திருச்சி மாவட்டம் சமயபுரம் அருகே இருங்களூர் ஊராட்சியில் உள்ள தெற்கு இருங்களூரில் போலி மதுபான பாட்டில்களைச் சட்டவிரோதமாகப் பதுக்கி வைத்து விற்பனை செய்வதாக திருவரம்பூர் மதுவிலக்கு காவல்துறைக்கு ரகசியத் தகவல் கிடைத்தது.
இந்தத் தகவலின் பேரில் திருவரம்பூர் மதுவிலக்கு பிரிவு டிஎஸ்பி முத்தரசு தலைமையிலான காவல்துறையினர் சோதனையில் ஈடுபட்டனர். அப்போது தெற்கு இருங்களூரைச் சேர்ந்த சின்னப்பன் மகன் லாரன்ஸ்க்கு சொந்தமான தோட்டத்தில் உள்ள ஒரு வீட்டில் 90 அட்டைப் பெட்டிகளில் சுமார் ரூ.5 லட்சம் மதிப்புள்ள 4310 போலி் மது பாட்டில்களை பதுக்கி வைத்து விற்பனை செய்தது தெரியவந்தது.
அதன் பின்னர் போலி மதுபாட்டில்களை காவல்துறையினர் பறிமுதல் செய்தனர். இது குறித்து வழக்குப் பதிவு செய்த காவல்துறையினர் லாரன்ஸ், குப்புசாமி, உள்ளிட்ட மூவரைக் கைது செய்து திருச்சி மத்திய சிறையில் அடைத்தனர்.
இந்நிலையில் பறிமுதல் செய்த போலி மதுபானங்களை சிறுகனூர் அருகேயுள்ள தச்சங்குறிச்சி வன பகுதியில் திருச்சி மாவட்ட ஆட்சியர் உத்தரவின் அடிப்படையில் திருவரம்பூர் மதுவிலக்கு டிஎஸ்பி முத்தரசு தலைமையில் திருச்சி மாவட்ட கலால் உதவி ஆணையர் வைத்தியநாதன் மேற்பார்வையில் போலி மதுபானங்களைத் தரையில் ஊற்றி அழித்தனர்.
இதனையடுத்து, மதுபான காலி பாட்டில்கள் விரைவில் ஏலம் விடப்படுமென காவல்துறையினர் தெரிவித்தனர்.
இதையும் படிங்க: 'அந்தப் பயம் இருக்கட்டும்'- விஜய் டயலாக்கை கையிலெடுத்த ஜோதிமணி!
