வேலூர்: வேலூர் - ஒடுக்கத்தூர் இடையே, அணைக்கட்டு வழித்தடத்தில் பல தனியார் பேருந்துகள் இயங்கி வரும் நிலையில், நேற்று (நவ.8) மதியம் ஒடுக்கத்தூரில் இருந்து வேலூர் நோக்கிச் சென்று கொண்டிருந்த தனியார் பேருந்தின் ஓட்டுநர், நீண்ட தூரம் செல்போன் பேசியபடி பேருந்தை இயக்கிய வீடியோ சமூக வலைத்தளங்களில் வைரலாக பரவி வருகிறது.
ஆபத்தை உணராத பேருந்து ஓட்டுநர், சாகசம் செய்வதைப் போல ஒரு கையில் செல்போனில் பேசிக் கொண்டு, இன்னொரு கையால் ஸ்டேரிங் மூலம் ஓட்டுவது, கியர் மாற்றுவது, ஹாரன் அடிப்பதுமாகவும், சில நேரம் ஸ்டேரிங்கில் இருந்து இரண்டு கைகளையும் விட்டுவிட்டு பேருந்தை இயக்கியுள்ளார்.
தனியார் பேருந்து ஓட்டுநரின் இச்செயல், அந்தப் பேருந்தில் பயணித்த பயணிகள் இடையே பெரும் அச்சத்தை ஏற்படுத்தியதோடு, அது குறித்து பயணிகள் ஓட்டுநரிடம் கேட்டபோது, முறையாக பதில் அளிக்கவில்லை எனவும் கூறப்படுகிறது.
மேலும், இது போன்ற சம்பவங்கள் அடிக்கடி நிகழ்வதாக புகார் அளிக்கும் பொதுமக்கள், இது குறித்து தனியார் பேருந்து நிறுவனங்களும், அரசு போக்குவரத்துத் துறையும் கண்காணித்து உரிய நடவடிக்கை மேற்கொண்டு, பயணிகளின் பாதுகாப்பை உறுதிப்படுத்தும் வகையில், இதைப் போன்ற விதிமுறையை மீறும் ஓட்டுநர்கள் மீது நடவடிக்கை வேண்டும் எனக் கோரிக்கை வைத்துள்ளனர்.
