தூத்துக்குடி மாவட்டத்தில் ஆய்வு மேற்கொண்ட கண்காணிப்பு அலுவலர் பிரகாஷ்!

தூத்துக்குடி மாவட்டத்தில், கரோனா தடுப்பு பணிகள் குறித்து கண்காணிப்பு அலுவலர் பிரகாஷ் தெரிவித்தார்.

தூத்துக்குடி மாவட்டத்தில் கரோனா தடுப்பு, திட்டப்பணிகள் கண்காணிப்பு அலுவலரும் தமிழ்நாடு திறன் மேம்பாட்டு கழகக் மேலாண்மை இயக்குநருமான பிரகாஷ் இன்று (ஜூன் 16) ஆய்வு மேற்கொண்டார். மாநகராட்சிக்குள்பட்ட பகுதியில் பக்கிள்ஓடை ஜெயராஜ் ரோடு, சிவந்தாகுளம், திருச்செந்தூர் சாலை, பழைய பேருந்து நிலையம் உள்ளிட்ட பகுதிகளில் ஸ்மார்ட் சிட்டி திட்டத்தின் கீழ் நடைபெற்று வரும் திட்டப்பணிகளையும் ஆய்வு செய்தார்.
பின்னர், கண்காணிப்பு அலுவலர் பிரகாஷ் செய்தியாளர்களுக்கு சந்தித்து கூறுகையில் ’’தூத்துக்குடி மாவட்டத்தில் கரோனா தடுப்பு பணிகள் சிறப்பாக மேற்கொள்ளப்பட்டு வருகிறது. கரோனா தடுப்பூசி பணிகளும் கிராமப்புறங்களில் முகாம் அமைத்து சிறப்பாக மேற்கொள்ளப்படுகிறது.

கரோனா தடுப்பூசி குறித்து பொதுமக்கள் அதிகளவில் விழிப்புணர்வு ஏற்படுத்தி வருகின்றன. தற்போது, தூத்துக்குடியில் தீவிர தடுப்பு நடவடிக்கையின் காரணமாக கரோனாத் தொற்று பாதிப்பு ஆறு சதவீதத்திற்கும் கீழ் குறைந்துள்ளது.

தூத்துக்குடி அரசு மருத்துவக் கல்லூரி மருத்துவமனையில் கரோனா சிகிச்சை வசதிக்காக ஆக்சிஜன் வசதியுடன் கூடிய படுக்கைகள் அதிகரிக்கப்பட்டு வருகின்றன. 900 படுக்கைகள் ஆக்சிஜன் வசதிகளுடன் அமைக்கப்பட்டு வருகிறது.

தற்போது, 550 படுக்கைகளுக்கு நிறைவு பெற்றுள்ளது. அரசு மருத்துவமனையில் 16 மெட்ரிக் டன் ஆக்சிஜன் கொள்ளளவு உள்ள கொள்கலனும் நிறுவப்பட்டுள்ளது. இந்த ஆக்சிஜன் கொள்ளளவு 1500க்கும் மேற்பட்ட நோயாளிகளுக்கு சிகிச்சை அளிக்க முடியும்.

இதைப் போல கோவில்பட்டி மருத்துவமனையிலும் சிகிச்சை வசதிகளை மேம்படுத்துவதற்கு ஆய்வுகள் செய்யப்பட உள்ளன. இங்கு கூடுதலாக 250 ஆக்சிஜன் படுக்கை வசதிகளும், தாலுகா மருத்துவமனைகள், திருச்செந்தூர், விளாத்திகுளம், மருத்துவமனைகளிலும் படுக்கை விரிவாக்க வசதிகள் எடுக்கப்பட்டுள்ளன.

இதையடுத்து, ஸ்மார்ட் சிட்டி திட்டத்தின் கீழ் தூத்துக்குடி மாவட்டத்தில் பல்வேறு பணிகளும் நடைப்பெற்று வருகின்றன. இந்தப் பணிகள் அனைத்தும் இன்னும் ஓர் ஆண்டுக்குள் நிறைவுபெறும். தூத்துக்குடி மாநகராட்சி சமதள நிலப்பரப்பினை உடைய பகுதி அல்ல கடல் மட்டத்திற்கு கீழான பகுதிகள் நிறைய உள்ளன.

பருவமழை காலங்களில் பெய்யும் மழை நீர் ஊருக்குள் புகாமல் தடுப்பதற்காக ரூ.950 கோடியில் சிறப்பு திட்டம் வகுக்கப்பட்டு பணிகள் ஏறத்தாழ முடிவடைந்துவிட்டன. இன்னும், 800 மீட்டர் தொலைவுக்குள்ளாக மட்டும் பணிகள் முடிவடைய வேண்டி உள்ளது. குடிநீர் வழங்கலில் 248 கிராமங்களுக்கு கூட்டு குடிநீர் திட்டம் மூலம் குடிநீர் வழங்கும் திட்டமும், 93 கிராமங்களுக்கு கூட்டுக்குடிநீர் வழங்கும் மற்றொரு திட்டமும் முடிவடைந்துள்ளது எனத் தெரிவித்தார்.

இந்த ஆய்வு பணிகளின் போது மாவட்ட ஆட்சியர் செந்தில்ராஜ், அலுவலர்கள் உடனிருந்தனர்.