இதுதொடர்பாக அவர் இன்று (நவ. 17) வெளியிட்டுள்ள செய்திக்குறிப்பில், "தமிழ்நாட்டில் தாழ்த்தப்பட்ட மக்களின் வாழ்க்கை முன்னேற்றத்திற்காக பலர் அரிய தொண்டாற்றிவருகிறார்கள். ஆதிதிராவிடர்களின் முன்னேற்றத்திற்கான தங்களை இணைத்தும், அவர்கள் ஆற்றிவரும் அரிய தொண்டினைக் கருத்தில்கொண்டும் தமிழ்நாட்டைச் சேர்ந்த ஒருவருக்கு ஆண்டுதோறும் அண்ணல் அம்பேத்கர் விருதினை தமிழ்நாடு முதலமைச்சர் தலைமையிலான உயர்மட்ட குழு தேர்ந்தெடுத்து வழங்கிவருகிறது.
இந்நிலையில் இந்தாண்டு அண்ணல் அம்பேத்கர் விருதுக்கான விண்ணப்பங்கள் தகுதிவாய்ந்த நபர்களிடமிருந்து வரவேற்கப்படுகின்றன. இதற்கு, தாழ்த்தப்பட்ட சமுதாயத்தைச் சார்ந்த மக்களின் சமூக பொருளாதார மற்றும் கல்வி நிலையை உயர்த்துவதற்கு முக்கிய முயற்சிகள் மேற்கொள்ளப்பட்டிருக்க வேண்டும். தாழ்த்தப்பட்ட சமுதாயத்தைச் சேர்ந்த மக்களின் வாழ்க்கைத் தரம் உயர பணிகள் மேற்கொண்டிருக்க வேண்டும்.
கடந்த 10 ஆண்டுகளில் மேற்கொள்ளப்பட்ட பணிகள், சாதனைகள் குறிப்பிடப்பட வேண்டும் எனத் தெரிவிக்கப்பட்டுள்ளது. மேலும், இவ்விருதினைப் பெறத் தகுதியுடையோர் உரிய விண்ணப்பப் படிவத்தில் மட்டுமே விண்ணப்பிக்க வேண்டும்.
மாவட்ட ஆதிதிராவிடர் மற்றும் பழங்குடியினர் நல அலுவலகத்தில் விண்ணப்பத்தைப் பெற்றுக்கொள்ளலாம். மேலும் விண்ணப்பத்தினை கட்டணமின்றி www.tn.gov.in/ta/forms/department/1 என்ற இணையதள முகவரியில் பதிவிறக்கம் செய்தும் பயன் பெறலாம்.
விண்ணப்பங்களை பூர்த்திசெய்து மாவட்ட ஆதிதிராவிடர் மற்றும் பழங்குடியினர் நல அலுவலகம், மாவட்ட ஆட்சியரகம், விழுப்புரம் என்ற முகவரியில் நேரிலோ அல்லது அஞ்சல் மூலமாகவோ நவம்பர் 20ஆம் தேதிக்குள் சமர்ப்பிக்க வேண்டும்" என்றும் குறிப்பிடப்பட்டுள்ளது.
