நாடு முழுவதும் ஊரடங்கு நீட்டிக்கப்பட்டபோதிலும் கரோனாவின் தாக்கம் குறையாமல் அதிகரித்துக் கொண்டேதான் செல்கிறது. குறிப்பாக, தமிழ்நாட்டில் கரோனா தொற்று தீவிரமடைந்து பாதிக்கப்பட்டோரின் எண்ணிக்கை உயர்ந்து வருகிறது. நேற்று மட்டும் 52 பேருக்கு கரோனா பாதிப்பு உறுதி செய்யப்பட்டுள்ளது. இதன்மூலம் மாநிலத்தில் கரோனா பாதிக்கப்பட்டவர்களின் எண்ணிக்கை ஆயிரத்து 937ஆக அதிகரித்துள்ளது. இதுவரை 1,020 பேர் குணமடைந்து வீடு திரும்பியுள்ளனர்; 24 பேர் உயிரிழந்துள்ளனர்.
இந்நிலையில் கரோனா பரவலைத் தடுக்கும் நோக்கில் சென்னை, கோவை, மதுரை ஆகிய மூன்று மாநகராட்சிகளில் வருகிற 29ஆம் தேதி வரை முழு ஊரடங்கு உத்தரவு பிறப்பிக்கப்பட்டுள்ளது. திருப்பூர், சேலம் மாநகராட்சிகளில் இன்றுவரை (28-04-2020) முழு ஊரடங்கு உத்தரவு பிறப்பிக்கப்பட்டுள்ளது. அதன்படி கோவை, திருப்பூர் மாநகராட்சிப் பகுதிகளில் முழு ஊரடங்கு கடைப்பிடிக்கப்பட்டு வருகிறது.
இதனை மீறி பொதுமக்கள் வெளியே நடமாடினால் கடும் நடவடிக்கை எடுக்கப்படும் என்று எச்சரிக்கை விடுக்கப்பட்டது. மாநகர் முழுவதும் காவல் துறையினர் பாதுகாப்பு பணியை மேற்கொண்டுள்ளனர். இருப்பினும், தேவையில்லாமல் சுற்றித்திரிபவர்களின் வாகனங்களை காவல் துறையினர் பறிமுதல் செய்து நடவடிக்கை மேற்கொண்டு வருகின்றனர்.
மாநகரப் பகுதியில் ஊரடங்கு உத்தரவை மீறி வெளியில் சுற்றியவர்களைக் கண்டறிய ஸ்மார்ட் காப் செயலி அறிமுகப்படுத்தப்பட்டுள்ளது. காவல் துறையிடம் சிக்கும் வாகன ஓட்டிகளின் புகைப்படம், வாகன எண், வாகனத்தின் புகைப்படம் ஆகியவை இந்தச் செயலியில் பதிவேற்றம் செய்யப்படும். மேலும் அபராதமாக 500 ரூபாய் வசூலிக்கப்படும்.
இதனையடுத்து மீண்டும் இவர்கள் காவலர்களிடம் சிக்கினால், அவர்களது தகவல்கள் இந்தச் செயலியில் மீண்டும் பதிவேற்றம் செய்ய முடியாது. இதன்மூலம் இவர்கள் தொடர்ந்து தேவையின்றி வெளியே சுற்றி வருபவர்கள் என கண்டறியப்பட்டு அவர்கள் மீது தொற்று நோய் தடுப்புச் சட்டத்தின்கீழ் வழக்குப்பதிவு செய்து, கைது நடவடிக்கை மேற்கொள்ளப்படும் என காவல் துறையினர் தெரிவித்துள்ளனர். முழு ஊரடங்கின் இரண்டாம் நாளான நேற்று திருப்பூர் காவல் துறையினர் இந்தச் செயலி மூலம் 50 பேருக்கு அபராதம் விதித்துள்ளனர்.
இதையும் படிங்க: முதலமைச்சருக்காக காக்க வைக்கப்பட்ட ஆம்புலன்ஸ்; நடந்தது என்ன?
