குளிர்காலத்தில் வேர் காய்கறிகளை ஏன் உட்கொள்ள வேண்டும்? தெரிந்துகொள்ளுங்கள்..!

Root Vegetables health Benefits in Tamil: குளிர் காலத்தில் மட்டுமே கிடைக்கும் சில வகை வேர் காய்கறிகள் தற்போதைய சூழலில் அனைத்துக் காலகட்டங்களிலும் கிடைக்கிறது. ஆனால் அந்த காய்கறிகளை அது விளையும் சீசலில் உட்கொள்வதால் கிடைக்கும் நன்மைகள் குறித்துப் பார்க்கலாம்.

சென்னை: குளிர்காலத்தின் குளுகுளுப்பு நம்மை மகிழ்வடைய செய்தாலும். குளிர்காலம் நம்மை சோம்பேறியாக்கிவிடும். குளிர் அதிகரிக்க அதிகரிக்க படுக்கையை விட்டு எழ மனம் விரும்பாது. போர்வைக்குள்ளே இருந்து உடலின் வெப்பத்தை தக்க வைத்துக்கொள்ளவே மனம் எண்ணும்.

இந்த சமயத்தில் உடலின் மெட்டபாலிசம் குறைய ஆரம்பிக்கும். நமக்கு உடல் உழைப்பும் குறைந்து, அனைத்து கலோரிகளும் சேர்ந்து உடல் எடையை அதிகரிக்க செய்யும். ஆகவே விழிப்புடன் இருக்க வேண்டியது அவசியம். சரியான உணவுமுறைகளை கையாள்வதன் மூலமாக குளிர்காலத்திலும் தடையில்லாமல் டயட்டை மேற்கொள்ள முடியும். இதற்கு ஐந்து வேர் காய்கறிகள் (Root Vegetables) மட்டும் போதும்.

ஏன் வேர் காய்கறிகள்: குளிர் காலத்தில் பொதுவாகச் சர்க்கரை வள்ளிக் கிழங்கு, பீட்ரூட், இஞ்சி, டர்னிப், கேரட் உள்ளிட்ட பல வேர் காய்கறிகள் மற்ற காய்கறிகளை விட விளைச்சல் அதிகமாக இருக்கும். பனி காரணமாக மற்ற காய்கறிகள் அழுகிப் போகுதல், விளைச்சல் பாதிப்படைதல் உள்ளிட்டவை இருக்கும். ஆனால் வேர் காய்கறிகள் மலிவான விலையில் அதிகமாகவே கிடைக்கும்.

இந்த காய்கறிகளைக் குளிர் காலத்தில் நாம் உட்கொள்ளும்போது உடலின் வெப்ப நிலையைச் சரியான கட்டுப்பாட்டில் வைத்திருக்க முடியும். மேலும், குளிர் காலத்தில் பொதுவாகச் செரிமான பிரச்சனை ஏற்பட வாய்ப்பு உள்ளது. இந்த வேர் காய்கறிகள் செரிமான பிரச்சனைகளுக்குத் தீர்வாவதுடன் உங்களுக்குத் தேவையான முழுமையான ஊட்டச்சத்துக்களையும் வழங்கும். ஆற்றல் குறைபடாமல் பாதுகாத்து உங்கள் அன்றாட வேலைகள் பாதிப்படையாத வகையில் வைத்திருக்கும்.

பருவகாலங்களில் கிடைக்கும் காய்கறி மற்றும் பழ வகைகளுக்கு அந்தந்த பருவகாலத்தில் உடலைப் பாதுகாத்துக்கொள்வதற்கான ஆற்றல் இயற்கையாகவே உள்ள நிலையில் இவற்றை நம் ஆரோக்கியத்தைப் பேணி பாதுகாக்கும் மகத்தான பணியைச் செய்கிறது. அந்த வகையில் இந்த வேர் காய்கறிகளில் என்னென்ன ஊட்டச்சத்துக்கள் உள்ளன என்பதைப் பார்க்கலாம்.

சர்க்கரை வள்ளிக்கிழங்கு (Sweet Potato): குளிர்காலத்தில் சர்க்கரை வள்ளிக்கிழங்கை உணவில் சேர்த்துக்கொள்ளலாம். இதில் நார்ச்சத்து, விட்டமின் சி, மாங்கனீசு, விட்டமின் ஏ மற்றும் ஆக்ஸிஜனேற்றங்கள் உள்ளன. மேலும் இதில் உள்ள பீட்டா கரோட்டின், குளோரோஜெனிக் அமிலம் மற்றும் அந்தோசயினின்கள் போன்றவை குடல் மற்றும் மூளையின் ஆரோக்கியத்திற்கு உதவுகிறது.

பீட்ரூட் (Beetroot): சத்தான காய்கறிகளில் ஒன்றான பீட்ரூட்டில் நைட்ரேட்கள் அதிகம் உள்ளன. இவை இரத்த அழுத்தத்தை குறைக்கவும், இதய ஆரோக்கியத்தை மேம்படுத்தவும், இரத்த நாளங்களை விரிவுபடுத்தவும் உதவுகின்றன.

இஞ்சி (Ginger): இஞ்சியில் உள்ள ஆன்டிஆக்ஸிடன்ட்கள், குடல் வாயுக்களை வெளியேற்ற உதவுகிறது. மேலும் ஒற்றைத் தலைவலியை குறைக்கும்.

டர்னிப் (Turnip): டர்னிப்பில் விட்டமின் சி, நார்ச்சத்து, மாங்கனீசு மற்றும் பொட்டாசியம் போன்றவை உள்ளன. இவை உடலுக்கு தேவையான நோய் எதிர்ப்பு சக்தியை வழங்குகின்றன.

கேரட் (Carrot): கேரட்டில் உள்ள கரோட்டினாய்டுகள், பிளாவனாய்டுகள், பாலிஅசெட்டிலின்கள், விட்டமின்கள், தாதுக்கள், ஆன்டிஆக்ஸிடன்ட்கள் போன்றவை நோயெதிர்ப்பு மேம்பாட்டாளர்களாக செயல்படுகின்றன.

இதையும் படிங்க: மரம் போடும் முட்டை: சைவ முட்டை பழத்தின் அசாத்திய பலன்கள்.!