டோக்கியோ: சாதாரண மக்களை விட புற்று நோயால் பாதிக்கப்பட்ட மக்கள் தற்கொலை செய்துகொள்ளும் நிலை நாளுக்குநாள் அதிகரித்து வருவதாக ஜப்பான் சுகாதார அமைப்பு மேற்கொண்ட ஆய்வில் தெரியவந்துள்ளது. 1.07 மில்லியன் நபர்களின் தரவுகளை ஜப்பான் சுகாதார அமைப்பு ஆய்வு செய்துள்ளது. இந்த ஆய்வில் 1.8 மடங்கு புற்று நோயால் பாதிக்கப்பட்ட நோயாளிகள், நோய் கண்டறியப்பட்ட இரண்டு ஆண்டுகளில் தங்கள் உயிரை மாய்த்துக்கொள்ளும் அவல நிலைக்குத் தள்ளப்பட்டுள்ளனர்.
‘தற்கொலை எதற்கும் தீர்வாகாது, அத்தனை பிரச்னைகளுக்கும் ஒரு முடிவு உண்டு’ என சொல்லப்பட்டு வரும் நிலையில் எங்கள் முடிவை நாங்களே தேடிக்கொள்கிறோம் என புற்று நோயாளிகள் பலர் தங்கள் உயிரை மாய்த்துக்கொள்ளும் பரிதாப நிலை நாளுக்கு நாள் அதிகரித்து வருகிறது. நோய் கண்டறிதலுக்குப் பிறகு, அதனால் ஏற்படும் அச்சம் மற்றும் உடல் நலக்கோளாறுகள் காரணமாக பலர் தற்கொலை செய்துகொள்வதாக ஆய்வு முடிவுகள் தெரிவிக்கின்றன.
இது தொடர்பான விழிப்புணர்வை புற்று நோயாளிகளுக்கு மட்டும் அல்ல பொதுமக்களுக்கும் வழங்க வேண்டும் என்பதே முக்கிய நோக்கமாக உள்ளது. புற்று நோயாளிகள் தற்கொலை தொடர்பாக ஆய்வு மேற்கொண்ட ஜப்பான் சுகாதார அமைப்பின் தரவுகளை, அந்நாட்டின் சுகாதாரம், தொழிலாளர் மற்றும் நலத்துறை அமைச்சகம் வெளியிட்டுள்ளது. அதில், புற்று நோய் கண்டறியப்பட்டு அதற்கான சிகிச்சை மேற்கொண்ட பிறகு மிக குறுகிய நாள்களிலேயே மீண்டும் புற்று நோய் அபாயத்தை எதிர்கொள்ளும் நோயாளிகள்தான் அதிக அளவில் தற்கொலை செய்துகொள்வதாக குறிப்பிட்டுள்ளது.
2016ஆம் ஆண்டு புற்று நோய் உறுதி செய்யப்பட்ட 1.07 மில்லியன் நோயாளிகளின் தரவுகளை ஜப்பான் சுகாதார அமைப்பின் ஆய்வு குழு ஆய்வு செய்தது. அந்த ஆய்வில் நோய் கண்டறியப்பட்ட இரண்டு ஆண்டுகளில் தற்கொலை செய்துகொண்ட நோயாளிகள் மற்றும் சிகிச்சை மேற்கொண்டு குறுகிய நாள்களிலேயே மீண்டும் புற்று நோய் பாதிப்புக்கு ஆளான நபர்களின் எண்ணிக்கையை, சாதாரண மக்களில் தற்கொலை செய்துகொண்டவர்களின் எண்ணிக்கையோடு ஒப்பிடப்பட்டுள்ளது.
அதில் நோய் கண்டறியப்பட்ட இரண்டு ஆண்டுகளில் சுமார் 660 புற்று நோய் நோயாளிகள் தற்கொலை செய்து உயிரை மாய்துக்கொண்டுள்ளனர். அதன் அடிப்படையில், தற்கொலை அபாயம் மற்றவர்களை விட புற்று நோயாளிகள் மத்தியில் 1.84 மடங்கு அதிகரித்துள்ளதாக தெரியவந்துள்ளது. பொதுவான தற்கொலை அபாயத்தை விட 4.40 மடங்கு புற்று நோய் கண்டறியப்பட்ட முதல் மாதத்தில் நோயாளிகள் தற்கொலை செய்துகொள்கின்றனர்.
அதனைத் தொடர்ந்து, இரண்டு முதல் மூன்று மாதங்களில் 2.61 மடங்கும், நான்கு முதல் ஆறு மாதங்களில் 2.17 மடங்கும் தற்கொலை விகிதம் காணப்படுகிறது. இதில் வயது மற்றும் பாலினத்தை பொறுத்து வேறுபாடுகள் இருக்கலாம் எனவும் ஆய்வாளர்கள் கூறுகின்றனர். மேலும், இந்த தற்கொலைகள் பெரும்பாலும் வீடுகளில் தனிமையில் இருக்கும்போதுதான் நிகழ்ந்துள்ளது எனவும் தரவு முடிவுகள் கூறுகின்றன.
அது மட்டும் இன்றி 50 வயதிற்கு உட்பட்ட மக்கள் மத்தியில் புற்று நோய் பாதிப்பு விழுக்காடு நாளுக்கு நாள் அதிகரித்து வருவதாகவும், அதற்கான முக்கிய காரணத்தை இதுவரை துல்லியமாக கண்டறிய முடியவில்லை எனவும் கூறப்படுகிறது. மேலும், தற்போது புற்று நோய் எதிர்ப்பு திறன் மருந்துகள் அதிகம் கண்டறியப்பட்டுள்ள நிலையில் புற்று நோயக்கு அது ஒரு தீர்வாக அமையும் என நம்பப்படுகிறது.
இந்த ஆய்வானது ஜப்பான் மக்களிடையே மேற்கொள்ளப்பட்டதாக இருந்தாலும், இந்தியா உள்ளிட்ட அனைத்து நாடுகளிலும் நோய் மற்றும் அதனால் ஏற்படும் மன அழுத்தம் காரணமாக தற்கொலை செய்துகொள்ளும் மக்களின் எண்ணிக்கை தொடர்ந்து அதிகரித்துதான் வருகிறது. இந்த சூழலை இப்படியே கண்டுகொள்ளாமல் இருப்பது ஆரோக்கியமான எதிர்காலத்தை சீர் குலைக்கும் என ஆய்வாளர்கள் கூறுகின்றனர். மேலும், நோயாளிகள் மற்றும் அவர்களின் குடும்ப உறுப்பினர்கள் உள்ளடக்கிய விழிப்புணர்வும், வழிகாட்டு நெரிமுறைகளும் வழங்கப்பட வேண்டும் என வலியுறுத்தியுள்ளனர்.
இதையும் படிங்க: பெண்களை மிரட்டும் கருப்பை வாய்ப் புற்றுநோய்.. காரணம் என்ன?
