மத்திய அரசின் வேளாண் திருத்தச் சட்டத்தைக் கண்டித்து விழுப்புரத்தில் இன்று திமுக மற்றும் அதன் கூட்டணி கட்சிகள் சார்பில் கண்டன ஆர்ப்பாட்டம் நடைபெற்றது. இந்த ஆர்ப்பாட்டத்துக்குப் பின்பு செய்தியாளர்களிடம் பேசிய க. பொன்முடி, " மத்திய அரசின் புதிய வேளாண் திருத்தச் சட்டங்கள் கார்ப்ரேட்டுக்கு துணைபோவதாக அமைந்துள்ளது.
தன்னை விவசாயி என சொல்லிக்கொள்ளும் எடப்பாடி பழனிசாமி விவசாயிகளுக்கு எதிராக துரோகங்களை இழைத்து வருகிறார். விவசாயிகளுக்கு எதிராக நிறைவேற்றப்பட்ட வேளாண் சட்டத்தை திரும்பப் பெறவேண்டும். மத்திய அரசு ஜனநாயக முறையில் நடக்காமல் விவசாயிகளுக்கு எதிரான வேளாண் சட்டத்தை இயற்றியுள்ளது.
மத்திய அரசின் கிசான் திட்டத்தில் உண்மையான விவசாயிகள் யாரும் இல்லை. இதுகுறித்து சிபிஐ விசாரணை நடத்தவேண்டும். கிசான் திட்டத்தில் முறைகேட்டில் ஈடுபட்டதாக அப்பாவிகள் மட்டுமே கைது செய்யப்பட்டுள்ளனர். இம்முறைகேட்டில் ஆளுங்கட்சியின் பங்கு அதிகமாக உள்ளது. விவசாயிகளுக்கு இலவச மின்சாரம், விவசாயக் கடன் தள்ளுபடி உள்ளிட்ட பல்வேறு திட்டங்களை செய்தது திமுக ஆட்சியில்தான்" என்று தெரிவித்தார்.
கள்ளக்குறிச்சி
கள்ளக்குறிச்சி மாவட்ட ஆட்சியர் அலுவலகம் எதிரே கள்ளக்குறிச்சி மக்களவை உறுப்பினர் பொன் கௌதம சிகாமணி, திமுக சட்டப்பேரவை உறுப்பினர் வசந்தம் கார்த்திகேயன் தலைமையில் வேளாண் திருத்தச் சட்டத்திற்கு எதிரான போராட்டம் நடைபெற்றது. இதில், திமுக கூட்டணிக் கட்சிகள் பங்கேற்றன. வேளாண் திருத்தச்சட்டங்கள் திரும்பப் பெறும்வரை திமுக தலைவர் மு.க. ஸ்டாலின் தலைமையில் போராட்டம் நடைபெறும் என வசந்தம் கார்த்திகேயன் போராட்டம் முடிந்து செய்தியாளர்களைச் சந்தித்தபோது தெரிவித்தார்.
இதையும் படிங்க: வேளான் சட்டத்தை எதிர்த்து திமுக ஆர்ப்பாட்டம்
