பாடம் நடத்திக் கொண்டு இருந்த ஆசிரியர் சுருண்டு விழுந்து பலி - மாணவர்கள் அதிர்ச்சி!

திருச்சி: ஸ்ரீரங்கம் இந்திரா நகர் பகுதியில் பழமை வாய்ந்த அரசு ஆண்கள் மேல்நிலைப்பள்ளி உள்ளது. இப்பள்ளியில் கடந்த 23 வருடங்களாக தொடர்ந்து கணித ஆசிரியராக பாண்டுரங்கன் என்பவர் பணிபுரிந்து வருகிறார். இந்த நிலையில் நேற்று (மார்ச். 22) வழக்கம் போல் பள்ளி செயல்பட்டுக் கொண்டு இருந்தது. 

கணித ஆசிரியர் பாண்டுரங்கன் வகுப்பறையில் ஒன்பதாம் வகுப்பு மாணவர்களுக்கு கணக்கு பாடம் சொல்லிக் கொடுத்துக் கொண்டிருந்தார். மாணவர்களுக்கு பாடம் சொல்லி கொண்டு இருக்கும் போது பிற்பகல் சுமார் 3 மணியளவில் கணித ஆசிரியர் பாண்டுரங்கன் திடீரென மயங்கி கிழே விழுந்துள்ளார். 

உடனே பதற்றம் அடைந்த மாணவர்கள் உடனடியாக அருகில் இருந்த சக ஆசிரியர்கள் மற்றும் தலைமை ஆசிரியரிடம் தகவல் தெரிவித்தனர். உடனே அரசு மருத்துவமனைக்கு தகவல் தெரிவிக்கப்பட்டு ஆம்புலன்ஸ் வரவழைக்கப்பட்டது. விரைந்து வந்த ஆசிரியர்கள் மயங்கி விழுந்த ஆசிரியர் பாண்டுரங்கனை மீட்டு ஆம்புலன்ஸ் மூலம் அருகில் உள்ள திருச்சி ஸ்ரீரங்கம் அரசு மருத்துவமனைக்கு அழைத்து சென்றனர். 

அங்கு அவரை பரிசோதனை செய்த மருத்துவர்கள் ஆசிரியர் பாண்டுரங்கன் வரும் வழியிலேயே இறந்து விட்டார் என்றும்‌ மாரடைப்பு காரணமாக இறப்பு ஏற்பட்டதாகவும் தெரிவித்துள்ளனர். இதனை அடுத்து ஆசிரியர் பாண்டுரங்கன் உயிரிழந்த தகவலை அவரது மனைவி மற்றும் உறவினர்களுக்கு மற்றும் தமிழக பள்ளி கல்வித்துறை அதிகாரிகளுக்கு சக ஆசிரியர்கள் தொலைபேசி வாயிலாக தகவல் தெரிவித்தனர்.

 தொடர்ந்து அமரர் ஊர்தி மூலம் அவரது சொந்த ஊரான கடலூர் மாவட்டம் விருத்தாச்சலத்திற்கு ஆசிரியர் பாண்டுரங்கனின் உடல் இறுதி அஞ்சலிக்காக கொண்டு செல்லப்பட்டது. கணக்கு பாடத்தை கண்டு பயந்தவர்கள் மற்றும் தேர்வில் தோல்வி அடையும் பல மாணவர்களை தனி கவனம் எடுத்து தேர்ச்சியடைய வைத்தவர் ஆசிரியர் பாண்டுரங்கன் என சக ஆசிரியர்கள் தெரிவிக்கின்றனர். 

நன்கு படிக்கும் மாணவர்களை மேலும் ஊக்கம் ஏற்படுத்தி படிப்பிலும், விளையாட்டிலும் மாநில அளவில் வெற்றியடையச் செய்தவர்  ஆசிரியர் பாண்டுரங்கன் என சக ஆசிரியர்கள் கூறுகின்றனர். வகுப்பறையில் மாணவர்களுக்கு பாடம் கற்பிக்கும் பொழுது மாரடைப்பு ஏற்பட்டு கணித ஆசிரியர் உயிரிழந்த சம்பவம் மாணவர்கள் மற்றும் சக ஆசிரியர்கள் மத்தியில் பெரும் சோகத்தையும் அதிர்ச்சியையும் ஏற்படுத்தி உள்ளது. 

கணித ஆசிரியர் பாண்டுரங்கன் மறைவுக்கு பள்ளி மாணவர்கள், ஆசிரியர்கள், பள்ளிக் கல்வித் துறை அதிகாரிகள் இரங்கல் தெரிவித்து வருகின்றனர்.