மதுரை: இது தமிழ்நாடா? இல்லை கருணாநிதி நாடா? என்று கேட்கும் அளவுக்கு எங்கு பார்த்தாலும் அவரது சிலைகளும், அவர் பெயர் கொண்ட திட்டங்களும் தான் உள்ளன. தற்போது நடைபெற்று வரும் மன்னர் ஆட்சியை அகற்றி மக்களாட்சியை வருகின்ற தேர்தலில் அதிமுக அமைக்கும் என முன்னாள் அமைச்சர் ஆர் பி உதயகுமார் தெரிவித்தார்.
திருமங்கலம் - ராஜபாளையம் செல்லும் சாலையில் அமைந்துள்ள ஆலம்பட்டி பகுதியில் சுரங்கப் பாதை அமைக்க வலியுறுத்தி மதுரை மாவட்ட ஆட்சியரை சந்தித்து ஆர்.பி.உதயகுமார் மற்றும் அதிமுகவினர் ஏராளமானோர் இன்று மனு அளித்தனர்.
அதனை தொடர்ந்து செய்தியாளர்களை சந்தித்த சட்டமன்ற எதிர்க்கட்சித் துணைத் தலைவர் ஆர்.பி.உதயகுமார் கூறியதாவது:
மதுரை மாவட்டம் திருமங்கலம் தொகுதிக்குட்பட்ட செக்காணூரணி பகுதியில் பொதுமக்களின் நலன் கருதி புதிய பேருந்து நிலையம் அமைக்க வேண்டும் என மாவட்ட ஆட்சியரிடம் கோரிக்கை வைத்ததன் பேரில் ரூ.8 கோடி மதிப்பீட்டில் இன்று பூமிபூஜை போடப்பட்டுள்ளது. மேலும் பல்வேறு கோரிக்கைகளுக்காக 4-ஆண்டுகளாக மனுவை தூக்கி கொண்டு செல்வது தான் மிச்சம். ஆனால் பல கோரிக்கைகள் நிறைவேற்றப்படுவதில்லை. நாங்கள் வைப்பது எல்லாம் மக்களின் கோரிக்கை. பல்வேறு குற்ற சம்பவங்களில் காவல்துறையினர் வழக்கு பதிவு செய்தாலும் கூட அதன் மீது எந்த நடவடிக்கையும் எடுப்பது இல்லை.
கருணாநிதிக்கு சிலை வைக்கும் முதல்வர் மு.க.ஸ்டாலின், பசும்பொன் முத்துராமலிங்க தேவருக்கு சிலை வைக்க சட்டத்தில் இடம் இல்லை என கூறுகிறார். சட்டத்தில் இடம் இல்லையா? அல்லது அவரது மனதில் இடம் இல்லையா? என்ற சந்தேகம் உள்ளது. தமிழ்நாடு முழுவதும் கருணாநிதி சிலைகள் அமைக்கப்படுகின்றன. மேலும் அறிவிக்கப்படும் பல்வேறு திட்டங்களில் கட்டுமானங்களில் கருணாநிதியின் பெயரே இடம்பெறுகிறது. இது தமிழ்நாடா? அல்லது கருணாநிதி நாடா? என்று வெளி மாநிலத்தவர் கேட்கும் அளவுக்கு நிலைமை உள்ளது. தற்போது நடைபெற்று வரும் மன்னர் ஆட்சியை அகற்றி மக்களாட்சியை வருகின்ற தேர்தலில் அதிமுக அமைக்கும்.
பாஜகவுடன் கூட்டணி குறித்து அதிமுக பொதுச்செயலாளர் எடப்பாடி பழனிசாமி தான் முடிவு எடுப்பார். அதிமுக தொண்டர்களின் கருத்துக்களை முடிவாகக் கூறிவிட முடியாது. பொது செயலாளர் எடுக்கும் முடிவு தான் இறுதியானது. தமிழ்நாட்டில் திமுக ஆட்சியில் சுதந்திரம் பறி போய் உள்ளது. மக்களுக்கான சுதந்திர போராட்டத்தை எடப்பாடி பழனிசாமி செய்து வருகிறார். ஆளும் கட்சியாக 2026ல் அதிமுக தான் ஆட்சியில் அமரும்.
திருப்பரங்குன்றம் மலை விவகாரத்தில் இந்த அரசு ஏன் வேடிக்கை பார்க்கிறது? இந்த சர்ச்சையின் பின்னணியில் இருக்கும் அந்த சார் யார் என்பதை அரசு தெளிவுபடுத்த வேண்டும். இதில் என்ன திட்டத்தை அரசு வைத்திருக்கிறது என்பதை மக்கள் கவனமுடன் இருக்க வேண்டும். வருகின்ற தேர்தலில் அதிமுகவின் முதல்வர் வேட்பாளராக எடப்பாடி பழனிசாமியை நாங்கள் முன்னிறுத்துகிறோம். இதற்கு ஆதரவளிக்கும் எந்த கட்சிகள் ஆனாலும் அதனை நாங்கள் வரவேற்போம் என்றார்.
