుకునే వారికి ఈ తత్కాల్ పాస్పోర్ట్ను జారీ చేస్తారు. ఈ విధానాన్ని భార‌త విదేశీ వ్య‌వ‌హారాల మంత్రిత్వ శాఖ ప్ర‌వేశ పెట్టింది. వేగంగా పాస్పోర్టులు జారీ చేసేందుకు, అత్య‌వ‌స‌ర సమయాల్లో, చివ‌రి నిమిషంలో త‌ప్ప‌నిస‌రిగా విదేశీ ప్ర‌యాణాలు చేయాల్సి వ‌చ్చిన‌ప్పుడు జారీ చేసే పాస్పోర్టునే 'తత్కాల్ పాస్పోర్ట్' అంటారు. సుదీర్ఘ ద‌ర‌ఖాస్తు ప్ర‌క్రియ లేకుండా, ఎక్కువ కాలం వేచి చూసే అవ‌స‌రం లేకుండా, విదేశీ ప్ర‌యాణాలు చేయాల‌నుకునే వారికి ఇది బాగా ఉపయోగపడుతుంది.
సాధార‌ణంగా ఇండియాలో పాస్పోర్ట్ అప్లికేష‌న్ ప్రాసెస్ కొంచెం క్లిష్టంగా ఉంటుంది. పైగా దీనికి చాలా స‌మ‌యం కూడా ప‌డుతుంది. అందుకే ఏదైనా విదేశీ ప్ర‌యాణం చేయాల‌నుకునే వారు ముందుగానే దీని కోసం అప్లై చేసుకుంటారు. కానీ అనుకోకుండా, అత్య‌వ‌స‌ర సమయాల్లో కొన్ని సార్లు ప్ర‌యాణం చేయాల్సి రావ‌చ్చు. అలాంటి స‌మ‌యంలో పాస్పోర్ట్ లేకుంటే చాలా ఇబ్బందిపడాల్సి వస్తుంది. అలాంటి స‌మ‌స్య‌ను నివారించేందుకే కేంద్ర ప్ర‌భుత్వం 'తత్కాల్ పాస్పోర్ట్' విధానాన్ని తీసుకొచ్చింది. దీని కోసం ఆన్లైన్లోనే చాలా ఈజీగా అప్లై చేసుకోవ‌చ్చు.
తత్కాల్ పాస్పోర్ట్ కోసం కావాల్సిన పత్రాలు
Documents Required For Tatkal Passport :
- అనెక్సర్- ఎఫ్లో వివరించిన వెరిఫికేషన్ సర్టిఫికెట్
- కింది వాటిలోని ఏవైనా మూడు డాక్యుమెంట్లు ఉండాలి.
- ఎలక్ష‌న్ కార్డు
- స‌ర్వీసు ఫొటో ఐడీ కార్డు
- కుల ధ్రువీకరణ పత్రాలు
- స్వాతంత్య్ర స‌మ‌ర యోధుల ఐడీ కార్డులు
- ఆయుధాల లైసెన్స్
- రేష‌న్ కార్డు
- ఆస్తి పత్రాలు
- పింఛ‌ను పత్రాలు
- రైల్వే ఫొటో ఐడీ కార్డు
- పాన్ కార్డు
- బ్యాంకు పాస్బుక్
- స్టూడెంట్ ఐడీ కార్డు (గుర్తింపు పొందిన విద్యాసంస్థ‌లు జారీ చేసినది)
- డ్రైవింగ్ లైసెన్స్
- జ‌న‌న ధ్రువీకరణ ప‌త్రం (బర్త్ సర్టిఫికెట్)
- గ్యాస్ క‌నెక్ష‌న్ బిల్లు
తత్కాల్ పాస్పోర్ట్ కోసం ఎలా అప్లై చేయాలి?
How To Apply For Tatkal Passport :
- ముందుగా పాస్పోర్డ్ సేవా వెబ్సైట్ ఓపెన్ చేయాలి.
- మీ వివరాలు నమోదు చేసి రిజిస్ట్రేష‌న్ చేసుకోవాలి.
- వెంటనే మీకొక ఐడీ, పాస్వర్డ్ క్రియేట్ అవుతుంది.
- ఈ ఐడీ, పాస్వ‌ర్డ్లతో వెబ్సైట్లోకి లాగిన్ కావాలి.
- అక్క‌డ మీకు Fresh & Reissue అనే రెండు ఆప్ష‌న్లు క‌నిపిస్తాయి. మీకు కావాల్సిన దాన్ని ఎంచుకోవాలి.
- త‌ర్వాత Tatkal అనే ఆప్ష‌న్ను ఎంచుకోవాలి.
- అప్లికేష‌న్ ఫార‌మ్లో మీ వివరాలు అన్నీ జాగ్రత్తగా నమోదు చేసి, సబ్మిట్ చేయాలి.
- తత్కాల్ పాస్పోర్ట్ ఫీజును కూడా ఆన్లైన్లోనే చెల్లించాలి.
- తరువాత పేమెంట్కు సంబంధించిన రశీదు ప్రింట్అవుట్ తీసుకోవాలి.
- చివ‌ర‌గా మీ ద‌గ్గ‌ర్లోని పాస్పోర్ట్ సేవా కేంద్రంలో అపాయింట్మెంట్ డేట్ను ఫిక్స్ చేసుకోవాలి. అంతే సింపుల్!
అర్హ‌త విధానాలేంటి ?
Eligibility Criteria For Tatkal Passport : ఈ తత్కాల్ ప‌థ‌కంలో, మీకు పాస్పోర్టు జారీ చేయాలా? వద్దా? అనేది పూర్తిగా పాస్పోర్టు ఆఫీసు చేతిలోనే ఉంటుంది. మీ అత్య‌వ‌స‌ర ప్ర‌యాణానికి గల కార‌ణాలు, ఇత‌ర అంశాల్ని ప‌రిగ‌ణ‌నలోకి తీసుకుని పాస్పోర్టు ఇవ్వాలా? వద్దా? అనేది నిర్ణ‌యిస్తారు. కానీ కొన్ని కేట‌గిరీల‌కు చెందినవారు తత్కాల్ పాస్పోర్ట్ జారీకి అన‌ర్హులు. వారెవ‌రంటే?
1. భారతదేశానికి చెందిన త‌ల్లిదండ్రుల‌కు విదేశాల్లో పుట్టిన పిల్లలు
2. నాచుర‌లైజేష‌న్ ద్వారా పౌర‌స‌త్వం పొందినవారు
3. విదేశాల నుంచి బ‌హిష్క‌ర‌ణ‌కు గురై ఇండియాలో నివ‌సించేవారు
4. విదేశాల నుంచి ఇండియాకు ప్ర‌భుత్వం రప్పించిన వ్యక్తులు
5. పేరు మార్చుకున్నవారు
6. జ‌మ్ము, క‌శ్మీర్, నాగాలాండ్కు చెందిన పౌరులు
7. నాగాలాండ్ బ‌య‌ట నివ‌సించే నాగా తెగ‌కు చెందినవారు
8. ద‌త్త‌తగా తీసుకున్న పిల్లలు
9. తల్లి లేదా తండ్రుల్లో ఎవరో ఒక్కరు మాత్రమే ఉన్న మైన‌ర్లు
10. నాగాలాండ్లో నివ‌సించే మైన‌ర్లు
11. షార్ట్ పాస్పోర్డు వ్యాలిడిటీతో మ‌ళ్లీ అప్లై చేసేవారు
12. పాస్పోర్టు పోగొట్టుకున్నవారు
13. గుర్తు ప‌ట్ట‌లేని విధంగా పాస్పోర్ట్ డ్యామేజ్ అయిన వ్యక్తులు
14. లింగ మార్పిడి చేయించుకున్నవారు
15. త‌మ వ్య‌క్తిగత వివరాలు మార్చుకున్న వ్యక్తులు (సంత‌కం స‌హా పలు వివరాలు మార్చుకున్నవారు)
మంజూరుకు ఎంత స‌మ‌యం ప‌డుతుంది ?
సాధార‌ణ పాస్పోర్ట్ జారీ క‌న్నా, దీనికి త‌క్కువ స‌మ‌య‌మే ప‌డుతుంది. ఒక్క‌సారి మీరు కావాల్సిన ధ్రువ‌ప్ర‌తాలు అన్నింటినీ పాస్పోర్ట్ సేవా కేంద్రంలో స‌మ‌ర్పించిన త‌ర్వాత, అన్నీ క‌రెక్ట్గా ఉంటే, ఒక వారంలోపు తత్కాల్ పాస్పోర్ట్ వ‌చ్చేస్తుంది. దీని త‌ర్వాత పోలీసు వెరిఫికేషన్ ఉంటుంది. ఒకవేళ మీ మీద ఎలాంటి కేసులు లేక‌పోతే, ఒక్క రోజులోనే పాస్పోర్టు మీకు మంజూరు చేస్తారు. ఒకవేళ ఎంక్వైరీ చేయాల్సి ఉన్నా, అది పాస్పోర్ట్ జారీ చేసిన త‌ర్వాతే చేస్తారు.
రూ.5 లక్షల బడ్జెట్లో మంచి కారు కొనాలా? ఈ టాప్-3 మోడల్స్పై ఓ లుక్కేయండి!
నెలకో కొత్త కారులో తిరగాలా? అయితే 'సబ్స్క్రిప్షన్ ప్యాకేజీ'ల గురించి తెలుసుకోండి!
