’என் பெற்றோர் பட்டாசு தொழிலாளி, இப்ப அவங்களுக்கு வேலை இல்லை’ என பேசத் தொடங்கும் நவீனுக்கு சமூகத்தின் மீதும், குடும்பத்தின் மீதும் அப்படியொரு அக்கறை. ஊரடங்கு பிறப்பிக்கப்பட்டதால் வேலைவாய்ப்பை இழந்தவர்களில் நவீனின் பெற்றோரும் அடங்குவர்.
விருதுநகர் மாவட்டத்தில் பட்டாசு தொழிலை நம்பியே 8 லட்சத்திற்கும் அதிகமானோர் நேரடியாகவும், மறைமுகமாகவும் பிழைத்து வருகின்றனர். தற்போது அரசு பல்வேறு கட்டுப்பாடுகளை விதித்துள்ளதால், பட்டாசு உற்பத்தியில் பல்வேறு தொழிலாளர்கள் ஈடுபட முடிவதில்லை.
இதனால், சொற்ப வருமானத்தை ஈட்டி வந்த நவீனின் பெற்றோர் மொத்த வருமானத்தை இழந்தனர். ஆகையால், வீட்டுச் செலவுகளுக்கு பெரும் சிரமம் ஏற்பட்டுவந்தது. இது தான் நவீனை முகக்கவசங்களை விற்க உந்தி தள்ளியது. அவரிடம் பேசினோம்.
“காலையில் 9 மணிக்கே முகக்கவசங்கள் விற்க வந்துவிடுவேன். நானும் என் அண்ணனும் சைக்கிளில் வருவோம். ரொம்ப லாபம் வைத்து முகக்கவசங்களை விற்கமாட்டோம். மாசடைந்த காற்று, புகை போன்றவற்றிலிருந்து காக்கும் முகக்கவசங்களை எப்போதும் பயன்படுத்தலாம். இப்போது கரோனா காலத்தில் அது மிகவும் உதவியாக உள்ளது. எனவே, ரூ.18க்கு வாங்கும் முகக்கவசத்தை வெறும் ரூ.2 லாபம் வைத்து விற்றுவருகிறோம். இந்த காசை குடும்பச் செலவுக்கு பயன்படுத்த எங்களது அம்மாவிடம் கொடுத்துவிடுவோம்” என்றார்.
வீட்டு வறுமை நவீனையும், அவனுடைய அண்ணனையும் வீதிக்கு வரவழைத்துவிட்டது. பள்ளிக்குச் செல்ல வேண்டிய கால்கள், சொற்ப வருமானத்திற்காக கால்கடுக்க வீதியில் நின்று கொண்டிருப்பது காண்போர் மனதைக் கனக்கச் செய்கிறது. இருப்பினும், நவீன் ’இந்த முகக்கவசங்கள் விற்பனையை சேவை’ என்று கூறுகிறார்.
இதைப் போலவே விருதுநகரில் முகக்கவசங்களை விற்று வரும் மாற்றுத் திறனாளி இளைஞர் ஸ்ரீதர், “இந்த முகக்கவச விற்பனை வேலை இழந்த பல இளைஞர்களுக்கு வாழ்வாதாரத்திற்கு அடிகோலியுள்ளது. குறைந்தபட்ச வருமானத்தையாவது ஈட்டித்தரும் தொழிலாகவும் இருக்கிறது. நாள் ஒன்றுக்கு 60 முகக்கவசங்களை வரையிலுமாவது விற்க முடிகிறது” என ஆசுவாசப்படுகிறார்.
மத்திய, மாநில அரசுகள் ஊரடங்கின் போது இழப்பீடுகளும், நியாயவிலைக் கடைகளின் மூலம் இலவசமாக சமையல் பொருள்கள் வழங்கினாலும் அது மட்டுமே போதுமானதாக இருப்பதில்லை. தற்போதைய சூழ்நிலையில் வேலைவாய்ப்பின்றி முற்றிலும் முடங்கியவர்களுக்கு இந்த முகக்கவசம் விற்பனை பயனுள்ளதாக இருக்கிறது என்பதில் எந்த மாற்றுக்கருத்தும் இல்லை.
இதையும் படிங்க: ’குழந்தை மனது நோகக்கூடாதுனு இப்படி செஞ்சேன்’- நெகிழ வைக்கும் ஊராட்சி மன்றத் தலைவர்!
