திருப்பூர் மாவட்டம் பெரிச்சிபாளையம் பகுதியைச் சேர்ந்தவர் நாச்சிமுத்து (81). இவரது மனைவி சரஸ்வதி (78). இவர்களுக்கு மொத்தம் 4 மகன்கள்.
இந்நிலையில் 2010ஆம் ஆண்டு பெரிச்சிபாளையம் பகுதியில் உள்ள இரண்டே முக்கால் சென்ட் நிலத்தை தனக்கு உயில் எழுதி வைக்கும்படியும், அதற்கு ஈடாக வயதான தங்களை நன்கு பார்த்து கொள்வதாகவும் கூறி, அவர்களது பேரன் செல்வராஜ் என்பவர், வயதான நாச்சிமுத்து தம்பதியினரிடம் கூறியுள்ளார்.
அவர் சொன்னதை நம்பி முதியவர்கள் இருவரும் உயில் எழுதிக் கொடுக்க சம்மதித்தனர். ஆனால், சொத்தை பேரன் செல்வராஜின் பேரில் மாற்றி எழுதிக்கொடுத்த பின்னர், தங்களைக் கவனிக்காமல் கைவிட்டார் என வயது முதிர்ந்த தம்பதியினர் குற்றஞ்சாட்டுகின்றனர்.
இதனால், விரக்தி அடைந்த வயதான தம்பதியினர் இருவரும் இன்று காலை திருப்பூர் ஆட்சியர் அலுவலக நுழைவு வாயில் முன்பாக மண்ணெண்ணெய் ஊற்றி தீக்குளிக்க முயற்சி செய்தனர்.
அங்கு பாதுகாப்புப் பணியில் ஈடுபட்டிருந்த போலீசார், அவர்களை மீட்டு தெற்கு போலீஸ் நிலையம் அழைத்துச் சென்று விசாரித்து வருகின்றனர்.
இதையும் படிங்க: காவலருக்கு தீ வைத்த தோழி! - காரணம் என்ன?
