அழகான, ஆரோக்கியமான கூந்தல் வேண்டும் என்பது பலரது ஆசை. கூந்தல் இருந்தாலே அது நமக்குள் ஒரு தன்நம்பிக்கையும், உற்சாகமும் ஏற்படும். அப்படிப்பட்ட ஒரு பளபளப்பான கூந்தலைப் பெற ஏங்காத பெண்கள் இருக்கவே முடியாது . ஆனால் அதைப் பெற நம் அதிகம் செலவு செய்ய வேண்டியதாக இருக்கிறது. விலை உயர்ந்த பொருட்களை வாங்கி கூந்தலை வளர்க்கப் போராடுகிறோம். ஆனால் அது மட்டும் போதாது, நமது அன்றாட வாழ்க்கையில் சில விஷயங்களை முறையாக கடைப்பிடிக்க வேண்டும் எனவும், கூந்தலுக்காக நாம் தேர்வு செய்யும் ஒவ்வொன்றிலும் கவனம் செலுத்த வேண்டும் எனவும் கூறுகிறார் முடி ஆரோக்கியத்தில் நிபுணத்துவம் பெற்ற அழகியல் மருத்துவர் சாரு சிங்.
ஊட்டச்சத்து: அழகான கூந்தலில் ஆரம்பம் ஆரோக்கியமான உடலுடன் தொடர்புடையது என்கிறார் மருத்துவர் சாரு சிங். உணவுகளில் வைட்டமின், தாதுக்கள் மற்றும் ஆரோக்கியமான கொழுப்புச் சத்துக்களைச் சரிவிகிதம் எடுத்துக்கொள்ள வேண்டும். ஒமேகா கொழுப்பு நிறைந்த காள மீன் (salmon fish) வகை, கீரை, முட்டை, வெண்ணெய், நட்ஸ் உள்ளிட்ட உணவுகள் உடல் ஆரோக்கியத்திற்கும், முடி வளர்ச்சியைத் தூண்டுவதற்கும் பெரிதும் உதவும். அதனுடன் நாள்தோறும் உடலுக்குத் தேவையான அளவு தண்ணீர் குடிக்க வேண்டும். இது முடியின் ஈரப்பதத்தை உறுதி செய்யும்.
முடியின் சுத்திகரிப்பில் கவனம்: தலைகுளிக்கும்போது நாம் பயன்படுத்தும் ஷாம்பு மற்றும் கண்டிஷ்னர்கள் தேர்வு செய்வதில் பிரத்தியேகமான கவனம் செலுத்த வேண்டும். லேசான ஷாம்பு மற்றும் கண்டிஷனர் வகைகளைத் தேர்வு செய்யுங்கள். இது உங்கள் கேசத்தில் உருவாகும் இயற்கையான எண்ணையை அகற்றாமல் பாதுகாக்கும், முடி உதிர்வைக் கட்டுப்படுத்தும். மேலும், நீங்கள் தலையில் ஷாம்பு தேய்த்துக் குளிக்கும்போது உச்சம் தலையில் மென்மையாக தெய்த்துக்கொடுங்கள் இது உடலில் ரத்த ஓட்டத்தைத் தூண்டி ஆரோக்கியமான முடி வளர உதவி செய்யும்.
முடிக்கு வெப்பம் கொடுப்பதைத் தவிர்க்கவும்: அழகிற்கு முக்கியத்துவம் கொடுக்கும் பலர் ஆரோக்கியத்திற்கு முக்கியத்துவம் கொடுப்பது இல்லை. அழகாக இருக்க வேண்டும் என்பதற்காக ஹேர் ஸ்ட்ரைட்டனிங், கர்லிங் அயர்ன்கள், ட்ரையர் உள்ளிட்ட சூடான கருவிகளைப் பயன்படுத்துகின்றனர். இதைக் குறைப்பது மிக அவசியமான ஒன்று. மேலும், அது தேவைப்படும் பட்சத்தில் ஸ்டைலிங் செய்வதற்கு முன்பு வெப்பப் பாதுகாப்பு ஸ்ப்ரேவை பயன்படுத்துங்கள். முடிந்தவரை இயற்கையான சிகை அலங்காரம் மேற்கொண்டு முடிக்கு வெப்பத்திலிருந்து விடுதலை கொடுங்கள்.
புற ஊதா கதிர்களால் முடிக்குப் பாதிப்பு: நம் சருமத்தைப் போலவே, தலைமுடியும் சூரிய ஒளியால் பாதிக்கப்படலாம். புற ஊதா கதிர்கள் முடியில் அதிகம் படும்போது முடியின் நிறம் மங்கிப்போக வாய்ப்பு இருக்கிறது. இதனால் வெளியில் செல்லும்போதோ அல்லது வேலை செய்யும்போதோ முடியைப் பாதுகாக்கும் வகையில் தொப்பி அணியுங்கள். அல்லது யூவி ஹேர் ஸ்ப்ரேவை பயன்படுத்துங்கள்.
கூந்தல் ஈரமாக இருக்கும்போது கவனிக்க வேண்டியவை: ஈரமான கூந்தல் சேதமடைய அதிக வாய்ப்பு இருக்கிறது. எனவே அந்த நேரத்தில் கூந்தலை மிகக் கவனமாகக் கையாள வேண்டும். முடிகள் ஒன்றோடொன்று சிக்கிக் கிடப்பதைச் சரி செய்ய விரிந்த பல் கொண்ட சீப்பு அல்லது சிக்குவாரி (சிணுக்கோலி) பயன்படுத்துங்கள். இதை கையாளும்போது முடியின் கீழ் இருந்து சிக்கை உடைத்து மேலே வரை கொண்டு செல்ல வேண்டும். அதேபோல் முடியில் இருக்கும் ஈரத்தை மென்மையான துணி கொண்டு மெதுவாகத் துடைத்து எடுக்க வேண்டும். இது முடி உடைவை தவிர்க்கும்.
முடி டிரிம் (Trim) செய்வதை வழக்கத்தில் வையுங்கள்: முடியின் ஆரோக்கியத்தை உறுதி செய்வதில் முடியை வெட்டுவதும் ஒன்று. இது குறித்து பலரும் தெளிவு பெறவில்லை என்றே கூறலாம். முடியை வெட்ட வேண்டும் என்பது முடியின் கீழ் பாகத்தில் சிறிது சிறிதாகத் துண்டாகி இருக்கும் முடிகளை டிரிம் செய்ய வேண்டும். இது 6 முதல் 8 வார இடைவெளியில் வழக்கமாக மேற்கொள்ள வேண்டிய நடைமுறை. இது முடியின் நீளத்தைப் பராமரிக்க உதவி, ஒட்டுமொத்த முடியின் ஆரோக்கியத்தைப் பாதுகாக்கிறது.
மன அழுத்தத்தைக் குறைக்கவும்: மன அழுத்தம் முடி உதிர்தல் மற்றும் முடி தொடர்பான பிற பிரச்சனைகளுக்கு வழிவகை செய்யும் என்கிறார் மருத்துவர் சாரு சிங். உடற்பயிற்சி, யோகா, தியானம் மற்றும் சரியான உறக்கம் உள்ளிட்டவற்றை அன்றாட வாழ்கையில் மேற்கொள்ளுங்கள் இது மன அழுத்தத்தைக் குறைத்து உடல் மற்றும் கூந்தல் ஆரோக்கியத்திற்கு பெரும் பங்காற்றும்.
ஆரோக்கியமான, அழகான கூந்தலை பெறுவது உங்கள் அன்றாட உணவுப் பழக்க வழக்கம், சத்தான உணவு, மென்மையான கூந்தல் பராமரிப்பு, ஒட்டுமொத்த நல் வாழ்க்கை முறையையும் உள்ளடக்கியதாக இருக்கிறது என்கிறார் மருத்துவர் சாரு சிங். நிபுணரின் இந்த பரிந்துரைகளைப் பின்பற்றி ஆரோக்கியமான உடல் மற்றும் அழகான கூந்தலைப் பெருங்கள். இது உங்கள் வாழ்வில் புதிய நம்பிக்கையும், ஆற்றலையும் வழங்கும்.
இதையும் படிங்க: IVF Day 2023:உலக செயற்கை கருத்தரிப்பு நாள்: குழந்தையின்மையால் போராடும் தம்பதிகளின் நம்பிக்கை.!
