சான்பிரான்சிஸ்கோ: அமெரிக்காவில் தாய்ப்பால் மற்றும் தூக்கம் இன்மை தொடர்பான பிரச்சனைகளால் ஆண்டுக்கு சுமார் 3 ஆயிரம் பச்சிளம் குழந்தைகள் உயிரிழப்பதாக ஆய்வில் தகவல் வெளியாகியுள்ளது. இது குறித்து அமெரிக்கக் குழந்தைகள் நல ஆய்வாளர்கள் ஆய்வு மேற்கொண்டுள்ளனர். இந்த ஆய்வில் குழந்தைகளுக்கான தாய்ப்பால் ஊட்டுதலில் தந்தையர்கள் கவனம் செலுத்துவது இல்லை என்றும், அப்படியான சூழலில் உள்ள குழந்தைகள்தான் அதிகம் பாதிக்கப்படுவதாகவும் கூறப்பட்டுள்ளது.
தாய்ப்பாலூட்டுதல் மற்றும் பாதுகாப்பான தூக்கம் குழந்தைக்கு வழங்குவதன் மூலம் அப்பாக்கள் தங்கள் குழந்தைகளின் ஆரோக்கியம் மற்றும் நல்வாழ்வில் மிகப்பெரிய மாற்றத்தை ஏற்படுத்த முடியும் என இதன் மூலம் ஆய்வாளர்கள் அதை உறுதி செய்துள்ளனர். குழந்தையின் வளர்ச்சியில் தாய்க்கு மட்டும்தான் பங்கு உண்டு என்ற அடிப்படையில் அப்பாக்கள் பலர் குழந்தைக்கான தாய்ப்பால் ஊட்டுதல் மற்றும் தூக்கத்தில் கவனம் செலுத்துவது இல்லை. ஆனால் குழந்தையின் ஆரோக்கியத்தில் தாயைப் போலத் தந்தைக்கும் பங்குண்டு எனவும், தாய்ப்பால் ஊட்டுவதற்குத் தாயை ஊக்குவிப்பது தந்தையின் பணியாகும் எனவும் ஆய்வாளர்கள் கூறுகின்றனர்.
மேலும், இது குறித்து ஆய்வாளரும் மருத்துவருமான ஜான் ஜேம்ஸ் பார்க்கர் கூறுகையில், முதல்முறை தந்தையான ஆண்கள் 250 பேரிடம் அமெரிக்காவின் நார்த்வெஸ்டர்ன் பல்கலைக்கழகத்தில் உள்ள குழந்தை மருத்துவம் சார்பில் ஆய்வு மேற்கொள்ளப்பட்டது எனவும் இதில் பலர் தாய்ப்பால் ஊட்டுதல் மற்றும் குழந்தையின் உறக்கம் போன்றவற்றில் பெரிதும் கவனம் செலுத்தவில்லை என்பதும் தெரிய வந்துள்ளது எனக்கூறியுள்ளார்.
இது கவலைக்குரிய விஷயம் எனத் தெரிவித்த அவர், தாய்ப்பால் ஊட்டுவதைச் சிறந்தது என ஏற்றுக்கொள்ளும் 95 சதவீதம் தந்தையர்கள், தங்களுக்கும் அதில் பங்குண்டு என்பதைக் கவனத்தில் கொள்ளவில்லை எனவும் அவர் கூறியுள்ளார். மேலும், தொடர்ந்து தந்தையர்கள் தாய்ப்பால் ஊட்டுதலில் குழந்தையின் ஆரோக்கியத்தைப் புரிந்துகொண்டு அதில் தங்களுக்கான பங்கை உணர்ந்து செயலாற்ற வேண்டும் எனவும் அவர் கேட்டுக்கொண்டார். மேலும், குழந்தைக்கு உறங்குவதற்கான மென்மையான படுக்கையை விரித்துக்கொடுப்பது உள்ளிட்ட சிறிய விஷயங்களில் கூட தந்தைகள் தங்களது பங்கீட்டை வழங்க வேண்டும் எனவும் அவர் அறிவுறுத்தியுள்ளார்.
அமெரிக்காவில் ஒவ்வொரு ஆண்டும் தூக்கம் மற்றும் தாய்ப்பால் இன்மை உள்ளிட்ட காரணங்களால் சுமார் 3 ஆயிரம் குழந்தைகள் வரை உயிரிழப்பதாகக் கூறும் ஆய்வாளர்கள், தூக்கம் தொடர்பான காரணங்களால் கருப்பு இன குழந்தைகளை விட வெள்ளை இன குழந்தைகள் இரு மடங்கு பாதிக்கப்படுவதாகவும் தெரிவித்துள்ளனர். மேலும், குழந்தைகளுக்கான தாய்ப்பால் ஊட்டுதல் மற்றும் தூக்கத்தை உறுதி செய்தலில் தந்தையர்கள் போதுமான ஆலோசனை பெற்றுச் செயல்பட வேண்டும் எனவும் ஆய்வாளர்கள் அறிவுறுத்தியுள்ளனர்.
இதையும் படிங்க: வார இறுதியில் தாமதமாக தூங்குவது, வேலை நாட்களில் சீக்கிரம் எழுவது: உடலில் என்ன நடக்கும்.. எச்சரிக்கும் ஆய்வாளர்கள்!
