தமிழ்நாட்டில் ஆண்டுதோறும் சராசரியாக 15 ஆயிரம் சாலை விபத்துக்கள் நடைபெறுகின்றன. விபத்துக்களைத் தடுக்க வாகன ஓட்டிகள் மற்றும் பொதுமக்கள் சாலை விதிகளை முறையாக பின்பற்ற வேண்டும் என்று போக்குவரத்து அலுவலர்கள் தொடர்ந்து விழிப்புணர்வு ஏற்படுத்தி வருகின்றனர்.
இந்நிலையில் வேலூர் மாவட்டம் திருப்பத்தூர் தாலுகா காவல் நிலைய ஆய்வாளர் மதன லோகநாதன் இன்று (ஜூன் 3) திருப்பத்தூர் பகுதியில் ஹெல்மெட் அணிவது தொடர்பாக சாலையில் வாகன ஓட்டிகளிடம் விழிப்புணர்வை ஏற்படுத்தினார். அவர் காவலர்களைக் கொண்டு சாலையின் இருபுறமும் சென்ற வாகனங்களை அங்கேயே நிறுத்தி தான் பேசுவதை கவனிக்கும்படி ஒலிபெருக்கியில் அறிவித்தார்.
அதில், இங்கே ஒருவரைத் தவிர யாராவது ஹெல்மெட் போட்டு இருக்கீங்களா 100 வண்டி இருக்குது, அதில் ஒருவர் மட்டும்தான் ஹெல்மட் போட்டுள்ளார். நாங்கள் கத்திக் கொண்டே இருக்கிறோம் யாருக்காக கத்துகிறோம்? உங்கள் குடும்பத்திற்காகவும்தான் கத்துகிறோம்!
நான் இங்கு வந்து இரண்டு மாதங்கள்தான் ஆகிறது. அதற்குள் 15 பேர் விபத்தில் பலியானதைக் கண்டுள்ளேன். திடீரென விபத்தில் சிக்கி இறந்துவிட்டால் எவ்வளவு வேதனை? ஏன் இதை உணர்வதில்லை?
உங்களுக்காக இன்று நான் ஒரு மணி நேரம் மறியல் செய்கிறேன் ஒரு மணி நேரம் உங்களை நிறுத்தி வைக்கிறேன்... யாரும் செல்லக்கூடாது! ஹெல்மெட் அணியாமல் இருசக்கர வாகனத்தில் போகவேண்டாம் மூன்று பேர் பயணிக்க வேண்டாம் செல்போன் பேசிக்கொண்டே வண்டி ஓட்ட வேண்டாம் என சொல்கிறோம் ஆனால் யாரும் கேட்பது கிடையாது.
இனி ஹெல்மெட் இல்லாமல் போனால் ஒவ்வொரு வண்டிக்கும் 200 ரூபாய் அபராதம் விதித்து அரைமணி நேரம் இங்கேயே பிடித்து வைக்கப் போகிறேன் என்று பேசினார்.
ஆய்வாளரின் இந்தப் பேச்சு கண்டிப்புடன் இருந்தாலும் கூட, அது முழுக்க முழுக்க வாகன ஓட்டிகளின் மீதான அக்கறை சார்ந்தது என்பதால் ஆய்வாளர் பேச்சு திருப்பத்தூர் பகுதி மக்களிடையே வரவேற்பைப் பெற்று, ஹெல்மெட் அணிவதின் அவசியத்தை உணர்த்திய காவல் ஆய்வாளருக்கு தொடர்ந்து பாராட்டுக்கள் குவிந்து வருகின்றன.
