திருப்பத்தூர் மாவட்டம் ஜோலார்பேட்டை அடுத்த ஏலகிரி கிராமத்தில் வசிப்பவர் வேடி என்பவரின் மகன் நாராயணசாமி. சுதந்திர போராட்ட தியாகியான இவர், மத்திய, மாநில அரசுகளைக் கண்டித்து இன்று அவர் வீட்டின் முன்பு ஒரு நாள் உண்ணாவிரத போராட்டம் நடத்தினார்.
இதுதொடர்பாக செய்தியாளர்களிடம் பேசிய அவர், "நாடு சுதந்திரம் அடைவதற்கு முன்பாக மகாத்மா காந்தி பல மாநிலங்களுக்குச் சென்று சுதந்திரப் போராட்டம் செய்வதற்காக கூட்டங்களை ஒருங்கிணைத்துக் கொண்டிருந்தார். அந்தச் சமயத்தில் திருப்பத்தூருக்கு வரும்பொழுது, நானும், எனது தகப்பனாரும் அவரை காணச் சென்றிருந்தோம். கூட்டத்திற்கு சென்றால் தங்களை கைது செய்வார்கள் என்ற பயத்தில் பலரும் அக்கூட்டத்திற்கு வரவில்லை. 13 அல்லது14 பேர் மட்டுமே அந்தக் கூட்டத்திற்கு வந்திருந்தனர்.
அச்சமயத்தில் நான் சிறுவனாக இருந்தேன். காந்தி என்னைத் தட்டிக்கொடுத்து இந்த நாட்டுக்காக நீதான் போராட வேண்டும் என்று அறிவுறுத்தினார். அன்று முதல் மகாத்மா காந்தி அவர்களுடைய பாதையில் நானும் பல்வேறு போராட்டங்களில் ஈடுபட்டேன். கடைசியாக 1942ஆம் ஆண்டு வெள்ளையனே வெளியேறு இயக்கம் நடைபெற்றது. அந்த இயக்கத்தில் நானும் கலந்துகொண்டு சிறைக்குச் சென்றேன்.
அப்போது, என்னை வேலூர் சிறையில் அடைத்தார்கள். அந்த சிறைகள் 4அடி உயரம் மட்டுமே இருக்கும். வேறு எந்த அடிப்படை வசதிகளும் இருக்காது. உணவு உண்பதற்கு ஒரு உருண்டை களி, ஒரு சொம்பு தண்ணீர் கொடுப்பார்கள் அந்த ஒரு சொம்பு தண்ணீரிலேயே முகம் கழுவவேண்டும். குடிக்கவேண்டும். கழிவுகளை கழிக்க பயன்படுத்த வேண்டும். இப்படிப்பட்ட பல இன்னல்களை சந்தித்தோம்.
பல இன்னல்களைத் தாண்டி இந்த நாடு சுதந்திரம் அடைவதற்கு நாங்கள் பாடுபட்டோம். இன்று எல்லோரும் 74ஆவது சுதந்திர தின விழாவைக் கொண்டாடிக் கொண்டிருக்கிறார்கள். ஆனால், அதற்காகப் பாடுபட்டவர்களில் ஒருவனாகிய நான் குடிசை வீட்டில் அல்லல்பட்டுக் கொண்டிருக்கிறேன்.
எனக்கு எந்த அடிப்படை வசதிகளும் கிடையாது. இதுகுறித்து பலமுறை மாவட்ட ஆட்சியரிடம் மனு கொடுத்துள்ளேன். ஆனால், எந்த பதிலும் வரவில்லை. என் பேரப் குழந்தைகள் நன்றாகப் படித்து இருக்கிறார்கள். ஆனால், ஏரி வேலைக்குச் செல்கிறார்கள். அவர்களுக்கு அரசாங்க வேலை கொடுக்கச் சொல்லி கேட்டிருக்கிறேன். அதற்கும் பதில் இல்லை.
ஆனால், மனம் தளராமல் மாவட்ட ஆட்சியரைச் சந்தித்து கொண்டிருக்கிறேன். இருப்பினும், அவருடைய கவனத்திற்கு என்னுடைய பிரச்னைகள் போய்ச் சேரவேண்டும் என்பதற்காக சுதந்திர தினமான இன்று ஒருநாள் மட்டும் அடையாள உண்ணாவிரதம் இருக்கிறேன்" என்றார்.
இதையும் படிங்க: தியாகிகளுக்கு வழங்கப்படும் ஓய்வூதியம் அதிகரிப்பு- முதலமைச்சர் எடப்பாடி பழனிசாமி அறிவிப்பு!
