Child Climbed Mount Everest : హిమాచల్ ప్రదేశ్లోని బిలాస్పుర్కు చెందిన ఆరేళ్ల బాలుడు ప్రపంచంలోనే అత్యంత ఎత్తైన ఎవరెస్ట్ శిఖరం బేస్ క్యాంప్‌లో త్రివర్ణ పతాకాన్ని ఎగురవేశాడు. అనేక ప్రతికూల పరిస్థితులను తట్టుకుని కూడా ఆ బాలుడు తల్లిదండ్రులతో కలిసి తన లక్ష్యాన్ని సాధించాడు. ప్రస్తుతం యువన్ అందరి ప్రశంసలు అందుకుంటున్నాడు.
బిలాస్‌పుర్ జిల్లాలోని జుఖాలా ప్రాంతానికి చెందిన యువన్ కొన్నేళ్లుగా తన తల్లిదండ్రులతో కలిసి దుబాయ్లో ఉంటున్నాడు. యువన్ తండ్రి సుభాశ్ అక్కడ ఓ ప్రైవేట్ సంస్థలో ఉద్యోగం చేస్తున్నారు. యువన్ మొదటి తరగతి చదువుతున్నాడు. కొన్ని నెలల క్రితం మౌంట్ ఎవరెస్ట్ బేస్ క్యాంప్కు చేరుకోవాలన్న కోరికను తన తల్లిదండ్రులతో చెప్పాడు యువన్. ఆ తర్వాత ట్రెక్కింగ్ కోసం యువన్ ఆరు నెలల పాటు విశ్రాంతి లేకుండా కఠిన శిక్షణ తీసుకున్నాడు. స్విమ్మింగ్, మార్షల్ ఆర్ట్స్, రన్నింగ్‌లో కూడా ప్రావీణ్యం పొందాడు.
"మా ప్రయాణం దుబాయ్ నుంచి ప్రారంభమైంది. మేం మొదట కాఠ్మాండూ చేరుకున్నాం. అక్కడ నుంచి మా స్నేహితులతో కలిసి లుక్లాకు విమానంలో వెళ్లాం. ఆ తర్వాత గైడ్ సహాయంతో ఏప్రిల్ 8వ తేదీన ట్రెక్కింగ్ ప్రారంభించాం. 11 రోజుల్లో ఎవరెస్ట్ బేస్ క్యాంప్కు చేరుకున్నాం. 8 రోజులు ట్రెక్కింగ్ చేశాం. గైడ్ సలహా మేరకు రెండు రోజులు విశ్రాంతి తీసుకున్నాం"
- సుభాశ్ చంద్ర, యువన్ తండ్రి
"మౌంట్ ఎవరెస్ట్ బేస్ క్యాంప్కు చేరుకోవడం చాలా కష్టం. అక్కడి ఉష్ణోగ్రతల మధ్య ట్రెక్కింగ్ చేయడం మరింత కష్టం. యువన్ తీసుకున్న శిక్షణ వల్ల ఎలాంటి సమస్యలు లేకుండా ట్రెక్కింగ్ పూర్తి చేశాం" అని సుభాశ్ చంద్ర తెలిపారు. యువన్ ఎవరెస్ట్ బేస్ క్యాంప్కు చేరుకున్న తర్వాత హిమాచల్ ప్రదేశ్లోని స్వగ్రామంలో సంతోషకరమైన వాతావరణం నెలకొంది. తమ ప్రాంతానికి చెందిన ఓ చిన్నారి ఎంతో కష్టమైన పనిని సుసాధ్యం చేసినందుకు గర్వపడుతున్నట్లు స్థానికులు తెలిపారు.
అతిపిన్న వయసులోనే!
కొన్నినెలల క్రితం, మధ్యప్రదేశ్లోని భోపాల్కు చెందిన రెండున్నరేళ్ల చిన్నారి సిద్ధి మిశ్ర అతిపిన్న వయసులోనే ఎవరెస్ట్ పర్వత బేస్క్యాంపుపైకి చేరుకుంది. దీంతో కేవలం రెండున్నరేళ్ల వయసులోనే ఎవరెస్ట్ బేస్ క్యాంప్ ఎక్కిన చిన్నారుల్లో ఒకరిగా నిలిచింది. ఈ పూర్తి వార్త కోసం ఇక్కడ క్లిక్ చేయండి.
