சென்னை: மக்கள் ஆரோக்கியத்திற்குக் கொடுக்கும் முக்கியத்துவத்தை விட, அழகிற்குத்தான் அதிக முக்கியத்துவம் கொடுக்கிறார்கள். அதனால்தான் ஆன்லைன் முதல் கடைகள் வரை எங்கு பார்த்தாலும் அழகு சாதனப் பொருட்களின் ஆளுமை அதிகரித்துக் காணப்படுகிறது.
இன்றைய காலத்தில் உணவுப் பழக்க வழக்கம், காற்று மாசுபாடு உள்ளிட்ட பல்வேறு காரணங்களால் மக்கள் சருமம் தொடர்பான பல்வேறு பிரச்னைகளை எதிர்கொள்கின்றனர். அந்த வகையில் வறட்சியான சருமம், முகத்தில் பரு, கண்ணைச் சுற்றி கருவளையம், தோல் சுருக்கம், பொலிவற்ற தோற்றம் உள்ளிட்ட பல இருக்கின்றன.
இதை சரி செய்ய வேண்டும் என்ற நோக்கத்தில் பல ஆயிரம் ரூபாய் செலவழித்தும் பலன் கிடைக்காமல் பலர் தவித்து வருகின்றனர். ஆனால், அந்த அழகு சாதனப் பொருட்களின் மூலப்பொருளாக இருக்கும் சந்தனத்தைப் பயன்படுத்தினாலே போதும், அத்தனை பிரச்னைகளுக்கும் படிப்படியாகத் தீர்வு காண முடியும் என்கிறார்கள், ஆயுர்வேத மருத்துவர்கள்.
உதாரணமாக, சந்தனத்தில் ரோஸ் வாட்டர் கலந்து முகத்தில் தடவி 15 முதல் 20 நிமிடம் வரை வைத்திருந்து குளிர்ந்த நீரில் கழுவினால் முகத்தில் உள்ள சுருக்கங்கள் குறையும். இதில் ஆன்டி-ஆக்ஸிடன்ட்கள் அதிகம் இருப்பதால் சருமத்தை இறுக்கமாக்கி, இளமையான தோற்றத்தை ஏற்படுத்தும். கண்களைச் சுற்றி உள்ள கருவளையம் நீங்கும். முகப்பருக்கள் குறையும். முகத்தில் கரும்புள்ளிகள் வருவதையும் தடுக்கலாம்.
ஆயில் சருமத்திற்குச் சந்தனம் உகந்ததா? ஆயில் சருமம் உள்ளவர்கள் சந்தனத்தைக் கட்டாயம் பயன்படுத்தலாம். இதை அடிக்கடி முகத்தில் தடவி கழுவுவதன் மூலம், முகத்தில் படிந்திருக்கும் அதிகப்படியான ஆயில் தன்மை குறைவதுடன், வறண்ட சருமத்தை ஏற்படுத்தாமல் இயற்கையான மாயிஸ்ட்ரைசராகவும் சந்தனம் விளங்குகிறது.
சந்தன எண்ணெய் எந்த வகையில் பலனளிக்கும்? சந்தன எண்ணெய்யில் உடலுக்குத் தேவையான ஏராளமான மருத்துவ குணங்கள் இருக்கின்றன. அதேபோல், அழகு பராமரிப்பிற்கும் இது மிக உகந்ததாக உள்ளது. அந்த வகையில், சந்தன எண்ணெய்யை முகத்தில் தடவும்போது முகத்தில் உள்ள நீர்ச்சத்தைக் குறைக்காமல் முகத்திற்கு நல்ல பொலிவு தரும்.
சந்தனத்தில் உள்ள நோய் எதிர்ப்பு தன்மைகள்: சந்தனத்தில் பொதுவாகவே பாக்டீரியா எதிர்ப்புத் தன்மை அதிகம் இருக்கிறது. இதனால் சருமம் தொடர்பான பிரச்னைகளில் இருந்து நம்மைப் பாதுகாக்கும். அதற்காக சந்தனப் பொடியுடன் பச்சைப் பயறு மாவைக் கலந்து உடலுக்குத் தேய்த்து அடிக்கடி குளித்து வந்தால் சருமப் பிரச்னைகளில் இருந்து விடுபடலாம்.
இதையும் படிங்க: இரவில் பால் குடிக்கலாமா? கூடாதா? சந்தேகம் தீர இதப்படிங்க முதல்ல!
