Nitish Kumar Leaves India Bloc : లోక్సభ ఎన్నికల ముందు విపక్ష 'ఇండియా' కూటమికి భారీ షాక్ తగిలే అవకాశాలు కనిపిస్తున్నాయి. కూటమి ఏర్పాటులో కీలక పాత్ర పోషించిన జేడీయూ అధినేత, బిహార్ ముఖ్యమంత్రి నీతీశ్ కుమార్ కూటమి నుంచి వైదొలగుతున్నట్లు వార్తలు వస్తున్నాయి. మళ్లీ బీజేపీతో పొత్తు కుదుర్చుకున్నట్లు తెలుస్తోంది. ఇదే జరిగితే బీజేపీని గద్దె దించాలన్న ఇండియా కూటమి లక్ష్యం బీటలువారనుంది. దేశంలోని కీలక రాజకీయ నేతల్లో ఒకరైన నీతీశ్ కుమార్ కూటములు మారటం, మద్దతు ఉపసంహరించుకోవడం ఇదేమి తొలిసారి కాదు. ఏ పార్టీ గెలిచినా అధికారం మాత్రం తనకే ఉండాలన్నట్లు వ్యవహరించే నీతీశ్, 2013 నుంచి ఇప్పటి వరకు 5 సార్లు తన మిత్ర పార్టీలకు హ్యాండిచ్చారు.
1990లో అప్పటి జనతాదళ్‌ సీనియర్‌ నేత లాలూ ప్రసాద్‌ యాదవ్‌ను బిహార్ ముఖ్యమంత్రిగా చేయడంలో కీలక పాత్ర పోషించడంతో నీతీశ్ కుమార్ పేరు తొలిసారి వెలుగులోకి వచ్చింది. అయితే 1994లో లాలూపై నీతీశ్ తిరుగుబావుటా ఎగురవేశారు. ప్రముఖ సోషలిస్టు నాయకుడు జార్జ్‌ ఫెర్నాండెజ్‌తో కలిసి సమతా పార్టీని ఏర్పాటు చేశారు. 2003లో ఇది శరద్‌ యాదవ్ నేతృత్వంలోని జనతాదళ్‌ (యునైటెడ్‌)లో విలీనమైంది. ఆ తర్వాత జేడీయూ అధ్యక్షుడిగా నీతీశ్‌కుమార్‌ ఎంపికయ్యారు. 2005 అసెంబ్లీ ఎన్నికల్లో బీజేపీతో పొత్తు పెట్టుకుని బిహార్ ముఖ్యమంత్రి అయ్యారు నీతీశ్ కుమార్.
17 ఏళ్ల బంధానికి గుడ్బై
బీజేపీ-జేడీయూ పార్టీలు 1998 నుంచి పొత్తులో ఉన్నాయి. అయితే 2014 సార్వత్రిక ఎన్నికలకు ముందు ప్రధాని అభ్యర్థిగా ఎవరిని ఉంచాలన్నదానిపై ఎన్డీయేలో ప్రతిష్టంభన నెలకొంది. ఆ సమయంలో ఎన్డీయే కూటమిలో సీనియర్‌ నేతగా పేరున్న నీతీశ్ పేరు కూడా వినిపించింది. అయితే, ప్రధాని అభ్యర్థిగా అప్పటి గుజరాత్‌ ముఖ్యమంత్రి నరేంద్ర మోదీ పేరును బీజేపీ అధిష్ఠానం ఖరారు చేసింది. ఈ నిర్ణయాన్ని తీవ్రంగా వ్యతిరేకించిన నీతీశ్ 2013 జూన్‌ 16న కూటమి నుంచి తొలిసారిగా బయటకి వచ్చేశారు.
మహాఘట్బంధన్‌తో ప్రయాణం
2015 అసెంబ్లీ ఎన్నికల్లో జేడీయూ ఒంటరిగానే బరిలోకి దిగింది. అయితే ప్రభుత్వాన్ని ఏర్పాటు చేసేందుకు అవసరమైన స్థానాలను చేజిక్కించుకోలేక పోయింది. అప్పటికే బీజేపీతో వివాదాలు పెరగడం వల్ల ఆర్జేడీ, కాంగ్రెస్‌తో కలిసి నీతీశ్‌కుమార్‌ మహాఘట్బంధన్ను ఏర్పాటు చేశారు. ఆ రెండు పార్టీల మద్దతుతో నాలుగోసారి ముఖ్యమంత్రిగా బాధ్యతలు స్వీకరించారు. కూటమిలో వ్యతిరేకత వ్యక్తం కాకుండా ఆర్జేడీకి చెందిన తేజస్వీ యాదవ్‌కు ఉపముఖ్యమంత్రి పదవి ఇచ్చారు.
ఆర్జేడీకి షాకిచ్చి
బిహార్ డిప్యూటీ సీఎం తేజస్వీ యాదవ్‌పై 2017లో తీవ్ర అవినీతి ఆరోపణలు వచ్చాయి. దీంతో డిప్యూటీ సీఎం పదవి నుంచి వైదొలగాలని నీతీశ్ కుమార్ తేజస్వీని కోరారు. అయితే ఆర్జేడీ శాసనసభా పక్షం అందుకు నిరాకరించింది. ఈ క్రమంలో ఇరువురు నేతల మధ్య మనస్పర్థలు వచ్చి 2017 జులై 26 తన ముఖ్యమంత్రి పదవికి రాజీనామా చేశారు నీతీశ్ కుమార్. ప్రతిపక్ష బీజేపీతో జట్టుకట్టి గంటల వ్యవధిలోనే మరోసారి సీఎంగా ప్రమాణ స్వీకారం చేశారు.
అవకాశం ఇవ్వనందుకు గుడ్బై
2019 సార్వత్రిక ఎన్నికల్లో ఎన్డీయే తరఫున నీతీశ్ కీలక ప్రచారం నిర్వహించారు. జాతీయ రాజకీయాల్లోకి వెళ్లాలనుకున్న నిర్ణయాన్ని విరమించుకున్న ఆయన 2020 అసెంబ్లీ ఎన్నికల అనంతరం బీజేపీతో కలిసి ప్రభుత్వాన్ని ఏర్పాటు చేశారు. అప్పటి కేంద్ర మంత్రి, లోక్ జనశక్తి పార్టీ అధ్యక్షుడు రామ్‌విలాస్‌ పాసవాన్‌ మృతి చెందడం వల్ల ఆయన స్థానాన్ని భర్తీ చేసేందుకు 2020లో బీజేపీకి చెందిన డిప్యూటీ సీఎం సుశీల్‌ కుమార్ మోదీకి అవకాశం వచ్చింది. అప్పటి నుంచి బీజేపీతో అంటీముట్టనట్లుగా వ్యవహరిస్తూ వచ్చిన ఆయన చివరికి 2022 ఆగస్టు9న ఎన్డీయే నుంచి బయటకి వచ్చినట్లు ప్రకటించారు నీతీశ్ కుమార్.
ఆర్జేడీతో దోస్తీ
ఆ తర్వాతి రోజే ఆర్జేడీ, కాంగ్రెస్‌, సీపీఐతో కలిసి మళ్లీ ప్రభుత్వాన్ని ఏర్పాటు చేశారు నీతీశ్. డిప్యూటీ సీఎంగా తేజస్వీ యాదవ్ కొనసాగుతున్నారు. ఈలోగా సార్వత్రిక ఎన్నికలు సమీపించడం వల్ల ప్రతిపక్షాలతో కలిసి బీజేపీకి వ్యతిరేకంగా 'ఇండియా' కూటమిని ఏర్పాటు చేయడంలో కీలకపాత్ర పోషించారు నీతీశ్ కుమార్. అయితే, ఇక్కడ కూడా తనకు తగిన ప్రాధాన్యం లభించడం లేదన్న కారణంతో మరోసారి రూట్‌ మార్చేందుకు సిద్ధమవుతున్నారు.
మసకబారిన ప్రజాదరణ
గత కొన్నేళ్లుగా నీతీశ్ కూటములు మార్చడం రాజకీయంగా చర్చనీయాంశమైంది. 8 పర్యాయాలు ముఖ్యమంత్రిగా బాధ్యతలు నిర్వర్తించిన వ్యక్తి చీటికిమాటికి పదవుల కోసం పార్టీ విధానాలను పక్కన పెట్టి వ్యవహరిస్తుండటంపై అంతర్గతంగానూ వ్యతిరేకత వ్యక్తమవుతోంది. మరోవైపు ప్రజల నుంచి కూడా ఆదరణ కొరవడుతోంది. గత ఎన్నికల ఫలితాలే అందుకు నిదర్శనం. 2010 అసెంబ్లీ ఎన్నికల్లో 115 స్థానాలను కైవసం చేసుకున్న జేడీయూ, 2015లో 71 స్థానాలకు పడిపోయింది. 2020 ఎన్నికల్లో కేవలం 43 స్థానాలకే పరిమితమైంది. తాజా పరిస్థితుల నేపథ్యంలో ఇప్పటికే పలుమార్లు దెబ్బతిన్న బీజేపీ మళ్లీ అతడిని చేర్చుకుంటుందా? ఏ హామీతో మళ్లీ కాషాయ పార్టీతో చేతులు కలపాలనుకుంటున్నారు? అనే అంశాలపై ఉత్కంఠ నెలకొంది. మరోవైపు ఇండియా కూటమి ఏర్పాటుకు తొలుత బాటలు వేసిన వ్యక్తే దూరంగా వెళ్లిపోవడం రాజకీయంగానూ దుమారం రేపుతోంది.
మోదీపై ప్రశంసలు, 'ఇండియా'పై విమర్శలు!- నీతీశ్ రూట్‌ కూడా మారనుందా?
'ఇండియా' కూటమికి నీతీశ్ గుడ్ బై? NDAలోకి ఎంట్రీ! అదే కారణమా?
