தூத்துக்குடி மாவட்டம் ஒட்டப்பிடாரம் அருகே உள்ள முப்பிலிவெட்டி கிராமத்தைச் சேர்ந்தவர், ஸ்ரீமதி. தனது 13 வயதில் இருந்தே சைக்கிள் ஓட்டுவதில் ஆர்வம் கொண்டவரான இவர், மாவட்ட மண்டல அளவிலான பல்வேறு போட்டிகளில் கலந்து கொண்டு பல பதக்கங்களை வென்றுள்ளார். கடந்த 2019 ஆம் ஆண்டு ஜனவரியில், மாநில அளவிலான சைக்கிள் போட்டியில் கலந்து கொள்ளத் தேர்வு செய்யப்பட்டார்.
ஆனால் அப்போட்டியில் கலந்து கொள்வதற்கான சைக்கிள் வாங்குவதற்கு அவரிடம் போதுமான வசதியில்லாத காரணத்தால் அந்த போட்டியில் அவர் பங்கேற்கவில்லை. இந்நிலையில், தூத்துக்குடி பாராளுமன்ற உறுப்பினரும், திமுக நாடாளுமன்றக்குழு துணைத்தலைவருமான கனிமொழியிடம், தனக்கு சைக்கிள் வேண்டும் என கோரிக்கை வைத்ததையடுத்து, புதிய சைக்கிள் ஒன்றை கனிமொழி எம்பி வழங்கினார்.
இந்த சைக்கிளின் மூலமாக ராஜஸ்தான் மாநிலத்தில் நடந்த தேசிய அளவிலான ஜூனியர் சைக்கிள் போட்டிகளில் கலந்துகொண்டு, குழு போட்டியில் தங்கப் பதக்கத்தையும், தனித்துப் போட்டியிட்டதில் வெள்ளிப் பதக்கத்தையும், கடந்த ஜூன் மாதம் டெல்லியில் நடைபெற்ற ஆசிய அளவிலான டிராக் சைக்கிளிங் குழு போட்டியில் 3 ஆம் இடத்தையும் பிடித்து சாதனை படைத்தார்.
இந்நிலையில் செய்தியாளர்களைச் சந்தித்த வீராங்கனை ஸ்ரீமதி, “முதலில் சாதாரண சைக்கிள் போட்டிகளில் பங்கேற்று வெற்றி பெற்று இருக்கிறேன். பின்னர், மாவட்ட அளவிலும், மாநில அளவில் விளையாட எனக்கு சைக்கிள் தேவைப்பட்டது அதற்காக கனிமொழி எம்பியிடம் சைக்கிள் கேட்டவுடன், சைக்கிள் வாங்கி கொடுத்தார். பின்னர் சர்வேதச அளவில் விளையாட விலை உயர்ந்த சைக்கிள் தேவைப்பட்டது.
இதனை கனிமொழி எம்பியிடம் கூறுகையில், உடனடியாக விலை உயர்ந்த 15 லட்சம் மதிப்புள்ள டிராக் சைக்கிள் வாங்கி கொடுத்தார். இந்த சைக்கிள் கொண்டு இஸ்ரேலில் ஆகஸ்ட் மாதம் நடைபெற இருக்கும் "உலக ஜூனியர் பெண்கள் சாம்பியன்ஷிப்" போட்டியில் கலந்து கொண்டு வெற்றி பெற்று கனிமொழி எம்பியிடம் சமர்ப்பிக்க இருக்கிறேன்’ எனத் தெரிவித்தார்.
இதையும் படிங்க: முதலமைச்சர் ஸ்டாலின் முன்னிலையில் டைசல் நிறுவனத்துடன் 5 புரிந்துணர்வு ஒப்பந்தங்கள்
