ரயில்வே பாதுகாப்பு படையில் காலியாக உள்ள 10 ஆயிரம் பணியிடங்களை நிரப்புவதற்காக ஆட்கள் தேர்வு செய்யும் பணி நடைபெற்று வருகிறது. இதில் தேர்வு செய்யப்படுபவர்களுக்கு பயிற்சி அளிக்கப்படும் ரயில்வே பயிற்சிப்பள்ளி, ஆயுதப்படை மைதானங்களை ரயில்வே பாதுகாப்பு படை இயக்குநர்அருண்குமார் இன்று ஆய்வு செய்தார். இதைத் தொடர்ந்து ரயில்வே பாதுகாப்பு படை பயிற்சி பள்ளியில் பணிபுரிபவர்களின் குறைகளை அவர் கேட்டறிந்தார்.
அதன் பின்னர் செய்தியாளர்களிடம் கூறுகையில், "ரயில்வே பாதுகாப்பு படையில் இருந்து 75 கம்பெனி வீரர்கள் நாடு முழுவதும் நடைபெறும் தேர்தல் பணியில் ஈடுபடுத்தப்பட உள்ளனர். அதில் தமிழகத்தில் மட்டும் 14 கம்பெனி வீரர்கள் தேர்தல் பணியில் ஈடுபட உள்ளனர். இவர்கள் முறைகேடாக பணம் கொண்டு செல்வதையும், சட்டம் ஒழுங்கை சீர்குலைக்கும் வகையில் ஆயுதங்கள் எடுத்துச் செல்வதையும், மது கடத்துவதையும் தடுக்கும் பணியில் ஈடுபடுவார்கள்.
ரயில்வே பாதுகாப்பு படையில் 8,600க்கும் மேற்பட்ட வீரர்கள், 1,200 க்கும் மேற்பட்ட உதவி ஆய்வாளர்களை நியமிக்க பட உள்ளனர். நாடு முழுவதும் இதுவரை 450 ரயில்வே நிலையங்கள் சிசிடிவி கேமராக்கள் பொருத்தி கண்காணிக்கப்படுகிறது. இன்னும் 6 ஆயிரம் ஸ்டேஷன்களில் சிசிடிவி கேமராக்கள் பொருத்தப்பட உள்ளது. கூடுதல் பாதுகாப்பு மற்றும் கண்காணிப்புக்காக ரயில்வே பாதுகாப்பு படை வீரர்களின் ஆடைகளில் மைக்ரோ கேமரா பொருத்தும் திட்டம் உள்ளது", என்றார்.
ஆய்வின் போது தெற்கு ரயில்வே தலைமை பாதுகாப்பு ஆணையர் வீரேந்திரகுமார், கோட்ட பாதுகாப்பு ஆணையர் ஜெகநாதன், பயிற்சி பள்ளி உதவி பாதுகாப்பு ஆணையர் ரகுராம்பாபு ஆகியோர் உடனிருந்தனர்.
