ஸ்மார்ட் சிட்டி திட்டத்தின் கீழ் வேலூர் கோட்டை அகழியில் இருந்து 100 மீட்டர் தொலைவில் அமைந்துள்ள நேதாஜி சந்தையை இடித்து விட்டு, ரூ.219 கோடி செலவில், இரண்டு மாடி வணிக வளாகம் அமைக்க வேலூர் மாநகராட்சி ஒப்பந்தப் புள்ளிகள் கோரியுள்ளது. தொல்லியல் துறை கட்டுப்பாட்டில் உள்ள இந்த பகுதியில் வணிக வளாகம் கட்ட தடை விதிக்கக்கோரி, வேலூரைச் சேர்ந்த பசுமை பாதுகாப்புச் சங்கத்தின் தலைவர் ராஜேந்திரன் சென்னை உயர்நீதிமன்றத்தில் வழக்குத் தொடர்ந்திருந்தார்.
இந்த வழக்கு தலைமை நீதிபதி தஹில் ரமணி, நீதிபதி எம்.துரைசாமி அடங்கிய அமர்வில் இன்று விசாரணைக்கு வந்தது. அப்போது, தொல்லியல் துறை அனுமதி பெறாமல் நேதாஜி சந்தைப் பகுதியில் கட்டுமானங்கள் மேற்கொள்ள தடை விதிக்க வேண்டும் என வழக்கறிஞர் சார்பில் வாதிடப்பட்டது. இதையடுத்து, தொல்லியல் துறை, வேலூர் மாவட்ட ஆட்சியர், மாநகராட்சி ஆணையர் ஆகியோர் இந்த மனு மீது வரும் செப்டம்பர் 26ஆம் தேதிக்குள் பதிலளிக்குமாறு உத்தரவிட்டார்.
