என்எல்சி நிறுவனம் மற்றும் தமிழ்நாடு மின்சார வாரியம் ஆகிய இரண்டு நிறுவனங்களும் இணைந்து என்டிபிஎல் சார்பில் 1,000 மெகாவாட் மின்திறன் கொண்ட அனல்மின் நிலையத்தை செயல்படுத்தி வந்தன.
இங்கு தலா 500 மெகாவாட் திறன் கொண்ட 2 யூனிட்கள் உள்ளன.இந்நிலையத்தின் 2ஆவது யூனிட்டில் ஏற்பட்ட பழுது சரி செய்யப்படாததால் கடந்த ஆறு மாத காலமாக 500 மெகாவாட் மின் உற்பத்தி பாதிக்கப்பட்டுள்ளது.கடந்த 2015ஆம் ஆண்டு முதல் இந்த அனல்மின் நிலையம் மின் உற்பத்தி செய்து வருகிறது.
இந்நிலையில் இதன் 2ஆவது யூனிட்டில் கடந்த 16.01.2019-இல் திடீரென ஏற்பட்ட பழுது காரணமாக மின் உற்பத்தி நிறுத்தப்பட்டது. பழுது ஏற்பட்டு 6 மாதங்கள் கடந்துவிட்ட போதிலும், இதுவரை பழுது சரி செய்யப்படவில்லை. இதனால் கடந்த 6 மாதங்களாக 2ஆவது யூனிட் செயல்படவில்லை.
இதுகுறித்து என்டிபிஎல் அலுவலகர்களிடம் கேட்டபோது, 2ஆவது யூனிட்டில் மின் உற்பத்தி செய்யப்படும் டர்பைன் பகுதியில் பழுது ஏற்பட்டிருப்பது கண்டறியப்பட்டது.
டர்பைன் பழுதை இங்கே வைத்து சரிசெய்ய முடியாது. பாரத் மிகுமின் நிலையம் (BHEL) தான் இந்த டர்பைனை தயாரித்து வழங்கியது. எனவே, உத்தரகாண்ட் மாநிலம் ஹரித்வாரில் உள்ள பாரத் மிகுமின் நிலைய ஆலைக்கு கொண்டு சென்றால்தான் சரிசெய்ய முடியும் என்ற நிலை ஏற்பட்டுள்ளது .
எனவே டர்பைன் இயந்திரம் ஹரித்வார் கொண்டு செல்லப்பட்டது. இங்கிருந்து அதனை ஹரித்வாருக்கு பாதுகாப்பாக கொண்டு செல்ல 45 நாட்களும் மீண்டும் கொண்டு வருவதற்கு 45 நாட்கள் என பழுதை சரி செய்ய 2 மாதங்களுக்கு மேல் ஆகும்.
அதன் அடிப்படையில் டர்பைனை ஹரித்வார் கொண்டு சென்று சரிசெய்து,மீண்டும் இங்கே கொண்டுவரப்பட்டு விட்டது. அதனை பொருத்தும் பணி தற்போது நடைபெற்று வருகிறது. ஒவ்வொரு கட்டமாக சோதனை செய்து இயந்திர பாகங்களை பொருத்திட வேண்டியுள்ளது.
எனவே இன்னும் ஒரிரு நாட்களில் இந்த பணிகள் முழுமையாக முடிவடைந்து 2ஆவது யூனிட்டில் மீண்டும் மின் உற்பத்தி தொடங்கும் என்றனர்.
