Fixed Deposit Interest Rates 2024 : మీరు ఎంతో కష్టపడి సంపాదించిన సొమ్మును పొదుపు చేయడం వల్ల ఆర్థికంగా క్లిష్ట సమయాల్లో ఉన్నప్పుడు చాలా ఉపయోగపడుతుంది. అయితే మన దేశంలో చాలా మంది తాము దాచుకున్న డబ్బును బ్యాంకుల్లో ఫిక్స్డ్ డిపాజిట్ చేయడానికే మొగ్గుచూపిస్తారు. అంతర్జాతీయ మార్కెట్లలో హెచ్చుతగ్గులు ఉన్నప్పటికీ వాటితో సంబంధం లేకుండా బ్యాంకులు వడ్డీ రేట్లను చెల్లించడమే దానికి కారణం. అందువల్లనే ఫిక్స్డ్ డిపాజిట్ను సురక్షితమైన పెట్టుబడి మార్గంగా భావిస్తారు. ఫిక్స్డ్ డిపాజిట్పై బ్యాంకులు ఎంత వడ్డీ చెల్లిస్తారు అనే విషయాన్ని మదుపర్లు ముందుగానే తెలుసుకోవడం ముఖ్యం.
నిర్ణీత కాలానికి
ఈ ఫిక్స్డ్ డిపాజిట్లకు ఒక నియమిత కాల వ్యవధి ఉన్నప్పటికీ కొన్ని సార్లు బ్యాంకులు, ఫైనాన్సియల్ సంస్థలు ప్రీమెచ్యూర్ విత్డ్రాకు అనుమతిస్తాయి. అయినప్పటికీ కాలవ్యవధి పూర్తి కాకుండానే ఫిక్స్డ్ డిపాజిట్ను ఉపసంహరించుకోవడం వల్ల కొంత ఫైన్ చెల్లించాల్సి రావచ్చు. ఆర్థిక అస్థిరత, మార్కెట్ హెచ్చుతగ్గులు ఉన్నప్పటికీ ఈ ఫిక్స్డ్ డిపాజిట్లు నిర్ణీత లాభాలను మీకు అందిస్తాయి.
ఏ విధంగా ఫిక్స్డ్ డిపాజిట్ చేయాలి?
ఒక వేళ మీరు ఫిక్స్డ్ డిపాజిట్ చేయాలనుకున్నట్లయితే ముందుగా మీరు ఫిక్స్డ్ డిపాజిట్ అకౌంట్ తీసుకోవాల్సి ఉంటుంది. దేశ వ్యాప్తంగా ఉన్నటువంటి బ్యాంకులు, పోస్టాఫీస్లు, ఫైనాన్సియల్ సంస్థల్లో ఎక్కడైనా మీరు అకౌంట్ను ఓపెన్ చేయవచ్చు. బ్యాంకులు కొన్నిసార్లు సీనియర్ సిటిజన్లు చేసే ఫిక్స్డ్ డిపాజిట్లపై ఆకర్షణీయమైన వడ్డీ రేట్లు ఇస్తుంటాయి. పదవీ విరమణ చేసిన వారు ఒక స్థిరమైన ఆదాయం సంపాదించాలంటే ఈ ఫిక్స్డ్ డిపాజిట్ చేయడం బెస్ట్ ఆప్షన్.
ఫిక్స్డ్ డిపాజిట్పై ఏ బ్యాంక్ ఎక్కువ వడ్డీ రేటు ఇస్తోంది?
ఒక వేళ మీరు ఫిక్స్డ్ డిపాజిట్లో పెట్టుబడి పెట్టాలనుకుంటున్నయితే దేశంలోనే ప్రముఖ బ్యాంకులు అయినటువంటి బ్యాంక్ ఆఫ్ బరోడా, యాక్సిస్ బ్యాంక్, హెచ్డీఎఫ్సీ బ్యాంక్, పీఎన్బీ బ్యాంక్, ఐసీఐసీఐ బ్యాంక్ ఫిక్స్డ్ డిపాజిట్పై ఎంత వడ్డీ రేటును ఇస్తున్నాయి. రూ.1లక్ష ఫిక్స్డ్ డిపాజిట్పై మూడు సంవత్సరాల కాల వ్యవధికి ఏ బ్యాంకు అధిక వడ్డీని ఇస్తుంది అనే విషయాన్ని ఇప్పుడు చూద్దాం.
| బ్యాంకు | వడ్డీ రేటు శాతం | కాలవ్యవధి | రూ.1లక్షకు |
| బ్యాంక్ ఆఫ్ బరోడా | 7.25 శాతం | 3 ఏళ్లు | రూ.1,24,055 |
| యాక్సిస్ బ్యాంక్ లిమిటెడ్ | 7.10 శాతం | 3 ఏళ్లు | రూ.1,23,508 |
| హెచ్డీఎఫ్సీ బ్యాంక్ లిమిటెడ్ | 7 శాతం | 3 ఏళ్లు | రూ.1,23,144 |
| పంజాబ్ నేషనల్ బ్యాంక్ | 7 శాతం | 3 ఏళ్లు | రూ.1,23,144 |
| ఐసీఐసీఐ బ్యాంక్ లిమిటెడ్ | 7 శాతం | 3 ఏళ్లు | రూ.1,23,144 |
