தூத்துக்குடி மாவட்டம், கோவில்பட்டி அருகே தோட்டிலோவன்பட்டியில் காவல் சோதனைச் சாவடியில், கடந்த 16 ஆம் தேதி அதிகாலை கிழக்கு காவல் நிலைய ஆய்வாளர் சுதேசன், உதவி ஆய்வாளர் இசக்கிராஜா உள்ளிட்ட காவல்துறையினர் பணியில் இருந்தபோது, அந்த வழியாக வந்த காரை நிறுத்தி சோதனையிட்டனர்.
சோதனையில், காரில் 9 எம்.எம். ரக கள்ளத்துப்பாக்கி, ஐந்து தோட்டாக்கள், இரண்டு அரிவாள்கள் இருந்தன. அவற்றை காவல்துறையினர் பறிமுதல் செய்தனர். பின்னர், காரில் இருந்த திருநெல்வேலி மாவட்டம், தச்சநல்லூர் மேலக்கரையைச் சேர்ந்த குமுளி ராஜ்குமார் (37), பாளையங்கோட்டை படப்பைகுறிச்சி காந்தி தெருவைச் சேர்ந்த வினோத் (26), திருநெல்வேலி கொக்கிரகுளம் மேலநத்தத்தைச் சேர்ந்த சுரேந்தர் (24) ஆகிய மூன்று பேரையும் கைது செய்து தூத்துக்குடி பேரூரணி சிறையில் அடைத்தனர்.
கைது செய்யப்பட்ட குமுளி ராஜ்குமார் மீது ஏழு கொலை வழக்குகள் உட்பட தமிழ்நாடு முழுவதும் 26 வழக்குகள் உள்ளன. வினோத் மீது இரண்டு கொலை வழக்குகள், ஒரு கொலை முயற்சி உள்ளிட்ட ஐந்து வழக்குகள் உள்ளன. சுரேந்தர் மீது ஆள் கடத்தல் வழக்கு உள்ளது. இதையடுத்து, இவர்கள் மூன்று பேரையும் குண்டர் தடுப்பு சட்டத்தில் கைது செய்ய கோவில்பட்டி காவல் துணை கண்காணிப்பாளர் கலை கதிரவன், ஆய்வாளர் சுதர்சன் ஆகியோர் மாவட்ட காவல் கண்காணிப்பாளருக்குப் பரிந்துரை செய்தனர்.
மாவட்ட காவல் கண்காணிப்பாளர் ஜெயக்குமார் ,மாவட்ட ஆட்சியர் சந்தீப் நந்தூரிக்கு பரிந்துரைத்தார். ஆட்சியரின் உத்தரவின் பேரில், அவர்கள் மூன்று பேரும் குண்டர் சட்டத்தின் கீழ் கைது செய்யப்பட்டனர்.
