வேலூர் மாவட்டம் தொரப்பாடியில் உள்ள சிறை நிர்வாகம், சீர்திருத்த பயிற்சி மையத்தில் 32 சிறை ஜெயிலர்கள், கர்நாடகாவிலிருந்து ஒரு உதவி கண்காணிப்பாளர், கேரளாவிலிருந்து ஒரு உதவி சிறை ஜெயிலர் ஆகியோர் பயிற்சி பெற்று வந்தனர்.
இவர்களுக்கான பயிற்சி நிறைவு விழா இன்று வேலூர் தொரப்பாடி பெண்கள் சிறை அருகில் உள்ள மைதானத்தில் நடைபெற்றது. இதில், கர்நாடக சிறைத்துறை ஏடிஜிபி மெகரிக் பங்கேற்று திறந்த வேனில் நின்றபடி பயிற்சி நிறைவு அணிவகுப்பு மரியாதையை ஏற்றுக்கொண்டார்.
பின்னர், பயிற்சியின்போது சிறப்பாக பணிபுரிந்த அலுவலர்களுக்கு விருதுகள், சான்றிதழ்களை வழங்கி கவுரவித்தார். கடந்த ஒன்பது மாதமாக இந்த அலுவலர்களுக்கு, சிறை நிர்வாகம், குற்றவியல், உளவியல், சமூகவியல், மனித உரிமைகள், சட்டம் குறித்து பல்வேறு பயிற்சிகள் வழங்கப்பட்டது. துப்பாக்கிச் சுடுதல், யோகா போன்ற உடற்பயிற்சிகளும் இவர்களுக்கு அளிக்கப்பட்டது.
அப்போது அவர் பேசுகையில், "நீங்கள் இந்த பணியில் சேர யாருக்கும் லஞ்சம் கொடுக்கவில்லை, எனவே அதற்கேற்ப நீங்கள் உங்கள் சேவையில் நேர்மையாக பணியாற்றுங்கள் குறிப்பாக சிறையில் கைதிகள் பாதுகாப்பை உறுதி செய்யும் வகையில் பணியாற்ற வேண்டும். அது தண்டனை கைதியானாலும் சரி விசாரணை கைதியானாலும் சரி அனைவரையும் பாதுகாப்புடன் வழிநடத்த வேண்டும். குறிப்பாக அவர்களின் மருத்துவ சேவையில் அதிக பங்காற்ற வேண்டும்.
சிறையில் எப்போதும் அமைதி நிலவ நீங்கள் பாடுபட வேண்டும். சீருடை அலுவலர்கள் வாய்ப்பு எல்லோருக்கும் கிடைக்காது. அது உங்களுக்கு கிடைத்துள்ளது. எனவே அதை நல்ல முறையில் பயன்படுத்திக் கொள்ள வேண்டும்" என அறிவுறுத்தினார்.
