தூத்துக்குடி: தமிழ்நாடு மெர்கண்டைல் வங்கியின் தலைமை அலுவலகத்தில், வருமானவரித்துறை அதிகாரிகள் அதிரடி சோதனை நடத்தி வருகின்றனர். கிரெடிட் கார்டு, டைம் டெபாசிட் மற்றும் மக்களுக்கு கொடுக்கப்படும் வட்டிகளில் குறைபாடுடன் கணக்கு காட்டப்பட்டுள்ளதாக குற்றச்சாட்டு மற்றும் வருமானவரித் துறைக்கு முறையாக கணக்கு காட்டப்படாத காரணத்தினால் இந்த சோதனை நடைபெறுவதாக தெரிவிக்கப்பட்டு உள்ளது.
இந்தியா முழுவதும் பொதுமக்கள் முதலீடு தொடர்புடைய அரசு மற்றும் தனியார் நிறுவனங்கள் ஒவ்வொரு ஆண்டும் நிதி பரிவர்த்தனை அறிக்கையை வருமானவரித்துறைக்கு சமர்ப்பித்து வருகிறது. இந்த நிதி பரிவர்த்தனை அறிக்கை முறையாக காட்டப்படுகிறதா என்பது குறித்து அவ்வப்போது வருமானவரித்துறை கண்காணிப்பு மேற்கொண்டு வருகிறது. குறிப்பாக இந்த நிறுவனங்களில் முதலீடு செய்யும் பொது மக்களின் தனிநபர் வருமான வரி அறிக்கையை ஒப்பிட்டு பார்த்து, முறையாக கணக்கு காட்டுகிறதா என கண்காணிப்பில் ஈடுபடுகின்றனர்.
அந்த வகையில் இந்த நிறுவனங்களில் சோதனை நடத்தி விசாரணை மேற்கொள்வதற்கு வருமான வரித்துறைக்கு அதிகாரம் கொடுக்கப்பட்டுள்ளது. குறிப்பாக வங்கிகள், கூட்டுறவு வங்கிகள், சார்பதிவாளர் அலுவலகங்கள், நிதி நிறுவனங்கள் உள்ளிட்ட நிறுவனங்களில், வருமான வரித்துறையினர் அவ்வப்போது சோதனை செய்து வருகின்றனர். ஏற்கனவே அறந்தாங்கியில் உள்ள நகர கூட்டுறவு வங்கியில் வருமானவரித்துறை நுண்ணறிவு பிரிவு அதிகாரிகள் சோதனை நடத்தி 13.5 கோடி ரூபாய் அளவில் முறையாக கணக்கு காட்ட வில்லை என கண்டுபிடித்து இருந்தது குறிப்பிடத்தக்கது.
அதிமுக முன்னாள் அமைச்சர் விஜயபாஸ்கர் ஆதரவாளரான ஆதி மோகன் தலைவராக செயல்படும் கூட்டுறவு வங்கியில் இந்த சோதனையை வருமானவரித்துறை நடத்தியது. இதன் தொடர்ச்சியாக தற்போது தூத்துக்குடியை தலைமையகமாக கொண்டு செயல்படும் தமிழ்நாடு மெர்கண்டைல் வங்கியில் வருமானவரித்துறை உயரதிகாரிகள் அதிரடியாக சோதனையில் ஈடுபட்டுள்ளனர்.
1921 ஆம் ஆண்டு ஆரம்பிக்கப்பட்டதமிழ்நாடு மெர்கண்டைல் வங்கிக்கு, இந்தியா முழுவதும் 500க்கும் மேற்பட்ட கிளைகள் உள்ளன. தமிழ்நாடு மெர்கண்டைல் வங்கியில் கடந்த ஐந்து வருடத்தில் சமர்ப்பிக்கப்பட்ட அறிக்கையை ஆய்வு செய்ய போது பல்வேறு குறைபாடுகள் இருப்பதாகவும் முறையாக கணக்கு காட்டப்படவில்லை எனவும் தெரியவந்தது.
குறிப்பாக டைம் டெபாசிட் , டிவிடெண்ட் பண்ட், மக்களுக்கு கொடுக்கப்படும் வட்டி ஆகியவற்றை முறையாக காட்டப்படவில்லை என தெரியவந்துள்ளது. குறிப்பாக கிரெடிட் கார்டு தொடர்பான பரிவர்த்தனைகளில் கடந்த நான்கு வருடத்தில் கணக்கு காட்டாமல் இருப்பதாகவும் கூறப்படுகிறது. எனவே கடந்த நான்கு வருடத்தில் மெர்கண்டைல் வங்கியில் நடைபெற்ற பரிவர்த்தனை அது தொடர்பான அறிக்கை ஆவணங்களை ஆய்வு செய்து வருகிறது. தமிழ்நாடு மெர்கண்டைல் வங்கியின் சிஇஓ மற்றும் நிர்வாக இயக்குனரான கிருஷ்ணன் சுப்பிரமணியனிடம் வருமானவரித்துறை அதிகாரிகள் விசாரணை மேற்கொண்டு வருகின்றனர்.
குறிப்பாக வங்கியிலிருந்து பணம் எடுக்கப்பட்டதாக காட்டப்படும் கணக்குகளில் முரண்பாடு இருப்பதாக அதிகாரிகள் தரப்பில் கூறியுள்ளனர். தமிழ்நாடு மெர்கண்டைல் வங்கியின் நிர்வாகத்திற்கு பலமுறை விளக்கம் கேட்டு நோட்டீஸ் அனுப்பியும் முறையாக பதில் அளிக்காததால் இந்த அதிரடி சோதனை மேற்கொள்ளப்பட்டு வருவதாகவும் சோதனையின் முடிவில் எவ்வளவு பணம் முறையாக கணக்கு காட்டப்படவில்லை எனவும் தெரியவரும் என வருமானவரித்துறை தரப்பில் அதிகாரிகள் கூறியுள்ளனர்.
வங்கி தரப்பு விளக்கம்?
இதனிடையே, சோதனை தொடர்பாக வங்கி நிர்வாகம் விளக்கம் அளித்துள்ளது. வங்கியின் தலைமை அலுவலகம் வெளியிட்ட செய்திக்குறிப்பில், "எங்கள் தலைமை அலுவலகத்தில் வருமான வரித்துறை அதிகாரிகள் சோதனை நடத்தியதில், அதிகாரிகளுக்கு முழு ஒத்துழைப்பு அளித்து வருகிறது. அதிகாரிகள் கோரிய விளக்கங்கள் மற்றும் விவரங்களுக்கு பதிலளித்து, தேவையான தகவல்களை தொடர்ந்து வழங்குவோம். வங்கியின் வணிகச் செயல்பாடுகள் வழமைபோல் தொடர்ந்தன. மேலும் சட்டப்பூர்வ நடவடிக்கைகளுக்கு முழு ஒத்துழைப்பு வழங்கி வருகிறோம் என்று தெரிவிக்கப்பட்டுள்ளது.
இதையும் படிங்க: Gut Health: இந்த உணவு வகைகளை தவறியும் சாப்பிடாதீங்க - குடல் ஆரோக்கியம் அவ்வளவுதான்!
