Murg Musalam Recipe : చికెన్తో.. కర్రీలు, ఫ్రైలు, రకరకాల బిర్యానీలు.. ఇలా వందల రకాల రెసిపీలు ఉన్నాయి. కానీ.. ఇప్పటికీ మెజారిటీ జనం ఇళ్లలో రెగ్యులర్గా ఒకే రకం కర్రీ చేసుకుంటుంటారు. కానీ.. కొత్త రకం వంటలను ట్రై చేసినప్పుడే కదా.. చికెన్ను సరికొత్తగా ఆస్వాదించగలిగేది! అందుకే.. ఈసారి ఒక లెజెండరీ చికెన్ రెసిపీని మీకు పరిచయం చేస్తున్నాం. అదే.. "ముర్గ్ ముసల్లం". జాతిరత్నాలు సినిమాలో ఈ రెసిపీ గురించి ఓ స్పెషల్ సీన్ ఉంటుంది. అలా.. ఈ రెసిపీ కూడా నేటి జనరేషన్కు ఓ జాతిరత్నమైంది.
నిజానికి.. ఇది ఒక పురాతన మొఘల్ వంటకం. దీన్ని ఒక్కసారి టేస్ట్ చేశారంటే.. వదిలిపెట్టరు. దీని టేస్ట్ మాత్రమే కాదు.. ఈ రెసిపీలో చికెన్ ను వాడే విధానంగా కూడా సరికొత్తగా ఉంటుంది. చికెన్ ను ముక్కలుగా చేసి కుక్ చేయడం మనకు తెలుసు. కానీ.. ఈ ముర్గ్ ముసల్లం రెసిపీలో.. డ్రెస్సింగ్ చేసిన కోడి మొత్తాన్ని యాధివిధిగా వాడుతారు. అంటే.. ముక్కలుగా కట్ చేయడం ఉండదు. మొత్తం కోడినే నేరుగా కుక్ చేస్తారు. మరి.. ఈ వెరైటీ రెసిపీని ఎలా చేయాలో ఇప్పుడు చూద్దాం.
ముర్గ్ ముసల్లం తయారీకి కావాల్సిన పదార్థాలు :
- డ్రెస్సింగ్ చేసిన కోడి - ఒకటి
- నిమ్మరసం - 2 టేబుల్స్పూన్
- నానబెట్టుకున్న కుంకుమ పువ్వు వాటర్- టేబుల్స్పూన్
- పసుపు- టీస్పూన్
- కారం- టేబుల్స్పూన్
- గరం మసాలా- టేబుల్స్పూన్
- ధనియాల పొడి- టేబుల్స్పూన్
- ఉప్పు రుచికి సరిపడా
- నూనె- సరిపడా
- బాయిల్డ్ ఎగ్స్- 4
- టమాటా ఫ్యూరీ -కప్పు
- బ్రౌన్ ఆనియన్స్ పేస్ట్- అరకప్పు
- అల్లం వెల్లుల్లి పేస్ట్- 2 టేబుల్ స్పూన్లు
- బాదం పేస్ట్ - అరకప్పు
- పెరుగు - కప్పు
- ఫ్రెష్ క్రీమ్- అరకప్పు
- లవంగాలు-4
- దాల్చిన చెక్క- కొద్దిగా
- యాలకులు - 5
ముర్గ్ ముసల్లం తయారీ విధానం :
- ముందుగా ఒక గిన్నెలో నిమ్మరసం, కుంకుమ పువ్వు వాటర్, కారం, గరం మసాలా, పసుపు కొద్దిగా నూనె వేసుకుని బాగా కలుపుకోవాలి. ఈ మిశ్రమంలో ఉడికించిన గుడ్లను వేసి.. వాటికి కూడా మసాలా పట్టించాలి.
- ఆ తర్వాత కోడికి కత్తితో అక్కడక్కడా గాట్లు పెట్టాలి. చికెన్కు మసాలా పట్టేందుకు ఇలా చేయాలి.
- ఇప్పుడు ఆ మసాలా మిశ్రమాన్ని కోడికి పూర్తిగా పట్టించాలి. బయట బాడీతోపాటు చికెన్ లోపల కుహరంలో కూడా బాగా రుద్ది మసాలా పట్టించాలి.
- ఇలా మసాలా పట్టించిన కోడిని కనీసం 2 గంటల పాటు పక్కన పెట్టాలి. అవకాశం ఉంటే రాత్రంతా ఫ్రిజ్ లో పెడితే ఇంకా బాగుంటుంది.
- తర్వాత.. కోడి స్టమక్లో ఉడికించిన ఎగ్స్ పెట్టాలి. అవి బయటకి రాకుండా కోడి రెండు కాళ్లను దారంతో కట్టేయాలి.
- ఈ ప్రాసెస్ తర్వాత కోడిని ఒక అరగంట సేపు పక్కన పెట్టుకోవాలి. ఈ గ్యాప్లో మసాలా చక్కగా కోడికి పడుతుంది.
- ఇప్పుడు ఒక గిన్నెలో టమాటా ఫ్యూరీ (టమాటా గుజ్జు), బ్రౌన్ ఆనియన్ పేస్ట్(ముందుగానే ఉల్లిగడ్డను కట్ చేసుకొని ఆయిల్లో వేయించుకొని.. వాటిని మిక్సీ పట్టుకోవాలి.) అల్లం వెల్లుల్లి పేస్ట్, ధనియాల పొడి, బాదం పేస్ట్, పెరుగు, ఫ్రెష్ క్రీమ్, సరిపడినంత ఉప్పు వేసుకుని బాగా కలుపుకోవాలి.
- తర్వాత చికెన్ ఉడికించడానికి ఒక పెద్ద ఐరన్ కడాయిలో ఆయిల్ పోసి హీట్ చేయాలి. అలాగే ఇందులో కొద్దిగా నెయ్యి కూడా యాడ్ చేసుకోవాలి.
- ఈ ఆయిల్లో లవంగాలు, ఇలాచి, దాల్చిన చెక్క వేసుకోవాలి.
- ఇప్పుడు మ్యారినేట్ చేసుకున్న చికెన్ని వేసి మూత పెట్టి ఉడికించుకోవాలి.
- ఒకవైపు కోడి మొత్తం ఉడికిందని నిర్ధారించుకున్న తర్వాత.. రెండవవైపు తిప్పాలి.
- ఇప్పుడు టమాటా ప్యూరీతో చేసిన మిశ్రమాన్ని చికెన్లో వేసుకోవాలి.
- కుక్ అవుతున్న కోడి అడుగు అంటుకోకుండా.. మధ్య మధ్యలో తిప్పుతూ 20 నుంచి 25 నిమిషాల సేపు ఉడికించుకోవాలి.
- గ్రేవీ చిక్కగా మారిన తర్వాత.. కొద్దిగా రోజ్ వాటర్ యాడ్ చేసుకుంటే సరిపోతుంది.
- అంతే.. నోరూరించే ముర్గ్ ముసల్లం రెసిపీ రెడీ అయిపోయినట్టే..
- దీనిని రోటీ, పుల్కాలతో తింటే టేస్ట్ అద్దిరిపోతుందంటే నమ్మాల్సిందే.
- ఈ అరుదైన రెసిపీని ఈ సండే మీ ఇంట్లో తయారు చేయండి. ఇంటిల్లిపాదీ ఆనందంగా ఆస్వాదించండి.
ఇవి కూడా చదవండి :
రెస్టారెంట్ స్టైల్ అపోలో చికెన్ రెసిపీ - ఈ వర్షాకాలంలో రుచి చూడాల్సిందే గురూ!
సండే స్పెషల్ : జింజర్ పెప్పర్ చికెన్ రెసిపీ - ఆహా ఏమి రుచి అంటారంతే!
