திருப்பத்தூர் அடுத்த மிட்டூர் ஓமகுப்பம் பகுதியைச் சேர்ந்த கூலித் தொழிலாளி திருமூர்த்தியின் மகன் தினேஷ் (14). இவர் மிட்டூர் அரசு ஆண்கள் மேல்நிலைப் பள்ளியில் பத்தாம் வகுப்பிற்கு தேர்ச்சியடைந்தார். கரோனா தொற்று காரணமாக தளர்வுகள் அறிவிக்கப்பட்டாலும், பள்ளிகள் திறக்கவில்லை. பள்ளிகள் திறக்க சில காலங்கள் ஆகலாம் என தெரிவிக்கப்படுகிறது.
இதனால், மாணவர்கள் பள்ளிக்குச் செல்ல முடியாத நிலை ஏற்பட்டுள்ளதால், தனியார் பள்ளிகள் ஆன்லைன் மூலம் வகுப்புகள் நடத்தி வருகின்றன. இந்த ஆன்லைன் வகுப்பிற்கு ஸ்மார்ட்போன்கள் என அழைக்கப்படும் ஆன்ட்ராய்டு போன்கள் அத்தியாவசிய தேவையாக மாறியுள்ளது. இந்நிலையில், ஆன்ட்ராய்டு போன் இல்லாததால், தினேஷால் ஆன்லைன் வகுப்பில் பங்கேற்க முடியவில்லை.
மாணவர் தினேஷ் தனது தந்தையிடம் ஆன்ட்ராய்டு போன் வாங்கித் தருமாறு நச்சரித்துள்ளார். கூலித்தொழிலாளியான திருமூர்த்தியிடம் காசு இல்லாததால், போன் வாங்கிக் கொடுக்க முடியாத சூழல் ஏற்பட்டது. இதனால், மன விரக்தியடைந்த தினேஷ் தற்கொலை செய்துகொண்டார். தகவலறிந்து சம்பவ இடத்திற்கு வந்த காவல்துறையினர், மாணவனின் உடலை கைப்பற்றி உடற்கூறாய்வுக்காக அரசு மருத்துவமனைக்கு அனுப்பி வைத்தனர்.
மேலும், இச்சம்பவம் குறித்து வழக்குப் பதிவு செய்த காவல்துறையினர் பெற்றோரிடம் விசாரணை நடத்தினர். படிக்காத தாய், தந்தையர், தங்களது பிள்ளைகளை நல்ல பள்ளிக்கூடத்தில் படிக்க வைத்து மகிழ்ச்சியடைகின்றனர். கவலைக்கிடமான சூழலில் ஏழை மாணவர்கள் பயின்று வருகின்றனர். பள்ளி கட்டணம் கட்டவே சிரமப்படும் நேரத்தில், அனைவரது வீட்டிலும் ஸ்மார்ட்போன் இருப்பது சாத்தியமா?
ஸ்மார்ட்போன் இருந்தால்தான் பிள்ளைகள் ஆன்லைன் வகுப்புகளை கவனிக்க முடியும் என்பது, மாணவர்களுக்கு ஒரு வித தாழ்வு மனப்பான்மையை வளர்க்கிறது. இதனால், மாணவர்கள் தற்கொலை முயற்சியில் ஈடுபடுகின்றனர் என சமூக ஆர்வலர்கள் கருத்து தெரிவிக்கின்றனர்.
இதையும் படிங்க: கூட்டமாக நின்ற மக்கள்... அட்வைஸ் செய்த முதலமைச்சர்
