அறிஞர் அண்ணாவின் 111ஆவது பிறந்தநாள் விழா பொதுக்கூட்டம் விருதுநகரில் உள்ள தேசபந்து மைதானத்தில் பால்வளத் துறை அமைச்சர் கே.டி. ராஜேந்திர பாலாஜி தலைமையில் நடைபெற்றது.
இதில், பேசிய அமைச்சர் ராஜேந்திர பாலாஜி,
"கருணாநிதி தான் எழுதிய கட்டுரையில் தலையங்கமாக பெரியார் ஆணையிடுகிறார், அண்ணா ஊழையிடுகிறார் என வைத்தார். இப்படி அண்ணாவை இழிவுபடுத்திய திமுகவுக்கு அண்ணா பிறந்தநாள் கொண்டாடத் தகுதியில்லை.
அதிமுகவை 46 ஆண்டுகளாக கருணாநிதி அழிக்க நினைத்தார், இப்போது அவரது மகன் ஸ்டாலின் அழிக்க நினைக்கிறார். அது ஒருபோதும் நடக்காது.
நாங்குநேரி மற்றும் விக்கிரவாண்டி சட்டப்பேரவை இடைத்தேர்தல் மற்றும் உள்ளாட்சித் தேர்தலில் மக்கள் ஆதரவோடு அதிமுக வெற்றிபெறும்.
வேலூரில் அதிமுகவிற்கு கிடைத்தது வெற்றிகரமான தோல்வி, திமுகவுக்கு கிடைத்தது தோல்விகரமான வெற்றி. கட்சியிலிருந்து நீக்கப்பட்டவர்கள்தான் திமுக கட்சியில் இணைந்துள்ளனர். அதிமுகவின் உண்மை தொண்டர்கள் யாரும் திமுகவின் பக்கம் போகமாட்டார்கள். அதிமுக சாமானிய தொண்டர்களையும் கோட்டையில் அமர்த்தக்கூடிய கட்சி" என்று கூறினார்.
மேலும், "அதிமுக அரசு மக்களுக்கு கணக்கு கொடுப்போம், திமுகவிற்கு எதுக்கு கணக்கு கொடுக்க வேண்டும், ஸ்டாலினுக்கு எதுக்கு வெள்ளை அறிக்கை, மஞ்சள் அறிக்கை கொடுக்கணும் என்று ஆக்ரோஷமாக தெரிவித்தார். பெட்டிசன் போட்டு பிழைக்கிற கூட்டம் திமுக கூட்டம்" என்றார்.
'அதிமுக சட்டப்பேரவை உறுப்பினர்கள் 20 பேரை திமுக விலைக்கு வாங்கினால் நாங்கள் திமுக எம்எல்ஏக்கள் 60 பேரை விலைக்கு வாங்குவோம்' என்ற புதிய குண்டை போட்டு மீண்டும் தனது ரகளையை தொடங்கியுள்ளார் ராஜேந்திர பாலாஜி.
